Dotor Ci (engles: Doctor Who) es un drama de televisa brites, produida par la BBC. Lo mostra la aventuras de un estrateran misteriosa, conoseda como "la Dotor". La Dotor viaja tra spasio e tempo en un macina cual ave la aspeta esterna de un ciosco de telefon de polisia, ma cual es estrema grande a la interna. Con sua acompaniores, el esplora la universo, solve problemes, fronti monstros e coreti la nonjustia.

La TARDIS, un corti de "Tempo A Relata De Interfas Spasial" (en engles: "Time And Relative Dimension In Space")

Entre la naras siensal televisada, Dotor Ci es la plu durante en la mundo; lo es ance un parte importante de la cultur popular brites. On reconose lo per sua naras imajinosa, la creosia de sua efetos spesial, e sua usa inventosa de musica eletronical. La program ia influe jeneras de persones laborante en la televisa brites ci ia regarda lo cuando los ia es enfantes. Lo ia jenita ance programes relatada, cual inclui Torchwood, La aventuras de Sarah Jane e Clase.

Istoria edita

Dotor Ci ia apare a la ves prima a 17:15 en 23 novembre 1963, pos un anio de discutes e preparas. La xef de drama BBC, Sydney Newman, ia ave la encarga major per sua developa, ma otras ia contribui ance multe.

On ia continua produi la program per 26 saisones, difusada en la canal BBC One. Ma en 1989, la canal ia cansela la program, car sua cuantia de vidores ia diminui, sua persepi publica ia afonda, e on ia difusa lo a un tempo min popular. An tal, la BBC ia espera trova un compania autonom per relansa la program. Philip Segal, un sitadan brites abitante en la SUA, ia fa un tal proposa cual ia resulta final a un filma televisal en 1996. La filma ia es susedosa en Britan, ma lo no ia susede en la SUA, e donce lo no ia crea un serie nova.

Entretempo, medias lisensada — per esemplo, novelas e teatrales de sona — ia furni naras nova, ma la program televisada ia dormi asta 2003. En setembre 2003, pos anios de atentas nonsusedosa per trova suporta finansial per un filma de sinema, la BBC ia anunsia la produi interna de un serie nova. Un de la produores dirijal de la serie nova ia es la scrivor xef Russell T Davies.

Dotor Ci ia reveni final con la episodio "Rose" en BBC One a 26 marto 2005. On ia difusa ja des-un saisones, des-cuatro episodios de natal o anio nova, e ance cuatro otra episodios spesial – tre pos la saison cuatro en 2009, e un a la aniversario sincodes en 2013. A la comensa de la saison sinco, Steven Moffat ia prende la rol de scrivor xef e produor dirijal, cual ia pasa plu a Chris Chibnall per la saison des-un en 2018. On ia vende la serie nova a multe otra paises, e on regarda lo (e la filma de 1996) como un continua direta de la serie clasica.

Consensia publica edita

Rapida, la serie clasica ia deveni estrema bon conoseda en la Rena Unida, con multe fanes en la popla jeneral. Multe atores selebrada ia aseta o solisita an roles tempora en naras diversa.

Ma la popularia ia es acompaniada par controversia sur la demanda esce la program conveni per enfantes. En la desenio de 1970, la batalior moral Mary Whitehouse ia cexa repeteda a la BBC sur contenidas cual el ia trova asustante o sanguosa; an tal, la program ia deveni an plu popular, spesial con enfantes. John Nathan-Turner, ci ia produi la serie en la desenio 1980, ia dise ce el espeta felis la comentas de Whitehouse, car los aumenta la cuantia de vidores.

On dise ce regarda Dotor Ci de un loca secur (frecuente espresada como "pos la sofa") e la espeta cauta de la fini de un episodio asustante es un de la esperias comun de un enfantia brites.

La imaje de la TARDIS, la macina en cual la Dotor viaja, es firma liada a la program en la consensia publica. En 1996, la BBC ia solisita un marca comersial sur sua aspeta de un ciosco blu de polisia, per usa sur benes. En 1998, la polisia de London ia oposa esta, ma en 2002 la Ofisia de Patentas ia judi favorente a la BBC.

La revive de la serie en la sentenio 21 ia deveni la sentro de la presenta de BBC One en saturdis, e ia "defini la canal". Pos sua revive, lo gania un cuantia constante alta de vidores, e un mesura constante alta de aproba. La sinemiste Steven Spielberg ia comenta ce "la mundo ta es un loca plu povre sin Dotor Ci".

Carateres edita

La Dotor edita

La carater de la Dotor ia es orijinal velida en misterio. En la anios temprana, on ia sabe sola ce el es un viajor estrateran e multe intelijente ci batalia contra la nonjustia en sua esploras de tempo e spasio en un barcon vea e nonfidable. A la comensa, el ia pare disputosa e an alga malvolente; ma el ia suavi rapida a un figur compatiosa. En 1969, on ia revela ce el ia fuji de sua propre popla, la Barones de Tempo de la planeta Gallifrey.

Como un Baron de Tempo, la Dotor pote rejenera sua corpo cuando el es prosima a mori. On ia introdui esta idea en la naras como un modo de continua la serie cuando la scrivores ia fronti la parti de la ator William Hartnell en 1966, e lo ia resta como un elemento major cual permete cambia la ator xef cuando nesesada. La nara "La asasinor matante" ia revela ce un Baron de Tempo pote rejenera normal a des-du veses, donante des-tre incarnes — an si a la min un Baron de Tempo, la Mestre, ia susede rompe esta restrinje.

La Dotor ia rejenera aora a des-cuatro veses – a la min en la naras televisada. A un ves, el ia reteni la mesma fas, e a la ves des-tre el ia reseta un aida spesial de la Barones de Tempo. Cada incarne ia ave sua propre cualias e capasias, ma el reteni la memorias e esperias de sua presedentes. En cada incarne, la Dotor es un aventuror estrema moral ci prefere solve la problemes par intelijentia, no violentia. En sua rejenera des-cuatro, el ia deveni un fem a la ves prima televisada.

La lista seguente mostra cada incarne numerida, la nom de la ator ci ia presenta el, e la anios pertinente:

Dotor Ator Anios
Prima William Hartnell 1963–1966
Du Patrick Troughton 1966–1969
Tre Jon Pertwee 1970–1974
Cuatro Tom Baker 1974–1981
Sinco Peter Davison 1981–1984
Ses Colin Baker 1984–1986
Sete Sylvester McCoy 1987–1989, 1996
Oto Paul McGann 1996
Gera John Hurt 2013
Nove Christopher Eccleston 2005
Des David Tennant 2005–2010
Des-un Matt Smith 2010–2013
Des-du Peter Capaldi 2013–2017
Des-tre Jodie Whittaker 2017–2022
Des-cuatro David Tennant (denova) 2022-2023
Des-sinco Ncuti Gatwa 2023–

La incarne secreta edita

En 2013, la drama ia revela ce un otra incarne ia esiste entre la Dotor Oto e la Dotor Nove, pd: entre la serie clasica e la serie nova de Dotor Ci. Rejetante la nom "la Dotor", esta om ia rejenera sola per batalia en un gera vasta entre sua propre popla e la daleces. Ultima, pos desenios de batalia, el ia fini la gera par destrui no sola la daleces, ma ance la Barones de Tempo. La incarnes seguente de la Dotor ia atenta oblida ce esta incarne ia esiste, e ia parla nunca sur el.

En la episodio spesial per selebra la aniversario sincodes de Dotor Ci, on ia esplora esta periodo de la vive de la Dotor, e la Dotores Des e Des-un ia encontra el. En junta, los ia susede trova un modo plu bon de fini la gera, destruinte la daleces ma no la planeta Gallifrey. A pos, la incarne secreta ia oblida esta encontra, e ia crede ancora ce el ia destrui sua propre planeta. Ma tra un momento corta, el ia merita denova la nom "la Dotor". On refere aora a el como "la Dotor de Gera".

La preincarnes edita

En 2020, on ia revela ce la Dotor ia es orijinal trovada como un xica peti par un esploror de Gallifrey antica, ante la eda de la Barones de Tempo. Esta enfante ia pare veni de un otra dimension misteriosa e ia es ja capas de rejenera. Pos rexerca esta capasia, la esploror ia dona lo ance a sua propre popla par altera de jenetica, e en esta modo el ia crea la Barones de Tempo.

La Dotor ia descovre alora ce el ia vive ja tra un cuantia vasta de incarnes ante la om vea ci on nomi tradisional "la Dotor Prima", e el ia encontra an un de los (presentada par Jo Martin).

Acompaniores edita

Cuasi sempre, la Dotor fa sua aventuras con un, du o tre acompaniores, e de pos 1963 plu ca 35 atores ia prende esta roles. La acompaniores prima ia es Susan Foreman (la neta de la Dotor) e sua enseniores Barbara Wright e Ian Chesterton.

Dramal, la acompaniores es persones a ci la vidores pote relata se. Los aida la progresa de la nara par demanda per esplicas de la Dotor, e par crea un peril cual la Dotor ta resolve. La Dotor gania periodal acompaniores nova — e perde la veas, cuando los reveni a casa, o deside resta sur un mundo estrateran, o mori an.

La majoria de la acompaniores es femes joven e bela. An tal, la ecipo per la serie clasica ia manteni un tabu contra cualce envolve romantica. Esta tabu ia es controversa rompeda en la filma televisal de 1996, cuando la Dotor Oto ia besa sua acompanior Grace Holloway. La serie nova jua con esta idea, implicante ce alga acompaniores ama vera la Dotor.

Enemis edita

Cuando Sydney Newman ia comanda la crea de la serie, el no ia vole continua la clixe de la monstro con oios protendente. An tal, monstros ia es un parte esensal de Dotor Ci cuasi de la comensa, e los ia es popular.

Daleces edita

 
La daleces

De tota monstros e viles, la daleces es los ci ia fisa la plu firma Dotor Ci en la imajina publica. Los ia es la monstros prima de la serie, mutadas ensircada en macinas blindada como tances con voses metalin. Los crede ce los es superior de cada otra viventes, e los vole mata constante estas. Tra un tempo longa en la serie nova, lo ia pare ce los ia destrui an la Barones de Tempo en un gera enorme.

En la nara, la daleces ia es creada par Davros, un siensiste vil. En realia, los ia es creada par la scrivor Terry Nation (como un alegoria per la nazisme) e desinior Raymond Cusick. On ia descrive los como "vasos de peper malvolente".

Siberomes edita

La siberomes ia es orijinal un spesie de umanines vivente sur la planeta jemelo de la Tera. Los ia implanta sempre plu partes artifis en sua corpos, e ia deveni final fria lojical e calculante. La serie nova ia introdui un otra varia de siberomes, creada en un universo paralel par transplanta serebros de umanas en corpos metal.

La Mestre edita

La Mestre es un otra Baron de Tempo, e la arcenemi de la Dotor. Imajinada como un Profesor Moriarty per la Sherlock Holmes de la Dotor, la carater ia apare prima en 1971. Como lo de la Dotor, la rol de la Mestre ia es prendeda par atores diversa tra la anios, incluinte un fem.

Musica edita

Dotor Ci ia es la serie televisal prima en la mundo con un musica de titulo realida sola par metodos eletronical. La musica ia es composada par Ron Grainer, e orijinal realida par Delia Derbyshire de la Laboreria Radiofonial de la BBC. Derbyshire ia construi gradal la sona par suprapone e filtri bandas siclinte de notas. On ia usa esta varia, con editas minor, asta la fini de saison 17 (1980).

A pos, Peter Howell ia prepara un varia plu moderna e dinamical, cual on ia usa asta 1985. Esta ia es cambiada per un varia plu simple par Dominic Glynn per saison 23 (1986), e Keff McCulloch ia prepara la varia usada per la Dotor Sete (asta 1989). En la serie nova, la musica de titulo (como ance la musica interna) ia es furnida par Murray Gold asta la fini de 2017; aora lo es creada par Segun Akinola. Ma la melodia fundal es ancora lo cual Grainer ia composa en 1963.

Episodios edita

Dotor Ci ia dura orijinal tra 26 "saisones" (= aprosima corespondente a anios) de 23 novembre 1963 asta 6 desembre 1989. En acel serie clasica, cada episodio semanal ia es un parte de un "nara" plu longa — usual con cuatro o ses episodios en la anios temprana, e con tre o cuatro episodios en la anios plu tarda. De tempo a tempo la naras en un saison ia es relatada, como en la xerca per la Clave de Tempo en saison 16.

On ia intende ce la program es instruinte e conveninte per familias en la sera temprana de un saturdi. A la comensa, on ia alterna naras en la pasada (per instrui la istoria) e naras en la futur o en la spasio (per instrui la siensa). Un de la tre acompaniores orijinal de la Dotor ia es un ensenior de istoria; un otra ia es un ensenior de siensa.

An tal, la naras siensal ia comensa domina la serie, e, pos 1967, on ia sesa produi naras istorial, car estas no ia es gustada par la ecipo de produi. La serie ia loca ancora alga naras en la pasada, ma estas ia es sempre siensal, con la sola eseta de "Orcidea Negra" locada en la Rena Unida en la desenio 1920.

La forma ia cambia con la revive en 2005: cada serie conteni aora entre des e des-tre episodios. Un episodio spesial e plu longa es difusada en la Dia de Natal o (en 2019) la Dia de Anio Nova. Cada saison inclui du spesies de naras — naras autonom, e naras de du episodios — e un arco laxe de nara cual completi se en la episodio final. Comensante con la episodio spesial "Planeta de mores" en 2009, on filma la serie en la moda 1080p e difusa lo en defini alta. De 2018, la episodios usa la proportio de aspeta 2:1.

Episodios mancante edita

Entre prosima 1964 e 1974, on ia destrui o vacui multe bandas plu vea cual ia es retenida en la bibliotecas diversa de la BBC. Estas ia inclui multe episodios vea de Dotor Ci, conteninte la tre Dotores prima. On ia susede aora regania cada episodio de pos la move a la televisa colorosa (a la comensa de la Dotor Tre), ma algas es sin color. 253 episodios produida en la ses anios prima de la program no esiste plu en la arcivos de la BBC. On dise ce cuasi cada episodio ia esiste en 1972, e ce on ia sesa vacui bandas ja en 1978.

Alga episodios ia reveni a la BBC de la arcivos de otra paises ci ia compra copias per difusa, o de individuas privata ci ia oteni los en modos diversa. On ia regania ance caxetas video con rejistras de la difusas mesma, e estraes corta cual on ia mostra en otra programes. On ave a la min la sona de cada episodio mancante, reganiada de vidores ci ia rejistra la episodios sur bandas de sona. Comensante en la temprana de la desenio de 1990, la BBC distribui rejistras de la sona de la episodios mancante; en esta rejistras, la vose de un de la atores survivente gida la escutor tra la partes vidal.

Un de la episodios la plu xercada es la parte cuatro de "La planeta des" (1966), la nara final de la Dotor Prima, car lo fini con la cambia a la Dotor Du. La sola frato de esta cual resta esistente, estra un pico de rejistras silente con cualia estrema debil, es la poca secondos de la rejenera mesma, como mostrada en un jornal televisal per enfantes.

Lista de episodios edita

Saison 1 (1963–64) edita

Dotor 1

  • Un enfante nonmundal ("An Unearthly Child")
  • La daleces ("The Daleks")
  • La borda de destrui ("The Edge of Destruction")
  • Marco Polo ("Marco Polo")
  • La claves de Marinus ("The Keys of Marinus")
  • La astecas ("The Aztecs")
  • La sensoritas ("The Sensorites")
  • La rena de teror ("The Reign of Terror")

Saison 2 (1964–65) edita

  • Planeta de jigantes ("Planet of Giants")
  • La daleces invade la tera ("The Dalek Invasion of Earth")
  • La salva ("The Rescue")
  • La romanes ("The Romans")
  • La planeta aranin ("The Web Planet")
  • La crusada ("The Crusade")
  • La museo spasial ("The Space Museum")
  • La xasa ("The Chase")
  • La interferor de tempo ("The Time Meddler")

Saison 3 (1965–66) edita

  • Galasia 4 ("Galaxy 4")
  • Mision a la nonconoseda ("Mission to the Unknown")
  • La creores de mitos ("The Myth Makers")
  • La projeta mestral de la daleces ("The Daleks' Master Plan")
  • La masacra ("The Massacre")
  • La arca ("The Ark")
  • La juetor sielal ("The Celestial Toymaker")
  • La pistolores ("The Gunfighters")
  • La savajes ("The Savages")
  • La macinas de gera ("The War Machines")

Saison 4 (1966–67) edita

  • La contrabandores ("The Smugglers")
  • La planeta des ("The Tenth Planet")

Dotor 2

  • La potia de la daleces ("The Power of the Daleks")
  • La montaniores ("The Highlanders")
  • La menasa suacuan ("The Underwater Menace")
  • La base lunal ("The Moonbase")
  • La teror macra ("The Macra Terror")
  • La creadas sin fas ("The Faceless Ones")
  • La malvole de la daleces ("The Evil of the Daleks")

Saison 5 (1967–68) edita

  • La tomba de la siberomes ("The Tomb of the Cybermen")
  • La ietis ("The Abominable Snowmen")
  • La gerores de jelo ("The Ice Warriors")
  • La enemi de la mundo ("The Enemy of the World")
  • La rede de teme ("The Web of Fear")
  • Furia de la profonda ("Fury from the Deep")
  • La rota en spasio ("The Wheel in Space")

Saison 6 (1968–69) edita

  • La dominores ("The Dominators")
  • La furor de mentes ("The Mind Robber")
  • La invade ("The Invasion")
  • La crotones ("The Krotons")
  • La semes de moria ("The Seeds of Death")
  • La piratas spasial ("The Space Pirates")
  • La juas de gera ("The War Games")

Saison 7 (1970) edita

Dotor 3

  • Lansia de spasio ("Spearhead from Space")
  • La silurianes ("The Silurians")
  • La ambasadores de moria ("The Ambassadors of Death")
  • Enferno ("Inferno")

Saison 8 (1971) edita

  • Teror de la autones ("Terror of the Autons")
  • La mente malvolente ("The Mind of Evil")
  • La garas de Axos ("The Claws of Axos")
  • Colonia en spasio ("Colony in Space")
  • La demones ("The Dæmons")

Saison 9 (1972) edita

  • Dia de la daleces ("Day of the Daleks")
  • La maldise de Peladon ("The Curse of Peladon")
  • La diablos de mar ("The Sea Devils")
  • La mutadas ("The Mutants")
  • La monstro de tempo ("The Time Monster")

Saison 10 (1973) edita

  • La tre Dotores ("The Three Doctors")
  • Carnaval de monstros ("Carnival of Monsters")
  • Frontera en spasio ("Frontier in Space")
  • Planeta de la daleces ("Planet of the Daleks")
  • La mori verde ("The Green Death")

Saison 11 (1974) edita

  • La geror de tempo ("The Time Warrior")
  • Invade par la dinosauros ("Invasion of the Dinosaurs")
  • Moria a la daleces ("Death to the Daleks")
  • La monstro de Peladon ("The Monster of Peladon")
  • Planeta de la aranias ("Planet of the Spiders")

Saison 12 (1975) edita

Dotor 4

  • Robot ("Robot")
  • La arca en spasio ("The Ark in Space")
  • La esperimenta sontaran ("The Sontaran Experiment")
  • Jenese de la daleces ("Genesis of the Daleks")
  • Retalia de la siberomes ("Revenge of the Cybermen")

Saison 13 (1975–6) edita

  • Teror de la zigones ("Terror of the Zygons")
  • Planeta de malvole ("Planet of Evil")
  • Piramides de Marte ("Pyramids of Mars")
  • La invade par androides ("The Android Invasion")
  • La serebro de Morbius ("The Brain of Morbius")
  • La semes de ruina ("The Seeds of Doom")

Saison 14 (1976–77) edita

  • La mascidas de Mandragora ("The Masque of Mandragora")
  • La mano de teme ("The Hand of Fear")
  • La asasinor matante ("The Deadly Assassin")
  • La fas de malvole ("The Face of Evil")
  • La robotes de moria ("The Robots of Death")
  • La garas de Ueng-Xiang ("The Talons of Weng-Chiang")

Saison 15 (1977–78) edita

  • Teror de Roca Agu ("Horror of Fang Rock")
  • La enemi nonvidable ("The Invisible Enemy")
  • Imaje de la Fendal ("Image of the Fendahl")
  • La creores de soles ("The Sun Makers")
  • Sumundo ("Underworld")
  • La invade de tempo ("The Invasion of Time")

Saison 16 (1978–79) edita

La clave de tempo ("The Key to Time"):

  • La engana sur Ribos ("The Ribos Operation")
  • La planeta piratin ("The Pirate Planet")
  • La petras de sangue ("The Stones of Blood")
  • La robotes de Tara ("The Robots of Tara")
  • La potia de Crol ("The Power of Kroll")
  • La influe apocalisal ("The Armageddon Factor")

Saison 17 (1989–80) edita

  • Destina de la daleces ("Destiny of the Daleks")
  • Urbe de moria ("City of Death")
  • La creada de la mineria ("The Creature from the Pit")
  • Malsonia de Eden ("Nightmare of Eden")
  • La cornos de Nimon ("The Horns of Nimon")
  • Xada ("Shada") – nunca completida

Saison 18 (1980–81) edita

  • La nido de osio ("The Leisure Hive")
  • Meglos ("Meglos")
  • Sirculo completa ("Full Circle")
  • State de dejenera ("State of Decay")
  • Porton de gerores ("Warriors' Gate")
  • La mantenor de Tracen ("The Keeper of Traken")
  • Logopolis ("Logopolis")

Saison 19 (1982) edita

Dotor 5

  • Castrovalva ("Castrovalva")
  • Cuatro ante apocalise ("Four to Doomsday")
  • Cinda ("Kinda")
  • La puni par Dio ("The Visitation")
  • Orcidea negra ("Black Orchid")
  • Xoca de tera ("Earthshock")
  • Vola de tempo ("Time-Flight")

Saison 20 (1983) edita

  • Arco de infinitia ("Arc of Infinity")
  • Dansa serpentin ("Snakedance")
  • Modrin la zombi ("Mawdryn Undead")
  • Stasion final ("Terminus")
  • Lumina ("Enlightenment")
  • La demones de la re ("The King's Demons")
  • La sinco Dotores ("The Five Doctors")

Saison 21 (1984) edita

  • Gerores de la profonda ("Warriors of the Deep")
  • La velia ("The Awakening")
  • Frontios ("Frontios")
  • Revive de la daleces ("Resurrection of the Daleks")
  • Planeta de foco ("Planet of Fire")
  • La cavas de Androzani ("The Caves of Androzani")

Dotor 6

  • La dilema jemelo ("The Twin Dilemma")

Saison 22 (1985) edita

  • Ataca de la siberomes ("Attack of the Cybermen")
  • Venja sur Varos ("Vengeance on Varos")
  • La marca de la Rani ("The Mark of the Rani")
  • La du Dotores ("The Two Doctors")
  • Flajelo de tempo ("Timelash")
  • Revela de la daleces ("Revelation of the Daleks")

Saison 23 (1986) edita

La litiga de un Baron de Tempo ("The Trial of a Time Lord"):

  • La planeta misteriosa ("The Mysterious Planet")
  • Mente pliada ("Mindwarp")
  • Teror de la vervoides ("Terror of the Vervoids")
  • La enemi ultima ("The Ultimate Foe")

Saison 24 (1987) edita

Dotor 7

  • Tempo e la Rani ("Time and the Rani")
  • Tores Paradiso ("Paradise Towers")
  • Delta e la banderores ("Delta and the Bannermen")
  • Foco de dragon ("Dragonfire")

Saison 25 (1988) edita

  • Recorda de la daleces ("Remembrance of the Daleks")
  • La patrulia de felisia ("The Happiness Patrol")
  • Arcenemi arjento ("Silver Nemesis")
  • La plu merveliosa de la galas de galasia ("The Greatest Show in the Galaxy")

Saison 26 (1989) edita

  • Campo de batalia ("Battlefield")
  • Lus fantasmin ("Ghost Light")
  • La maldise de Fenric ("The Curse of Fenric")
  • Survive ("Survival")

Anios de pausa (1990–2004) edita

  • Dimensiones en tempo ("Dimensions in Time") – selebrante la aniversario 30 [ma tan corta e mal scriveda ce on no trata lo aora como un episodio vera]

Dotor 8

  • La filma televisada [nomida "Enemi interna" ("Enemy Within") a veses]

Dotores 9 alternativa

  • La maldise de la mori matante ("The Curse of Fatal Death") – un parodia amante [ma no un episodio vera]
  • Xilia de la xalcas ("Scream of the Shalka") – un nara animada per selebra la aniversario 40

Serie 1 / Saison 27 (2005) edita

Dotor 9

  • Rose ("Rose")
  • La fini de la mundo ("The End of the World")
  • La mores nonreposante ("The Unquiet Dead")
  • Estrateranes de London ("Aliens of London")
  • Gera Mundal Tre ("World War Three")
  • Dalec ("Dalek")
  • La jua longa ("The Long Game")
  • Dia de la padre ("Father's Day")
  • La enfante vacua ("The Empty Child")
  • La Dotor dansa ("The Doctor Dances")
  • Urbe bumante ("Boom Town")
  • Mal lupo ("Bad Wolf")
  • La divide de la vias ("The Parting of the Ways")

Serie 2 / Saison 28 (2006) edita

Dotor 10

  • La invade de natal ("The Christmas Invasion")
  • Tera Nova ("New Earth")
  • Dente e gara ("Tooth and Claw")
  • Reuni de scola ("School Reunion")
  • La xica en la ximineria ("The Girl in the Fireplace")
  • Alti de la siberomes ("Rise of the Cybermen")
  • La eda de aser ("The Age of Steel")
  • La lampa de foles ("The Idiot's Lantern")
  • La planeta nonposible ("The Impossible Planet")
  • La cava de Satan ("The Satan Pit")
  • Ama e monstros ("Love & Monsters")
  • Teme la xica ("Fear Her")
  • Armada de fantasmas ("Army of Ghosts")
  • Apocalise ("Doomsday")

Serie 3 / Saison 29 (2007) edita

  • La fuji de la sposa nova ("The Runaway Bride")
  • Smith e Jones ("Smith and Jones")
  • La sifra de Shakespeare ("The Shakespeare Code")
  • Conjesta sin sorti ("Gridlock")
  • Daleces en Manhattan ("Daleks in Manhattan")
  • Evolui de la daleces ("Evolution of the Daleks")
  • La esperimenta de Lazarus ("The Lazarus Experiment")
  • 42 ("42")
  • Natur umana ("Human Nature")
  • La familia de sangue ("The Family of Blood")
  • Palpebri ("Blink")
  • Utopia ("Utopia")
  • La sona de tambures ("The Sound of Drums")
  • Ultima de la Barones de Tempo ("Last of the Time Lords")

Serie 4 / Saison 30 (2008–09) edita

  • Viaja de la condenadas ("Voyage of the Damned")
  • Criminales asosiada ("Partners in Crime")
  • La focos de Pompeii ("The Fires of Pompeii")
  • Planeta de la eudes ("Planet of the Ood")
  • La stratejia sontaran ("The Sontaran Stratagem")
  • La sielo venenida ("The Poison Sky")
  • La fia de la Dotor ("The Doctor's Daughter")
  • La unicorno e la vespa ("The Unicorn and the Wasp")
  • Silentia en la biblioteca ("Silence in the Library")
  • Foresta de mores ("Forest of the Dead")
  • Medianote ("Midnight")
  • Verje sinistra ("Turn Left")
  • La tera furada ("The Stolen Earth")
  • Fini de viaja ("Journey's End")

Episodios spesial:

  • La Dotor seguente ("The Next Doctor")
  • Planeta de mores ("Planet of the Dead")
  • La acuas de Marte ("The Waters of Mars")
  • La fini de tempo ("The End of Time")

Serie 5 / Saison 31 (2010) edita

Dotor 11

  • La ora des-un ("The Eleventh Hour")
  • La bestia a su ("The Beast Below")
  • Vinse de la daleces ("Victory of the Daleks")
  • La eda de anjeles ("The Time of Angels")
  • Carne e petra ("Flesh and Stone")
  • La vampires de Venezia ("The Vampires of Venice")
  • Amy eleje ("Amy's Choice")
  • La tera fame ("The Hungry Earth")
  • Sangue fria ("Cold Blood")
  • Vincent e la Dotor ("Vincent and the Doctor")
  • La coabitor ("The Lodger")
  • La Pandorica abri ("The Pandorica Opens")
  • La buma grande ("The Big Bang")

Serie 6 / Saison 32 (2011) edita

  • Un canta de natal ("A Christmas Carol")
  • La spasior nonposible ("The Impossible Astronaut")
  • Dia de la luna ("Day of the Moon")
  • La maldise de la manxa negra ("The Curse of the Black Spot")
  • La sposa de la Dotor ("The Doctor's Wife")
  • La carne rebelante ("The Rebel Flesh")
  • Cuasi persones ("The Almost People")
  • Un bon om vade a gera ("A Good Man Goes to War")
  • Ta ce nos mata Hitler ("Let's Kill Hitler")
  • Terores de note ("Night Terrors")
  • La xica ci ia espeta ("The Girl Who Waited")
  • Compleso divin ("The God Complex")
  • Ora de clui ("Closing Time")
  • La sposi de River Song ("The Wedding of River Song")

Serie 7 / Saison 33 (2012–13) edita

  • La Dotor, la vidua e la armario ("The Doctor, the Widow and the Wardrobe")
  • Dementeria de la daleces ("Asylum of the Daleks")
  • Dinosauros en un barcon spasial ("Dinosaurs on a Spaceship")
  • Un vila nomida Compatia ("A Town Called Mercy")
  • La potia de tre ("The Power of Three")
  • La anjeles prende Manhattan ("The Angels Take Manhattan")
  • La omes de neva ("The Snowmen")
  • La campanas de San Joan ("The Bells of Saint John")
  • La anelos de Acaten ("The Rings of Akhaten")
  • Gera fria ("Cold War")
  • Asconde ("Hide")
  • Viaja a la sentro de la TARDIS ("Journey to the Centre of the TARDIS")
  • La teror carmesi ("The Crimson Horror")
  • Malsonia en arjento ("Nightmare in Silver")
  • La nom de la Dotor ("The Name of the Doctor")
  • La dia de la Dotor ("The Day of the Doctor")
  • La tempo de la Dotor ("The Time of the Doctor")

Serie 8 / Saison 34 (2014) edita

Dotor 12

  • Respira profonda ("Deep Breath")
  • En la Dalec ("Into the Dalek")
  • Robot de Sherwood ("Robot of Sherwood")
  • Escuta ("Listen")
  • Fura tra tempo ("Time Heist")
  • La mantenor ("The Caretaker")
  • Mata la luna ("Kill the Moon")
  • Momia en la Orient Express ("Mummy on the Orient Express")
  • Linia plata ("Flatline")
  • En la foresta de la note ("In the Forest of the Night")
  • Acua oscur ("Dark Water")
  • Mori en paradiso ("Death in Heaven")

Serie 9 / Saison 35 (2015) edita

  • Natal final ("Last Christmas")
  • La stajior de la majiste ("The Magician’s Apprentice")
  • La aidor de la sorsoresa ("The Witch’s Familiar")
  • Su la lago ("Under the Lake")
  • Ante la deluvia ("Before the Flood")
  • La xica ci ia mori ("The Girl Who Died")
  • La fem ci ia vive ("The Woman Who Lived")
  • La invade de zigones ("The Zygon Invasion")
  • La inversa de zigones ("The Zygon Inversion")
  • No dormi plu ("Sleep No More")
  • Fronti la corvo ("Face the Raven")
  • Traeda de sielo ("Heaven Sent")
  • Traor de enferno ("Hell Bent")
  • La sposos de River Song ("The Husbands of River Song")
  • La reveni de Dotor Misterio ("The Return of Doctor Mysterio")

Serie 10 / Saison 36 (2017) edita

  • La pilote ("The Pilot")
  • Surie ("Smile")
  • Jelo magra ("Thin Ice")
  • Clac-clac ("Knock Knock")
  • Osijen ("Oxygen")
  • Estremas ("Extremis")
  • La piramide a la fini de la mundo ("The Pyramid at the End of the World")
  • La menti de la mundo ("The Lie of the Land")
  • Imperoresa de Marte ("Empress of Mars")
  • La comores de lus ("The Eaters of Light")
  • Si tera e tempo ta sufisi ("World Enough and Time")
  • La Dotor cade ("The Doctor Falls")
  • Du veses de un ves pasada ("Twice Upon A Time")

Serie 11 / Saison 37 (2018) edita

Dotor 13

  • La fem ci ia cade de la sielo ("The Woman Who Fell to Earth")
  • La monumento fantasmin ("The Ghost Monument")
  • Rosa ("Rosa")
  • Aracnidos en Britan ("Arachnids in the UK")
  • La rompetesta de Tsuranga ("The Tsuranga Conundrum")
  • Demones de Pandjab ("Demons of the Punjab")
  • Kerblam! ("Kerblam!")
  • La xasasorsores ("The Witchfinders")
  • Lo porta nos a via ("It Takes You Away")
  • La batalia de Ranscor Av Colos ("The Battle of Ranskoor Av Kolos")
  • Resolve ("Resolution")

Serie 12 / Saison 38 (2020) edita

  • Spiadas cadente ("Spyfall")
  • Orfan 55 ("Orphan 55")
  • La note de teror de Nikola Tesla ("Nikola Tesla's Night of Terror)
  • Fujor de la Judones ("Fugitive of the Judoon")
  • Praxeus ("Praxeus")
  • Esce tu oia me? ("Can You Hear Me?")
  • La fantasmas de Casa Diodati ("The Haunting of Villa Diodati")
  • Asende de la siberomes ("Ascension of the Cybermen")
  • La enfantes sin tempo ("The Timeless Children")
  • Revolui de la daleces ("Revolution of the Daleks")

Serie 13 / Saison 39 (2021–22) edita

La Malflue ("Flux"):

  • La apocalise a la vijila de tota santas ("The Halloween Apocalypse")
  • Gera de la sontaranes ("War of the Sontarans")
  • A ves pasada sur Tempo ("Once, Upon Time")
  • Vileta de la anjeles ("Village of the Angels")
  • Survivores de la Malflue ("Survivors of the Flux")
  • La vinsores ("The Vanquishers")

Episodios spesial:

  • Vijila de la daleces ("Eve of the Daleks")
  • Lejenda de la diablos de mar ("Legend of the Sea Devils")
  • La potia de la Dotor ("The Power of the Doctor")

Serie 14 / Saison 40 (2023-24) edita

  • La bestia stelal ("The Star Beast")
  • La distantia azul savaje ("Wild Blue Yonder")
  • La rieta ("The Giggle")
  • La eglesa a Strada Rubi ("The Church on Ruby Road")