Estingui de la cretasica-paleojen
La estingui de la cretasica-paleojen (cortida a kpg) ia es un estingui subita e masosa de tre cuadris de la spesies de plantas e animales sur tera, sirca 66 milion anios ante aora (maa). Con la eseta de alga spesies ectotermal como la tortuga luto e crocodiles, no tetrapodos pesante plu ca 25 kg ia survive. Lo ia marca la fini de la periodo cretasica, e donce la fini de tota la era mesozoica, e abrinte la era senozoica cual continua oji.
En la arcivo jeolojial, la aveni es marcada par un strato magra de deponeda nomida la borda kpg, cual pote es trovada tra la mundo en rocas maral e teral. La arjila de la borda mostra grados alta de la metal iridio, cual es rara en la crosta de tera, ma abundante en asteroides.
Proposada orijinal en 1980 par un ecipo de siensistes conduida par Luis Alvarez e sua fio Walter Alvarez, lo es aora jeneral pensada ce la estingui de kpg ia es causada par la colide con un asteroide masosa de 10 a 15 km larga 66 milion anios ante aora (maa), cual ia ruina la ambiente global, xef tra un inverno global de la colide durante cual ia para fotosintese en plantas e plancton. La ipotese ia es suportada par la descovre de la 180 km crater Chicxulub en la Penisola Yucatan e la Golfo de Mexico, cual ia dona confirma ce la arjila de la kpg borda representa la detrito de un colide par un asteroide.
Un projeta de 2016 de fora en la anelo alta de la crater ia afirma ce la anelo ia es composada de granito ejetada de profonda en la tera, en minutos pos la colpa, ma ia conteni cuasi no jeso, la roca tipal de la fondo de la mar, cual conteni sulfato, en la rejion. La jeso ia es vaporida e sperdeda como un airosol en la atmosfera, causante efetos durante a la clima e la cadena de nuri. En Otobre 2019, rexercores ia reporta ce la aveni ia asidi rapida la mares, produinte un colasa ecolojial e, en esta modo ance, ia produi efetos durante sur la clima, e donce ia es la razona clavin per la estingui kpg. En janero 2020, siensistes ia reporta sur indicas nova ce la aveni ia es plu un resulta de la colide con la asteroide, e no de la ativia de volcanes. Otra avenis cual ia pote contribui a la aveni es la trapas de Decan e otra erutas de volcanes, cambia de la clima, e cambia de la nivel de mar.
Multe spesies ia mori en la estingui kpg, la plu bon conoseda es la dinosauros, estra la avias. Lo ia destrui ance miliones de otra organisme teran, incluinte alga mamales, pterosauros, avias, lezardos, insetos, e plantas. En la mares, la aveni ia mata plesiosauros e mosasauros, e ia ruina pexes teleosto, selacos, moluscos (spesial amonitos, cual deveni estinguida), e multe spesies de plancton. Lo es estimada ce 75% o plu de spesies sur tera ia desapare. Ma la estingui ia furni oportunias per evolui: Multe grupos ia esperia radias ajustante notable - diverjes subita e produosa a formas e spesies nova en la nixes ecolojial turbada e vacuida. Mamales, spesial, ia diversi multe en la paleojen, developante formas nova como cavalos, balenas, ciroteros, e primates. Avias, pexes, e lezardos ia radia ance.