Cultur misenean
La cultur misenean ia es la fase final de la eda de bronze en Elas antica, en la periodo de 1600 a 1100 aec. Lo represente la sivilia avansada prima en Elas continental, con statos palasial, organiza urban, obras de arte, e un sistem de scrive. Entre la sentros de potia cual ia emerji, la plu notable ia es los de Pilo, Tirinto, e Midea en la Peloponeso, Orcomeno, Tebas, e Atina en Elas sentral, e Iolco en Tesalia. La loca la plu grande ia es Misene, en la Argolida, pos cual la cultur de esta eda ia es nomida. Colonias misenean e influeda par misene ia apare ance en Epiro, Macedonia, la isolas de la mar Ejeo, la costa de Anatolia, la Levante, Cipros, e Italia.
La miseneanes ia introdui alga inovas en la campos de injenia, arciteta, e sustrutur militar, e comersia tra areas vasta de la Mediteraneo ia es esensal per la economia misenean. Sua scrive silabal, la linial B, ofre la arcivos prima scriveda de la lingua elinica e sua relijio, cual ja inclui alga dios cual pote es ance trovada en la panteon olimpial. Elas misenean ia es dominada par un sosia de gerores elite e ia es composada par un rede de statos palasial cual ia developa sistems sosial, political, e economial con ierarcias rijida. A la culmina de esta sosia ia es la re, conoseda como la wanax (pronunsiada "uanah").
La cultur misenean ia mori con la colasa de la eda de bronze en la Mediteraneo este, seguenteda par la "edas oscur", un periodo sin arcivo cual resulta en Elas antica, do cambias sinifiante ia aveni de sosias sentrida en la palasios a formas de organiza desentralida, con un usa estendeda de fero. Teorias variosa ia es proposada per la fini de esta sivilia, incluinte la invade de la elinicas dorica o la ativias de la "poplas de la mar". Otra teorias inclui desastres natural e cambias de clima. La periodo misenean ia deveni la ambiente istorial de multe leteratur e mitos elinica, incluinte la epica de la gera troian.