La jurasica es un sistem e periodo jeolojial cual ia estende 56 milion anios de la fini de la periodo triasica 201 milion anios ante aora (aa) a la comensa de la periodo cretasica 145 milion aa. Lo es la periodo media de la era mesozoica, ance conoseda como la eda de retiles. La comensa de la periodo ia es marcada par la estingui triasica-jurasica. Du otra estinguis min grande ia aveni en la periodo.

Un mapa de Tera en la periodo jurasica
Plesiosauros
Un vista de la jurasica temprana

(Vide Scala de edas jeolojial per detalias)

La jurasica es nomida per la Montes Jura en la Alpes de Europa, do la stratos de calcario de la periodo ia es prima identifiada. Per la comensa de la jurasica, la supracontinente Pangea ia comensa fende entre du partes: Laurasia a a norde e Gonduana a la sude. Esta ia crea plu costas e move la clima de seca a umida, e multe de la desertos de la triasica ia es recombinada par forestas pluvosa.

A tera, la animales ia cambia de la formas triasica, dominada par arcosauros - dinosauromorfos e crocodilomorfos - a formas dominada par sola la dinosauros. La avias prima ia ance apare en la jurasica, evoluida de un ramo de la dinosauros teropodo. Otra avenis major ia inclui la apare de la lezardos plu temprana, e la evolui de la mamales, incluinte plasentales primitiva. Crocodiles ia move de un modo de vive teran a un modo acual. La mares ia es abitada par retiles maral como ictiosauros e plesiosauros, e pterosauros ia domina la aira.

En la periodo jurasica temprana, la supracontinente Pangea ia rompe en la du supracontinentes, Laurasia e Gonduana. La Golfo de Mexico ia abri en un fende entre America Norde e la area aora de la penisola Yucatan. La Mar Atlantica norde ia es relativa streta, e la Atlantica sude no ia abri asta la seguente periodo, la cretasica, cuando Gonduana mesma ia fende. La Mar Tetis ia clui, e la basin Neotetis ia apare. Climas ia es calda, con no indica de glasias. Como en la triasica, on ia ave no tera supra cualce polo, e no glasia polal ia esiste.

Animales de mares edita

En la periodo jurasica, la vertebratos xef ci ia vive en la mares ia es pexes e retiles maral. La retiles ia inclui ictiosauros, cual ia es a sua culmina de diversia, plesiosauros, pliosauros, e crocodiles maral de la familias teleosaurido e metriorincido. Multe tortugas ia abita la rios e lagos.

En la mundo de invertebratos, alga grupos nova ia apare, incluinte rudistos (un varia de bivalves cual formi [resife]]s) e belemnitos. Sabelidos calcosa ia apare en la jurasica temprana. La jurasica ia ave ance comunias diversa de sclerobiontos, e un crese sinifiante de bioerode de concas e rocas. Spesial comun ia es la gastrocenolitos.

En la periodo, sirca 4 o 5 de la 12 clados de planctones cual esiste en la arcivo de fosiles ia esperia un radia enorme de evolui o apare per la tempo prima.

Animales teran edita

Sur la tera, retiles variosa resta dominante. La jurasica ia es un eda oro per la dinosauros erbivor grande nomida la sauropodos - camarasauros, apatosauros, diplodocos, braciosauros, etc - cual vaga la tera tarda en la periodo. Sua areas per foraje ia es o prados de filises, sicadas palmin e benetitalas, e la coniferes plu alta. La dinosauros erbivor ornitiscian (pd con ancas como lezardos) plu peti, como la stegosauros e ornitopodos peti ia es min dominante, ma ave roles importante. Los ia es preda per la teropodos grande, como la seratosauros, megalosauros, torvosauros, e alosauros. Tota de estas parteni a la ramo sauriscian (pd con ancas como lezardos) de dinosauros.

En la jurasica tarda, la volantes prima, como arceopterix, ia evolui de selurosauros peti. En la aira, pterosuaros ia es comun. Su la arbores ia es tipos variosa de mamales temprana, e tritilodontes, sfenodontes, e lisamfibios temprana. La resta de la lisamfibios ia evolui en esta periodo, introduinte la salamandros e sesilidos prima.

Plantas edita

La situa continental e seca de la triasica ia redui en la jurasica, spesial a latitudes alta; la clima calda e umida ia permete ce junglas rica pote covre multe de la vista. Gimnospermas ia es relativa diversa en la periodo. La coniferes ia domina la plantas, como en la triasica, e ia es la grupo la plu diversa ia composa la majoria de arbores grande.

Coniferes cual flori en la jurasica ia inclui araucariaseas, sefalotaxaseas, pinaseas, podocarpaseas, taxaseas, e taxodiaseas. La familia de coniferes estinguida de la mesozoica - cerolepidiaseas - dominada la latitudes basa, con la benetitalas. Sicadas, simil a palmas, ia es ance comun, con gincos e filises grande en la forestas. Filiases plu peti ia domina probable la subosces. Filises semosa ia es un otra grupo importante, e ia es la grandia de arboretas e arbores peti. Gincos ia es spesial comun en latitudes norde media a alta. En la emisfera sude, podocarpes ia es spesia comun, ma ginkos e czekanowskialas ia es rara.

En la mares, alges coralin moderna ia apare per la tempo prima. Ma los ia es un parte de un otra estingui major cual ia aveni en la periodo seguente.