Cretasica

La periodo cretasica es un periodo e sistem jeolojial cual ia estende 79 milion anios de la fini de la periodo jurasica 145 milion anios ante aora (aa) a la comensa de la periodo paleojen 66 milion aa. Lo es la periodo final de la era mesozoica, e la periodo la plu longa de la eon fanerozoica. La cretasica es comun cortida como K, per la deutx Kreide ("creta").

Un mapa de Tera 200 milion anios ante aora

(Vide Scala de edas jeolojial per detalias)

La cretasica ia es un periodo con un clima relativa calda, cual resulta en niveles de mar alta cual crea mares interna e basa. Esta mares ia es poplida con retiles maral aora estinguida, en cuando la dinosauros ia continua domina sur tera. En esta periodo, grupos nova de mamales e avias, e ance plantas florinte, ia apare.

La cretasica (con la mesozoic intera) ia fini con la estingui de la cretasica-paleojen, un estingui masosa en cual multe grupos, incluinte dinosauros nonavial, pterosauros, e retiles maral grande ia mori. La fini de la cretasica es definida per esta aveni, cortida a la borda K-Pg.

Plantas

An si la esemplos de arbores con folias e erbas vera ia comensa en la cretasica, coniferes como araucaria continua sua domina (asi araucaria moderna en Txile)

Plantas con flores (pd anjiospermas) ia sperde en esta periodo, ma no ia deveni dominante asta la fini de la periodo. Sua evolui ia es aidada par la aveni de abeas. Vera, la developa de anjiospermas e insetos es un bon esemplo de coevolui. La esemplos prima de alga arbores con folias - pe figos, platanes, e magnolias - ia apare en la cretasica.

A la mesma tempo, alga gimnospermas mesozoica plu temprana ia continua flor, e araucarias e otra coniferes ia es spesial comun e vasta sperdeda. Alga ordinas de filises, como la glecenialas, ia apare tan temprana en la arcivo de fosiles como la cretasica, e ia ateni un distribui vasta temprana. Gimnosperma grupos como la benetitalas e hirmerielas ia mori ante la fini de la periodo.

Animales teran

Sur teran, mamales ia es jeneral peti, ma ia es un composante sinifiante, con plu simolodontes ca dinosauros en alga areas. Marsupiales e plasentales no esiste alora asta la fini de la periodo, ma un varia de metaterios nonmarsupial e euterios nonplasental ia comensa diversi grande, como carnivores (pe deltateridos), forajores acual (pe stagodontidos), e erbivores (showalterios, zhelestidos). Grupos "antica" variosa como la eutriconodones ia es comun en la cretasica temprana, ma per la cretasica tarda, mamales norde ia es dominada par multituberculatos e terios, con driolestoidos dominante en America Sude.

Xasores alta ia es retiles arcosaural, spesial dinosauros, cual ia es a sua punto la plu diversa. Pterosauros ia es comun en la cretasica temprana e media, ma, per razonas no vera comprende, per la fini de la periodo, sola du familias multe spesialida ia resta. En la pasada, siensistes ia pensa ce sua declina ia es causada par la crese de avias, ma aora, lo pare ce lo es noncoreta.

Un area en Liaoning en Xina es un tesoro de restas de tipos variosa de dinosauros peti, avias, e mamales, cual dona un vista de vive en la cretasica temprana. La selurosauros de la grupo maniraptor trovada ala es plu prosima a la avias ca otra dinosauros, e es notable per la presente de plumas capelin.

Insetos ia diversi en la cretasica, e la formas la plu vea de formicas, termites, e alga lepidopteros (familia de papilios) ia apare. Ance afidos, locustas solitar, e sinipidos (un tipo de vespa) ia apare ance.

• 
  Tiranosauro, un de la xasores teran la plu grande de tota tempo ia vive en la cretasica tarda.
• 
  asta 2 m longa e 0.5 m alta a la anca, velosiraptores ia ave plumas e vive en la cretasica tarda.
• 
  Triseratopos es un de la jeneral la plu reconosable de la cretasica.
• 
  Un pterosauro, Anhanguera piscator
• 
  Confusiusornis, un jenera de avias de la grandia de corvos, ia es de la cretasica temprana.
• 
  Ictiornis ia es un orniterio simil a un avia de mar con dentes de la cretasica tarda

Animales de mar

En la mares, raias, selacos moderna, e teleostos ia deveni comun. Retiles maral ia inclui ictiosauros en la cretasica temprana e media (estinguida en la fini de la cretasica), plesiosauros tra la mundo intera, e mosasauros aparente en la cretasica tarda.

Baculitos, un jenera de amonito con un conca reta, ia flori en la mares con bivalvos cual construi resifes. La hesperornitiformos, avias nonvolante tufante, ia nada como grebes. Globotruncanido foraminifera e ecinodermatos como erisos de mar e stelas de mar ia flori. La prima estende de diatomeas (con cascas de silica, en loca de creta) e la mares ia aveni en la cretasica; diatomeas de acua dulse no va apare asta la miosene. La cretasica ia es ance importante per la developa de bioerode, la produi de foras e raspas en rocas e concas.

• 
  Un vista de la cretasica temprana: un woolungasauro es atacada par un cronosauro.
• 
  Tilosauro ia es un mosasauro grande, un retil carnivor cual comensa en la cretasica tarda.
• 
  Un avia de la acua con dentes ia es un bon nador en la mares de la cretaseo tarda.
• 
  Un amonito de Mississippi de la cretasica tarda.
• 
  Un plata con esemplos de nematonoto e pseudostaco de Lubnan.
• 
  Un cretoxirino, un de la selacos la plu grande de la periodo, atacante un perandon en America Norde.