Engles african-american

Engles african american ("EAA") es un dialeto de engles nativa parlada par la plu de african-americanes (e alga african-canadianes), spesial los en la clases media e laborante, e en comunias urban. La plu de parlores es ance esperta en engles prescriveda.

Un parte grande de EAA es compartida en sua gramatica e fonolojia par dialetos rural de la SUA sude, la resulta de la lias istorial. An si EAA sembla alga creoles engles, EAA es clar un dialeto engles, con sua orijinas en la dialetos nonprescriveda de colonistes temprana en la SUA sude. Lo es la resulta de un diverje de engles prescriveda, e no de un descreoli de un creol american.

En la pasada, alga linguistes ia sujesta ce EAA es un engles multe influeda par linguas african. Linguistes moderna no acorda. Vera, no multe parolas o puntos gramatical deriva de la linguas orijinal de sclavos; EAA deriva plu de la parla de la servores obligada de Britan e Er cual labora con la sclavos.

Pronunsia

La asentua es comun moveda a la silaba prima. Per esemplo, "police", "guitar", e "Detroit" es pronunsiada con asentua inisial en loca de final, un abitua ance comun en la SUA sude.

Alga diftongos deveni monoftongos: la diftongo /aɪ/ deveni /aː/ (estra ante consonantes sin vose), como en la plu de dialetos sude. Ance, /ɔɪ/ deveni comun /ɔ/ spesial ante /l/ (pe "boil" es pronunsiada como "ball").

A la comensa de un parola, /ð/ deveni comun /d/ (pe "this" deveni "dis").

La sufisa -ing, pronunsiada normal como /ɪŋ/, deveni /ɪn/. Esta es comun en multe otra dialetos engles.

Un grupo de consonantes final cual es simil en vose e loca de la lingua es comun reduida par cade la consonante final. Pe, "hand" es pronunsiada "han", "test" es "tes", etc. La grupos /ft/ e /md/ es ance afetada ("soft" deveni "sof", etc). Final /sp/, /st/, e /sk/ deveni comun /s/ ("cost" deveni "cos", etc).

Alga grupos de consonantes es metateseda: "ask" deveni "aks", etc.

Jeneral, /r/ es cadeda cuando no segueda par un vocal (pd EAA es nonrotica), como en multe dialetos de England o de SUA sude. A veses, un nonasentuada /ə/ segue la vocal presedente, o la vocal es longida. Ance, /l/ es comun vocalida en un modo simil: parolas como "fault" deveni la mesma como "fought". A veses, la vocal ante la /l/ es longida o segueda par un /ɤ/.

"Fonolojia profonda"

Alga formas de fonolojia es usada en un varia plu "basa" (plu diferente de engles prescriveda ca EAA comun, usada per esajera la dialeto, a veses per efetos comica o per mostra autofida):

La basi de /ɪ/ ante /ŋ/ (ma no en -ing), afin "thing" sona plu como "thang".

La pronunsia de /θ/ como /f/ e /ð/ como /v/ a la media o fini de un parola, pe "mouth" deveni "mawf", "smooth" deveni "smoov". Nota ce esta es ance trovada en alga dialetos de London, pe "Luther" deveni "loofah".

La monoftongi de tota avenis de /aɪ/ a /a:/, tal ce "rice" sona como "rahs".

La diftongi de /ɪ/ a /iə/, afin "win" sona como "wee-un" (~wi-an)

La sentri e longi de la vocal /ʌ/ a /ɜː/ o /əː/, en parolas como "strut", "mud", "tough", etc.

Gramatica

EAA usa modos variante per espresa tempo, modo, e aspeta de verbos:

Pasada	I did buy it	"me ia compra"
Presente	I be buying it	"me compra lo", "me es comprante lo"
Futur	I gonna buy it	"me va compra lo", "me vade per compra lo"

La usa de be ("es") indica ce la verbo es abitual. En otra dialetos, lo es espresada con averbos como usually ("abitual")

Alga esemplos de formas de aspetas:

Aspeta abitual o comun	He be working Tuesdays	"el labora a mardis (abitual o frecuente)"
Aspeta perfeta e continuante	He been working	"el ia es laborante"

Negas es formida diferente de la plu de otra dialetos de engles:

EAA usa "ain't" como un indica de nega jeneral, en loca de "am not", "isn't", "aren't", "haven't" e "hasn't". Lo es ance usada par alga parlores en loca de "don't", doesn't", o "didn't". Per esemplo, "He ain't come" en loca de "He hasn't come" ("el no ia veni").

EAA permete negas duplida, como "I didn't go nowhere" (leteral "me no vade a no loca"), "Don't nobody know" (leteral "no nun sabe").

La copula ("es") en la tempo presente es comun cadeda, como en rusce, ivri, arabi, e otra linguas. Per esemplo, on pote dise "You crazy" (leteral "tu loco") o "She my sister" (leteral "el mea sore"). Ma si la copula es asentuada, lo no es cadeda: "Yes, she is my sister" ("si, el es mea sore").

Verbos no es cambiada per cuantia e person: On no ave un fini -s en la person tre de la presente singular. Per esemplo: "She write poetry" en loca de "She writes poetry" ("el scrive poesias").

En demandas, la ordina de parolas no es inversada: "Why they ain't growing" en loca de "Why aren't they growing" ("perce los no crese?"). Donce EAA no nesesa la verbo aidante "do" como en "Who she think she is?" en loca de "Who does she think she is?" ("ci el pensa ce el es?").

"Them" ("los") es comun usada en loca de "these" ("estas") e "those" ("aceles")

Vocabulo

EAA comparti la plu de sua vocabulo con otra varias de engles, spesial los de dialetos sude e nonformal. Per esemplo, EAA usa "y'all", como en la SUA sude jeneral. Ma un parte peti de EAA orijina en linguas de Africa ueste (an si la etimolojia es a veses difisil construida). Per esemplo, "gumbo", "goober", "yam", e "banjo" es orijinal de Africa, e es aora un parte de engles american jeneral.

EAA ave ance alga parolas cual no es un parte de engles prescriveda, o cual ave sinifias clar diferente. Per esemplo, per refere a persones blanca, EAA usa "gray" ("gris") como un ajetivo, posible de la color de la uniformas de la soldatos confederada, e "paddy", un estende de la usa jergal per "eres" (de la nom "Patrick"). "Ofay" es un parola despetante per blancas, e deriva posible de la parola ibibio afia (pal), de ioruba ofe ("nonvidable"), o de la latina de porcos per "foe" ("enemi").

Otra esemplos: "kitchen" ("cosina") usada per capeles multe risada a la nuca; "siditty" o "seddity" per 'clasiste" o "burjes". EAA ia contribui multe parolas e espresa a otra varias de engles, pe "chill out" ("calmi se"), "main squeeze" ("amor xef"), "soul" ("musica sol"), "funky" ("funcosa"), "threads" ("filos", per "vestes"), etc.

Malconsetis

Malconsetis sur EAA ia es comun e ia es usada en un modo despetante. Un tal mito es ce EAA es no plu ca engles "stupida" o "noneducada". Ma EAA, como tota dialetos, ave un lojica interna coerente e un complica gramatical, e es natural usada par sua parlores per espresa avenis e ideas. Posible car otras pensa ce EAA es inferior, la plu de parlores es bidialetal, pd pote parla en un engles plu asetable a otras. La capasia per cambia dialeto rapida en ambientes diferente es nomida "cambia de codigo" (de engles "code-switching"). Ma, con ce plu persones estra la comunia african-american deveni min raziste, o joia la musica per cual la african-americanes merita multe reconose, plu e plu persones ia adota partes de EAA, o a min reconose e valua la dialeto.