Charles Darwin

Charles Darwin ("txarlz daruin") ia nase en Shrewsbury, England, a 12 febrero 1809. Sua padre ia es Robert Waring Darwin, un dotor e la fio de Erasmus Darwin, un dotor, scrivor e naturiste famosa. Sua madre ia es Susannah Wedgwood Darwin, ci ia mori cuando Charles ia ave oto anios.

Charles ia es instruida en un scola local par Dotor Samuel Butler. En 1825, el ia vade a Edinburgh, Scotland, per comensa studia la medica, ma el ia trova pronto ce esta campo turba sua stomaco! Donce, el ia vade a la Universia de Cambridge, surfasal per deveni un prete de la Eglesa de England. Ma el ia es plu interesada par entomolojia – spesial la scarabes – e par la xasa.

On dise ce ance cuando el ia es un om joven, el ia ave un mente pasiente e abrida, e ce el ia usa multe oras per colie esemplos de spesies diversa e per contempla ideas nova. A acel tempo, la idea de la evolui ia es discuteda: la naturistes ia comprende plu e plu clar ce la spesies pote cambia e, en fato, ia cambia tra multe milenios. La demanda ia es "como?"

Viaja de la Beagle

Un de sua mestres, John Henslow, ia coraji ce Darwin presenta se per la posto (nonpaiada!) de naturiste en la barcon de esplora HMS Beagle, su la comanda de Capitan Robert Fitz-Roy. A 27 desembre 1831, Charles ia parti de England a la ves prima. El no ia reveni asta 2 otobre 1836.

El ia usa la plu de la viaja per studia la costas de America Sude e la isolas prosima, ma el ia visita ance isolas diversa en la Mar Pasifica, Australia, e Zeland Nova. La Isolas Galapagos ia fa un impresa la plu grande a el. A esta loca, el ia trova pinsones (avias peti) con becos variosa, e el ia nota ce cada beco conveni per un come spesifada. La varia natural ia eleje la becos per conveni a la ambientes diversa de la isolas peti.

Cuando Darwin ia reveni, el ia scrive libros en cual el ia descrive sua studias de la jeolojia e de la spesies de plantas e animales cual el ia oserva e colie. El ia publici ance sua jornal dial como un libro oji conoseda como La viaja de la Beagle (The Voyage of the Beagle). El ia nota ce el ia es la plu impresada par la modos de ajusta de animales diversa a la ambientes ecolojial variosa.

Prinsipe de eleje

De la comensa, Darwin ia reconose ce la eleje es un prinsipe usada con susede par la persones ci eleva la animales. Ma el ia nesesa aora un idea per esplica como la natur fa la mesma taxe sin la vantaje de intelijentia.

En 1838, Darwin leje un libro par Thomas Malthus, titulida Un article sur la prinsipe de la cuantia de popla (An Essay on the Principle of Population). Malthus ia introdui la idea ce la compete per recursos stabli la cuantia de un spesie, e ia avisa ce, cuando la recursos es limitada, la poplas umana ta sufri ance.

A 29 janero 1839, Darwin ia sposi sua cusin Emma Wedgwood. Los ia abita en London per alga anios, e ia reposa a pos en la vileta Down, a 15 milias de London, do los ia abita per la resta de sua vives. Darwin ia comensa sufri de un maladia cual el ia prende probable cuando un inseto ia morde el en la Andes a multe anios pasada. Francis, la fio de Darwin, ia loda sua madre, ci ia cura dedicada sua padre. Par causa de la cura de sua sposa, Darwin ia pote es tan produosa como el ia es. Emma e Charles ia ave du fias e sinco fios.

En 1842, Darwin ia scrive un manoscrito corta de sua teoria. En 1844, el ia scrive un nota: "A fini, brilias luminante ariva, e me es cuasi convinseda (multe contra la opina con cual me ia comensa) ce la spesies no es sin muta (lo es como confesa un mata)."

Du naturistes

El ia es cuasi a la media de fini un esposa completa de sua ideas, cuando el ia reseta un article par Alfred Russel Wallace, con un demanda per comentas. La article ia conserna un teoria de eleje natural! Wallace ia leje ance Malthus, e en 1858, cuando malada con febre, el ia crea la idea intera en un momento. Darwin, a causa de sua ansia, ia pospone presenta sua ideas a la popla siensal tra 20 anios!

Darwin ia envia la article a sua ami, Charles Lyell de la Sosia Jeolojial, seguente la demanda de Wallace. Lyell ia envia el, con un article par Darwin, per presenta a un confere siensal.

La idea de ambos naturistes ia es clar: par un eleje atendente, la persones pote esajera un varia minor cuando los eleva la canes e boves, e, en la mesma modo, la natur eleje alga varias, sola par permete ce la varias plu bon survive e reprodui en la luta per recursos limitada. La cambias es peti e lenta, ma la milenios permete la varia de natur cual nos vide sirca nos. Darwin ia nomi esta idea "la eleje natural".

Publici de la teoria

En 1859, Darwin ia publici final sua opera grande: Sur la orijina de spesies par eleje natural. La libro ia susede pronto. Natural, multe disputas ia aveni, e la plu de los ia conserna la oposa de ideas cual on ia esplica costumal en modo relijiosa.

La eleje natural ia es frecuente confusada con un idea presedente de la naturiste franses Jean-Baptiste Lamarck. El ia sujesta ce un animal dona a sua enfantes la cualias cual el ia oteni en sua vive propre. Un esemplo famosa es ce, pos multe jeneras de animales cual ia estende sua colo per prende la folias alta, la forma strana de la jirafa ia emerji. Esta teoria – la lamarcisme – ia es la oposante major de la eleje natural tra multe plu de anios.

Otra libros

En 1868, Darwin ia publici Varia de animales e plantas par doma (Variation of Plants and Animals under Domestication), e en 1871, La orijina de la umanas, e la eleje en relata a seso (The Descent of Man, and Selection in Relation to Sex). Esta es vera du libros en un. La parte du conserna la eleje sesal. Esta ia dona a la mundo la colores briliante de la avias mas, per esemplo: la colores de la mases, e la atrae de la femas a los, ia es elejeda car esta varias produi plu enfantes.

La parte de la libro nomida "La orijina de la umanas" es un introdui corta a la idea ce umanas es ance la resulta de la eleje natural. Esta parte ia provoca multe disputas calda.

En 1872, La espresa de emosias en umanas e animales (The Expression of Emotions in Man and Animals) ia es publicida. A esta ves, Darwin ia descrive la evolui de la sinias usada de animales per comunica – e el ia relata esta sinias a la espresa de la emosias umana. Esta libro ia es la paso prima a sosiobiolojia e psicolojia evolual.

En ajunta a esta libros multe influente, Darwin ia gusta ance studia e descrive la plantas. En 1862, el ia scrive un libro sur la fertili de orcideas par insetos. En 1875, el ia publici ambos Moves e abituas de la plantas trepante (Movements and Habits of Climbing Plants) e Plantas insetivor (Insectivorous Plants). En 1877, La formas diferente de la flores de plantas de la mesma spesie (The Different Forms of Flowers on Plants of the Same Species) ia veni. En 1880, el ia scrive, con sua fio Francis, La capasia de move en plantas (The Power of Movement in Plants). E en 1881 el ia publici la libro La crea de mofo vejetal par la ata de vermes (The Formation of Vegetable Mould Through the Action of Worms).

Conclui

Charles Darwin ia mori a 19 april 1882. El ia es enterada en la Abaderia de Westminster. Parente, el ia es un om amable e jentil, amada par sua familia e sua amis. Estra sua viaja sur HMS Beagle, el ia parti de sua casa en Down a poca veses. Vasilante, el ia abandona sua credes relijial e ia deveni un agnostica, ma ia partisipa ancora con sua eglesa en laboras de carita.

Vide ance La orijinas de la teoria de evolui e Evolui.