Fenomeno de Raynaud

La fenomeno de Raynaud (pronunsiada "renó", ance conoseda como "sindrom de Raynaud") es un problem medical en cual spasmas de la arterias causa episodios de flue reduida de sangue. Tipal, la ditos e min comun la urteos es envolveda. Rara, la nas, oreas, o labias es afetada. La episodios resulta en la parte afetada deveninte blanca e alora blu. Comun, on ave nonsensosia o dole. Cuando la flue de sangue reveni, la area deveni roja e ardente. La episodios dura tipal minutos, ma pote dura asta alga oras.

La fenomeno de Raynaud sur la mano de un fem

Episodios es comun ativida par fria o stresa emosial. On ave du tipos: tipo prima, en cual la causa no es conoseda, e tipo du, cual aveni como la resulta de un otra problem, como un maladia de la texedas juntante, como scleroderma o lupus, dana a la manos, vibra continuante, fuma, problemes de la tiroide, e alga medicas, como contraconsepis. Diagnose es tipal fundida sur la sintomes.

La trata prima es evita la fria. Otra modos inclui la descontinua de la usa de nicotina o stimulantes. Medicas per trata de casos cual no boni inclui blocinte de canales de calsio e iloprost. Poca evidente suporta medica alternativa. Rara, casos sever pote es complicada par ulseras o gangrena.

Sirca 4% de persones ave la sindrom La comensa de la tipo prima es tipal entre 15 e 30 anios de eda, e aveni plu comun en femas. La tipo du tipal afeta persones plu vea. Ambos tipos es plu comun en climas fria. La sindrom es nomida per la dotor medica franses, Maurice Raynaud, ci ia descrive la sindrom en 1862.