La cultur gravetian ia es un tradision de la paleolitica alta european cual ia segue la cultur auriniasian sirca 31,000 aec. Lo es la cultur european final cual multe arceolojistes vide como unida, e lo ia desapare en la plu de locas ante 20,000 aec, prosima a la masima glasial final, an si alga elementos ia dura asta 15,000 aec. A esta punto, lo ia es recambiada subita par la cultur solutrean en Frans e Espania, e ia continua o evolui como la cultur epigravetian en Italia, la Balcanes, Ucraina, e Rusia.

Un reprodui de la Venus de Lespugue, de la cultur gravetian

La cultur es conoseda per sua figures de Venus, cual ia es tipal fabricada como siselidas de ivor o calcario. La cultur ia es prima identifiada a la loca de La Gravette en Frans sude-ueste.

La popla gravetian ia es xasores-coliores ci ia avita en un periodo de fria estrema en la preistoria de Europa, e la modo de vive ia es formida par la clima. Arceolojistes descrive du varias rejional: la gravetian ueste, conoseda xef de cavas en Frans, Espania, e Britan, e la gravetian este en Europa sentral e Rusia. La gravetianes este ia spesiali como xasores de mamutes, de cual la restas es tipal trovada en locas abrida, e no en cavas.

La cultur de xasa gravetian pare multe plu movente e complicada ca cultures a ante. Los ia abita cavos o abiterias semisutera o sirculal, tipa ordinada en "viletas" peti. Gravetian pare como popla inovante en la developa de utiles como cotelas negra, puntos de flexas entretexeda (engles: "tanged"), e bumeranges. Otra inovas inclui la usa de redes texeda e lampas de petra. Lamas e lametas ia es usada per fabrica decoras e utiles de la osos de animales.

Arte gravetian cual ia survive inclui joalas, depintas en cavas, e figures de Venus peti e portable fabricada de arjila o ivor. La divas de fertilia dati xef de la periodo temprana, e inclui plu ca 100 esemplos survivente. Los ave un tipo fisical multe spesifada, con senos grande, ancas larga, e gluteos protendente. Tipal, la figures no ave detalias de fas, e la membros es comun asente o rompeda.

En la periodo posglasial, la cultur ia comensa desapare de Europa norde, ma ia continua en areas sirca la Mediteraneo.