Eritema infetosa

Eritema infetosa es un de la maladias de enfantes cual causa erutas de la pel. Lo comensa con un febre, dole de testo, la eruta, e sintomes simil a cataro. Esta sintomes pasa; alga dias plu, la eruta reapare. La eruta es roja briliante e apare plu comun en la fas, spesial la jena. A veses, la eruta ta estende entre la oios sur la nas o sirca la buco. En ajunta a esta sintomes, enfantes comun developa un eruta roja e dentelin a la resta de la corpo, spesial la brasos alta, la tronco, e la gamas. La eruta dura tipal alga dias e pote pruri; alga casos ia aveni cual dura alga semanas. Pasientes es comun no plu infetosa cuando la eruta ia desapare.

Un enfante con eritema infetosa

Adolesente e adultes pote ave un artrite autolimitada. Lo mostra se con infla dolente de la juntas cual senti simil a artrite. Pasientes pote trova difisil la pasea e la curva sua juntas como polso, jenos, talos, ditos, e spalas.

La maladia es tipal no estrema, ma en alga grupos con riscas, lo pote ave seguentes seria:

• Per femes ensinta, infeta en la trimense ia es liada a hidropsia fetal, cual causa aborta natural spontan.
• En persones con anemia de selulas falxetin o otra formas de anemia hemolitica como sferositose erital, infeta pote causa un crise aplastica.
• Los ci es imunodebilia par VIU o sido, pote risca complicas si esposada.

Eritema infetosa es xef transmeteda par secretes de respira (saliva, muco, etc), ma pote es ance sperdeda par contata con sangue infetada. La periodo de incuba (entre la infeta prima e la comensa de sintomes) es tipal entre cuatro e 21 dias. Persones con la maladia es la plu infetosa ante la comensa de sintomes. Tipal, enfantes en scola, atendores de enfantes, enseniores, e jenitores es la plu probable esposada a la virus. Cuando sintomes es evidente, la risca de transmete es peti; donce persones sintomosa no nesesa es isolada.

Trata de eritema infetosa es normal suportante, car la infeta es comun autolimitante. Antifebrales es comun usada.