Colera
Colera es un infeta de la intestin magra par alga tipos de la bateria Vibrio cholerae. Sintomes pote varia de no cosa, a debil, a sever. La sintom clasica es cuantias grande de diarea acuosa cual dura per alga dias. Vomita e crampos musculal pote ance aveni. La diarea pote es tan sever ce en oras lo causa desidrata sever e nonecuilibra de eletrolitos. Esta pote resulta en oios afondada, pel fria, elasticia diminuida de la pel, e la plieta de la manos e pedes. Desidrata pote causa ce la pel deveni bluin. Sintomes comensa entre du oras e sinco dias pos esposa.
Alga tipos de Vibrio cholerae causa colera, con alga de los produinte maladias plu sever ca otras. Lo sperde xef par acua nonsecur e comeda nonsecur cual ia es contaminada con fece umana conteninte la bateria. Moluscos sucoceda es un fonte comun. Umanas es la sola ospitor conoseda per la bateria. Fatores de risca per la maladia inclui ijenia povre, acua bevable nonsufisinte, e povria. On pote diagnose colera par un proba de fece, o un proba rapida de basteta, an si la proba de basteta es min esata.
Metodos de preveni colera inclui ijenia bonida e asede a acua limpa. Vasines contra colera cual on dona par la boca furni un proteje asetable per sirca ses menses, e dona la benefica ajuntada de proteje contra un otra tipo de diarea causada par E. coli. Persones ci survive un episodio de colera ave un imunia de dura longa per a la min tre anios (la periodo probada).
La trata prima per individuas afetada es sales de reidrata bocal, la recambia de licuidas e eletrolitos par usa solves pico dulse e salosa. Solves fundida sur ris es prefereda. En enfantes, on ia trova ance ce la ajunta de zinco boni la resultas. En casos sever, on pote nesesa licuidas intravenal, e antimicrobiales pote es beneficante. La eleje de antimicrobial es aidada par probas de sensosia a antimicrobiales.
On estima ce colera continua afeta 3 a 5 milion persones tra la mundo e causa 28 800 a 130 000 moris per anio. Asta oji, sete pandemicas de colera ia aveni en la mundo developante, con la plu resente comensante en 1961, e continuante oji. La maladia es rara en paises rica, e afeta enfantes la plu sever. Colera aveni como ambos epidemicas e cronica en alga rejiones. Rejiones con un risca continuante de la maladia inclui Africa e Asia sude-este. La risca de mori entre los afetada es usual min ca 5%, con trata bonida, ma pote es tan alta como 50% sin tal asede a trata. Descrives de colera es trovada tan temprana como la sentenio 5 AEC en sanscrito. En Europa, colera ia es un terma inisial usada per descrive cualce tipo de gastroenterite, e no ia es usada per esta maladia asta la temprana de la sentenio 19. La studia de colera en England par John Snow entre 1849 e 1854 ia gida a avansas sinifiante en la campo de epidemiolojia par causa de sua intuis sur la transmete par acua contaminada, e un mapa de la mesma ia es la caso rejistrada prima de trasa epidemiolojial.