Daldos
Daldos (daldøs, daldøsa) en un jua de table conoseda sola de alga locas costal en Scandinavia sude, do sua istoria pote es trasada asta sirca 1800. La jua es nontipal per sua usa de dados de cuatro lados, como en patxisi. Lo ave alga cosas comun con alga juas de la sami en la familia de juas sahkku. Otra ca esta, sua relatas la plu simil es la juas tab de Africa norde e Asia sude-ueste.
La table es formida como un barco con tre linias paralel de bocas. Du de cual ave 16 bucos per cada, e la linia sentral ave 17 bucos, un de los como la "proa" de la barco.
Cada juor ave 16 pesos formida como spatulas con un fini basa cual pote es poneda en la bucos de la table. Un juor ave pesos cual es alga larga e magra; la otra juor ave pesos formida como un obelisce.
A la comensa de la jua, la pesos de A es poneda en la bucos de linia A, con la spatula perpendicular a la linia, e egal per juor B. Plu tarda en la jua, la pesos es turnada paralel a la linias.
La dados ave cuatro lados. Los es tipal sirca 2 par 2 cm larga, e 4 cm longa. La finis de la dados es rondida. La lados es marcada A con la valua 1 - nomida la "dal" - II con la valua 2, III con la valua 3, e IIII con la valua 4. La "dal" es a la lado oposante a la III. Cada juor ave du de esta dados.
Per deside ci juor comensa la jua, cada lansa sua dados; la lansa la plu alta comensa.
Pesos no pote move asta lo ia es "dalida". Un dado cual mostra la "dal" permete ce la juor "dali" la peso nondalida la plu avansada, pd la dal turna la spatula a paralel con sua linia, e move lo un buco a ante. Con la dal prima, sola la peso plu prosima a la popa de a barco pote es dalida, e alora lo vade a la linia media. Si no pesos es dalida, un lansa cual no mostra cualce dales es un turno perdida.
La pesos de cada juor move tra sua linia orijinal a la linia media denova. Cuando un peso ateni la proa, lo move a la linia de la otra juor. Cuando lo ateni la fini de esta linia, el move ancora a la linia media, etc. Lo reveni nunca a sua linia orijinal.
La cuantias de la du dados pote es ajuntada e usada per un peso, o los pote es usada per du pesos. On debe usa la cuantias de ambos dados, si posible. Un lansa de du dales dona un lansa estra per acel juor.
La gol de la jua es per sutrae tota pesos de la otra juor de la table. Un peso es sutraeda cuando un otra peso fini a la mesma buco. On pote salta supra pesos de la otra juor, ma lo no resulta en un sutrae. Ma on no pote salta supra sua propre pesos. La jua fini cuando un juor ave no pesos restante.
←
juor 1 ↓ o o o o o o o o o o o o o o o o ↰ 2
"popa" → o o o o o o o o o o o o o o o o o "proa"
juor 2 ↑ o o o o o o o o o o o o o o o o ↲ 1
←