Cloroplasto
Un cloroplasto es un tipo de organeta con membrana, conoseda como un plasto, cual fa fotosintese xef en la selulas de plantas e alges. La pigmento fotosintesal clorofila catura la enerjia de lus de sol, converti lo, e reteni lo en la moleculas de reserva de enerjia ATP e NADPH en cuando lo libri osijen de acua en la selulas. La ATP e NADPH es alora usada per fabrica moleculas organica de diosido de carbono en un prosede conoseda como la sicle de Calvin. Cloroplastos fa alga funsionas, incluinte la sintese de asidas grasosa, la sintese de aminoasidas, e la responde imunial en plantas. La cuantia de cloroplastos per selula varia de un, en alges uniselulal, asta 100 en plantas como Arabidopsis e trigo.
Un cloroplasto es marcada par sua du membranas e un consentra alta de clorofila. Otra tipos de plastos, como la leucoplasto e la cromoplasto, conteni poca clorofila e no fa fotosintese.
Cloroplastos es multe dinamica - los sirculi e es moveda a sirca en la selulas de plantas, e a veses divide a du per reprodui. Sua condui es forte influeda par fatores de ambiente como la color e intensia de lus. Cloroplastos, como mitocondrios, conteni sua propre ADN, cual on crede ce lo es eritada de sua asendente—un sianobateria fotosintesal cual ia es engolida par un selula eucariotal temprana. Cloroplastos no pote es fabricada par la selula de planta e nesesa es eritada par cada selula fia en divide selulal.
Con un eseta (la amoeboide Paulinella chromatophora), tota cloroplastos pote probable es trasada a retro a un sola aveni endosimbiosente, cuando un sianobateria ia es engolida par un eucariota. An con esta, cloroplastos pote es trovada en un colie estrema vasta de organismes, alga no direta relatada a lunlotra - un resulta de multe avenis endosimbiosente du e an tre.
La parola cloroplasto deriva de la parolas elinica chloros (χλωρός), cual sinifia "verde," e plastos (πλαστός), cual sinifia "formida, moldida."