Eglesa de Jesus Cristo de la Santas de la Dias Ultima

Eglesa de Jesus Cristo de la Santas de la Dias Ultima
Joseph Smith Jr., la fundor de la Move
Informa
Tipo	Cristianisme
Fundor	Joseph Smith Jr.
Gidor	Thomas S. Monson, profeta e presidente
Dio	Dio e Jesus Cristo
Libro santa	Biblia, Libro de Mormon
Nom de la seguores	Mormones
Cuantia de seguores	14.131.467

La Eglesa de Jesus Cristo de la Santas de la Dias Ultima es un reuni relijiosa e cristian, restorada par Joseph Smith Jr. en la stato New York en la anio 1830. Sua fidosas segue la ensenia de Jesus Cristo, ma los no regarda se como parteninte a la tre ramos de cristianisme: (catolicisme, ortodoxisme e protestantisme. Sua crede es un parte de la restora de cristianisme primitiva, car sua seguores crede ce cristianisme ia lasa la crede vera pos la mori de San Petro e otra apostoles.

La ramo la plu grande de la Promove de la Santas de la Dias Ultima ia es gidada par Brigham Young en Teritorio de Utah. Ramos ia apare simultan entre la seguores de Joseph Smith Jr., como per esemplo la Comunia de Cristo, con sua presidentes e reunis. Ance ramos fundaliste ia apare, ma los no es asetada par la Eglesa de Jesus Cristo de la Santas de la Dias Ultima.

En la Statos Unida de America, 60% de la abitores de Utah es mormones. La site capital, Salt Lake City, es ance la sentro relijiosa de la Santas de la Dias Ultima.

Istoria

La revelas de Joseph Smith Jr.

En la anio 1820, en la site Palmyra, stato New York, Joseph Smith ia leje en la Biblia la pasaje seguente: "E si algun de vos ave un manca de sabe, ta ce el demanda per el a Dio, ci dona abundante e sin reproxa a tota, e acel va es donada a el. Ma ta ce sua demanda es con fida e sin duta, car el ci duta es como la onda de la mar, cual es movada par la venta e lansada de un parte a un otra". El ia dise ce pos medita, el ia ave un vide de la sielo de Dio Padre e Jesus Cristo, cual el ia descrive con esta parolas:

Me ia vide un colona de lus, plu briliante ca la sol, direta supra mea testa; e esta lus ia desende gradal asta cuando el resta sur me. Cuando la lus ia es sur me, en la aira supra me, me ia vide du persones, de ci sua cuantia de brilia e de gloria no aseta un descrive. Un de los ia parla a me, nominte me con mea nom, e el ia dise, mostrante la otra: Esta es mea enfante amada: Ta ce tu escuta el!

Esta alusina, conoseda como la Vide Prima, ia dise a Smith ce no eglesa ia es aprobada par Dio. Tota de los ia cambia ja la instruis de Jesus, e sua debe va es restora la eglesa vera de Cristo.

A 21 setembre 1823, Smith ia esperia un otra revela: un anjel ia dise ce en un colina, multe prosima a Palmyra, on ave manoscritos sur placas de oro, do on ia scrive la nara de la profetas ci ia abita en America antica. Smith ia tradui en engles la testos con aida de Urim e Tumim.

Pos publici la Libro de Mormon, Joseph Smith ia comensa la taxe de difusa la relijio nova, e ia institui la Eglesia de Jesus Cristo de la Santa de la Dias Ultima. Sua disposa, diferente de lo de la eglesas cristian de la epoca, ia rejeta los e par causa de la persegue sufrida par la prima Santos de la Dias Ultima, Joseph Smith ia vade con sua seguores a la stato de Ohio, do como en Missouri, colonias mormon ia apare.

Teolojia

Dio

La Eglesa de Jesus Cristo de la Santa de la Dias Ultima instrui ce Dio es la Padre Eterna de umanas, ce Jesus Cristo es la fio de Dio e composa la Trinia con la Spirito Santa.

La Eglesa ensenia ance ce Dio es un esente glorida, con corpo palpable como Jesus Cristo, e ce la omes es simil en aspeta e imaje a Dio, como la fio es como la padre.

Jesus Cristo

Como sua nom indica, la Eglesa reconose Jesus Cristo como la salvor de la umania, e ance un divin.

Nefi, un profeta de la Libro de Mormon, ia dise:

E nos parla de Cristo, nos joia en Cristo, nos predica de Cristo, nos predise de Cristo e nos scrive seguente nos predises, afin nos filios va sabe a cual fonte los ta vade per la remete de sua pecas.

Scrivedas santa

Joseph Smith ia instrui ce la cuantia de libros santa no ia es completa e ce Dio continua revela cosas santa a umanas. La Eglesa aseta otra libros santa e revelas cual completi e clari la Biblia. Dio pote dona revelas a la presidentes de la Eglesa en la presente e revelas personal a cualce person con fida en Cristo en cualce loca.

Biblia

Tota la Santas de la Dias Ultima aseta la Biblia como scriveda santa, e crede ce sua predises es vera ma ce alga partes de la tradui de la Biblia es noncompleta.

Libro de Mormon

Esta es un volum de scrivedas santa, simil en intende e teolojia a la Biblia, e es regardada como la libro la plu coreta sur la tera, e la clave de sua relijio. Lo es un istoria de la comunica de Dio con la abitores antica de America. La nara comensa a 600 anios aec cuando la Senior ia comanda la profeta Lehi a sorti de Ieruxalim con sua familia, e los ia es gidada a la tera prometeda: America. Pos Lehi, la Senior ia clama otra profetas: Nefi, Mosiah, Helaman, etc. Esta libro parla de la mision de Jesus Cristo como la Biblia.