Cultur Paracas
La cultur Paracas ia es un sosia en la Andes esistente entre sirca 800 aec e 100aec, con un sabe grande de iriga e maneja de acua e cual contribui sinifiante a la artes de texeda. Lo ia es locada en cual oji es la rejion Ica de Peru. La plu de informa sur la vives de la popla paracas veni de escavas a la loca grande a la mar sur la penisola Paracas, prima investigada par la arceolojistes peruan Julio Tello en la desenio de 1920.
.jpg)
La cavones paracas ia es tombas dutin en la culmina de Cerro Colorado, cada conteninte enteras multiple. On ave evidentes ce, tra la sentenios cuando la cultur flori, esta tombas ia es reusada. En alga casos, la testas de la mor ia es estraeda, suposada per rituos, e plu tarda ia es reenterada. La seramicas asosiada inclui vasos policromata, otras con decoras negativa, e otras de la tradisiones paracas. La texedas asosiada inclui multe texes, trensas, e nodas complicada.
La necropoli de Wari Kayan es composada de du grupos de sentos de enteras poneda prosima a lunlotra e sirca casas abandonada a la inclina presipe norde de Cerro Colorado. La seramicas asosiada es blanda ma multe delicata, alga con arjila acuin blanca e roja, otras con decoras de motifes frotada, e otras de la tradisiones de la cultur Topara. Cada entera es composada de un paco cono envolveda en texeda, la plu conteninte un person sentada fasante norde a la baia de Paracas, a lado de ofres como seramicas, comedas, sestos, e armas. Cada corpo ia es liada con corda per teni lo en la posa sentada, ante ce lo ia es envolveda en multe stratos de texedas ornosa e delicata. La brodes de la texedas es la plu bon sempre produida par la sosias preeuropean de la Andes, e es la obras de arte par cual la cultur es plu bon conoseda. La enteras a la necropoli ia continua asta sirca 250 ec, e multe de la pacos inclui texedas simil a los de la cultur Nazca temprana.
An si la cultur Paracas ia developa en esta rejion entra sirca 1200 aec e 100 aec, arceolojistes crede ce la cultur Topara ia invade de la norde sirca 150 aec. La du cultures ia coesiste per un o du jeneras e sua interata ave un rol clavin en la developa de la cultur de Nazca e sua tradisiones seramica e texeda. La cultur Nazca probabe ia evolui fasil de la cultur de Paracas.