Disco de sielo de Nebra
La disco de sielo de Nebra es un disco de bronze de sirca 30 cm de diametre e 2.2 kg de pesa, con un patina blu-verde e simboles intarsiada de oro. Estas ia es interpretada como un sol (o luna plen), un luna cresente, e stelas (incluinte un grupo interpretada como la Pleiades). La du arcos de oro longo la lados, cual marca la angulo entre la solstisias, ia es ajuntada plu tarde. Un de la curvas ladal ia es asenta par dana. Un ajunta final ia es un otra arco a la basa, ensircada par baretas multiple (de sinifia nonserta, interpretada como un "Barcon Solal" con multe remos, o como la Via Letin).
La disco es de un loca prosima a Nebra, Sacsen-Anhalt, en Deutxland, e datida par asosia a sirca 1600 aec. Lo ia es asosiada con la cultur Unetice de la Eda Bronze.
La stilo en cual la disco ia es fabricada no ia es simil a cualce stilo artiste alora conoseda de la periodo, con la resulta ce la ojeto ia es, a comensa, suspetada de es un falsi. Ma lo es aora asetada vasta como autentica.
La disco de sielo de Nebra es la imaje concreta de la universa la plu vea ancora conoseda de cualce loca en la mundo. En juno 2013, lo ia es incluida en la arcivo de la Memoria de la Mundo de UNESCO, e nomida un de la trovas arceolojial la plu importante de la sentenio 20.