Cultur auriniasian
La cultur auriniasian es un tradision arceolojial de la paleolitica alta asosiada con umanas moderna temprana de Europa. Lo es probable derivada de la cultur amarian de la Levante.
La auriniasian temprana es datida entre sirca 41,000 e 35,000 aec. La auriniasian media dura de sirca 35,000 a 31,000 aec. La auriniasian tarda, cambiante a la cultur gravetian, es de sirca 31,000 a 24,000 aec. La loca tipal es Aurignac en Frans sude-ueste.
La esemplo la plu vea nondisputada de arte de figures umana - la Venus de Hohle Fels - es de la cultur auriniasian. Lo ia es descovreda en 2008 en un cava a Schelklingen en Deutxland. La cava Bacho Kiro en Balgaria es un de la enteras la plu vea conoseda de la auriniasian.
La fabrica de utiles es marcada par osos alterada e puntos de cornos de servos taliada a la basa. La utiles de petra focosa inclui lamas refinada e lamas peti colpada de cores preparada en loca de usante flocos cru. La popla de esta cultur ia ance produi alga de la arte de cavas la plu temprana, como la gravas de animales a la cava de Trois Freres e la depintas a la cava de Chauvet en Frans sude. Los ia produi ance pendentes, brasaletas, e perletas de ivor, e ance figures tridimensional. Bastos perforada, probable lansadores, es ance trovada a esta locas.
La sofistica e autoconsensia mostrada en la fabrica ia causa ce arceolojistes considera la fabricores de la utiles e arte auriniasian como la umanas moderna prima en Europa. Restas de umanas e la ojetos fabricada auriniasian trovada prosima suporta esta dedui.