Filosofia de la renase

Pos la eda medieval, la situa en Europa ia deveni plu bon: la economia ia boni; on ave un reveni a construi, catedrales, universias, sites; un reveni a "lusosia", como paper, teatro, musica, la artes jeneral; un reveni a inventa, como la busola, primi; un reveni a esplora - Africa, America, la Pasifica. Lo ia es la renase, cual on dati, aprosima, de 1400 a 1600. La eda ia es enerjiosa, interesante, e perilosa.

La aristocratas ia gania la potia supra la monarcias avietin e an la mano sever de la eglesa, a min per la momento. Donce, on ave colies grande de esta persones de la clase alta, comun rica, e amante de la idea de se mesma. Pensores, relijiosa e secular, ia es librida, a un grado, de la autoria sentral e potiosa de la eglesa, per crea sua propre filosofias relijiosa - a veses razonante e a veses tota nonrazonante. E mercatores ia descovre ce mone pote compra cuasi tota cosas, incluinte la respeta tradisional cual la aristocratas ia reseta. Vera, un titulo aristocrata e la ricia de un mercator ia es un combina perfeta per un bon sposi.

Esta aristocratas e mercatores ia crede ce umania pote es perfetable: Nos pote deveni umanas plu bon. Plu importante, nos pote deveni plu potiosa e rica - plu aristocrata. Multe atende ia es mostrada a la gol de condui se como un cavalero o dama, como refletada, per esemplo, en la libro gidante per condui sofisticada par Baldesar Castiglione, La libro de la person de la corte.

Esta popla ia es pratical, interesada par avenis real e persones real en la mundo real. Los ia es individualiste e competosa, e tipal ia crede en la idea ce la mundo es un caso de "can come can", e los ia gusta sua politica e ia gusta jua bruta.

Ma, los ia es ance anti-inteleto e an orgulosa en sua nonsabe. Los ia tende vide la eruditas como seca e nonpratical, ci pote posible predise eclises, ma no ia pote probable lia sua propre sapatos, e serta no capas de gania ricas o maneja proprias.

E los ia es superstisiosa, spiritiste, fasinada par astrolojia, Egipe antica, la cabala, alcimica, majia - sua varia de nosa promove de la "eda nova".

Du avenis spesial es representante de la renase: La prima ia es primi. Johann Gutenberg (sirca 1400-1467) de Mainz ia inventa la primador e tipo movable, e alora primida, en 1455, la Biblia de Gutenberg.

La aveni du ia es la descovre de la "mundo nova", cual ia sinifia cuantias grande de oro e arjento e un economia internasional ensendeda, e un modo de evade par los no felis con la vive en Europa - cual alga deutxes ia nomi "lebensraum" - spasio per vive). Esta es comun atribuida a Cristoforo Colombo (1451-1506), ma incluinte tota de la esplorores (o esplotores) no ia studia en scola.

Umanisme

Erasmus, par Holbein

Niccolo Machiavelli

Un otra aspeta de la renase ia es umanisme, cual sinifia un interesa en o foca sur umanas e sua bonstate, asi e aora, e no en Dio la la vive pos mori, o la ativias de santas e eroes de la biblia de anios pasada. Petrarch (1304-1374), per esemplo, ia scrive istoria con un asentua sur personalia, e es comun videda como la umaniste prima, a min pos la filosofistes de antica.

On ave alga filosofistes en la renase temprana ci ia espresa esta idea de umanisme plu clar. Giovanni Pico della Mirandola (1463-1494), per esemplo, ia crede ce la filosofistes (per dise, Plato e Aristotele) e cristiania acorda a la funda. El ia debate per un vole libre e ia vide umania como un lia entre la mundo fisical e la mundo spirital.

Desiderius Erasmus de Rotterdam (1467-1536) ia recomenda un compromete entre fida e umanisme, e ia atenta preveni la esedes de la reformi par la catolicas e la protestantes ambos. Un credor forte en vole libre, el ia scrive contra la conseta de geras justa, e ia demanda de sua lejores per eserse tolera, compata, e jentilia.

Thomas More (1478-1535), un ami de Erasmus e canselor per la re malfamosa, Henry 8, ia scrive un nara nomida Utopia, en cual el ia descrive un sosia perfeta multe simil a la compromete par Erasmus entre fide e umanisme. Cuando el ia refusa reconose sua re como la xef de la eglesa engles (e no la pape en Roma), esta re Henry 8 ia comanda la destesta de Thomas. La eglesa catolica ia crea el como un santa, alora.

Niccolo Machiavelli (1460-1527) ia ave un vista diferente ca esta filosofistes - ma ancora umaniste. El ia scrive de politica bruta en un libro nomida La prinse en 1513. Sua reputa ia deveni tan negativa ce "Nico Vea" (de "Niccolo") ia deveni un nometa per la diablo mesma. Ma poca persones ia reconose ce el ia segue "La prinse" con La discute, en cual el discute democratia como la sistem cual el ta prefere. Algas crede ce el merita la titulo de la psicolojiste sosial prima.

E esta ia es spesial la eda de artistes e autores. Entre la artistes ia es Leonardo DaVinci (1452-1519) e Michelangelo (1475-1564) en Italia, e Albrecht Dürer (1471-1528) en Deutxland. Plu tarde en la renase, on ia ave El Greco (1541-1614) en Espania e Rembrandt van Rijn (1606-1669) en Nederland. Entre la scrivores, on ia ave Montaigne (1533-1592) en Frans, Cervantes (1547-1616) en Espania, e William Shakespeare (1564-1616) en England. On ia ave multe otras.

La reformi

En la eda medieval, la autoria ultima ia es clar la Dio, e la pape ia es sua parlador. Eresia ia es comun, natural, ma esclui e prisoni moncal ia es la punis major. Alora, en 1215, ia veni la incuisisio, e eresia ia deveni punable par mori. Espania spesial ia es un pais de estremistes relijiosa. Torquemada, la incuisisior grande de Espania de 1483 a 1498, ia fa famosa la incuisisio espaniol.

Martin Luther (1483-1546) cloida sua 95 teses (punto de nonacorda con la modo en cual la eglesa ia es conduinte se) sur la porte de la eglesa de la castel de Wittemburg. Sua teses focada sur la vende de favores - documentos cual escusa pecas - par le eglesa, e ia nega la primia de la pape. El ia asentua la idea ce nos es naseda como pecores (un erita de la peca orijinal de Adam e Eva), la asentia de vole libre, e nosa nesesa asoluta per la pardona de la Dio. Luther ia traduida la biblia a deutx, e sua dialeto de deutx ia deveni la funda de la deutx de educa e leteratur asta aora. El ia scrive ance alga sujestas multe negativa condenante la povres e la iudis.

Martin Luther, par Cranach

Re Henry 8 de England, 1491

Jean Calvin (1509-1564) de Frans norde, ia deveni protestante e ia es forsada per fuji a Suiz. Ala, el ia predica obedi sin restrinje a Dio e la prinsipe de predestina, cual dise ce, car Dio es omnisiente, el sabe ja ci ta vade a sielo e ci ta vade a enferno. Par gania potia politica en ajunta a potia spirital, el ia rena la site de Geneva como un tirania, simil a alga tiranos relijiosa de oji: No alcol, no dansa, no aposta; no icones, no candelas, no insenso en la eglesas; atende obligada de eglesa per tota. El ia condena la unitarian espaniol Michael Servetus, ci ia veni a Calvin per proteje, per arde a la palo per eresia. (Un unitarian es algun ci no crede en la trinia - la eresia la plu mal; an oji, la eglesas protestante de la SUA no aseta unitarianes como cristianes, an ce la fato ce la trinia no es notada a cualce loca en la biblia.)

La re Henry 8 ia rena England de 1509 a 1547. Car el ia ave difisiles consepi un eritor, el ia divorsa (e esecuta) un sposa pos un otra. La problem, natural, no pote es en la corpo de la re! Cuando la pape refusa ofre un divorsa fasil de Caterina de Aragon, el ia declara se mesma como la testa de la eglesa engles e ia prende tota propria moncal per sua tesoreria. Ma la prinsipes de sua eglesa resta, per la plu parte, catolica. An si videda como protestante, la eglesa engles e sua fie, la eglesa episcopalian, manteni bon relatas con la eglesa catolica a oji.

A la otra lado, Filipe 2 de Espania (renada 1556-1598) ia desira restora catolicisme a sua gloria presedente. Sua politica nasional ia es composada de coraji la incuisisio - cual ia resulta en la arde en masas de ereses e opresa sever de la moros e iudis restante en Espania.

Felipe ia es spesial iritada par la gera per autonomia, conduida par protestantes, de Nederland de Espania. Elizabeth 1 de England (renada 1558-1603), ci el ia cortea, secreta corajida piratia contra la flotilas espaniol, cual ia es portante montes de arjento de la mundo nova. La enemia ia culmina en la destrui de sua Armada Grande en 1588.

La reformi ia condui la eglesa catolica per reformi se, ma no ante mata un cuantia grande de protestantes per eresia. E la protestantes ia mata ance catolicas e otra protestantes (protestantes ia formi nunca un corpo acordante). Catolica o protestante, esta no ia es bon dias per relijio.

Siensa

En matematica, un cuantia de avansadas ia aveni: Frances Pellos de Nice ia scrive Lo compendion de l'abaco, e ia inventa la indica desimal en 1492. Thomas Harrior, la astronomiste ci ia descovre la marcas solal, ia crea la simboles nos usa aora en aljebra. John Napier de Scotland inventada logaritmos, cual alora ia permete ce William Oughtred developa la regla de calcula - cual pote es videda como un computador analoja simple - en 1622. E René Descartes se mesma ia inventa jeometria analisal.

Nicolaus Copernicus; monumento en Krakow

Biolojia e medica ia ave ance alga descovres: Peracelsus (1493-1541 - Theophrastus Bombastus von Hohenheim was his real name!) ia reconose ce vive ia ave sua fonda en cimica e fisica, e debe es esplicada en esta modo. En 1553, Michael Serveta - la mesma person ci Calvin ia arde a la palo en Geneva - ia descovre sirculi de sangue en la pulmones. William Harvey (1578-1657), mediciste per re James 1 e re Charles 1 de England (e Francis Bacon, discuteda a su), ia esplica la sirculi de sangue. El ance ia promove la idea ce tota animales veni de un ovo (en un eda en cual la jenera spontan de moscas ia es la crede de la plu de persones).

Strumentos ia propulsa la multe progresa en siensa. La microscopio composada ia es inventada en 1595 par Zacharias Janssen de Middleburg en Nederland. La telescopio ia es inventada par sua visina, un om deutx nomida Hans Lippershey en 1608. Galileo ia inventa la termometre en 1603, e sua studiante Evangelista Torricelli ia inventa la barometre en 1643.

(Un nota: lentes de vitro ia esiste per sentenios a ante. "Petras de leje" (lupos) ia esiste de 1000 ec en Venezia. Roger Bacon ia sujesta la idea de oculos per leje en 1264, e la oculos prima ia aveni en Firenze, Italia, sirca 1280. Un aristocrata nomida Amati es sujesteda como un inventor posible. Los ia es videda como un cuasi-miracle par la vea de la eda. A la otra lado, oculos per la miope (ci nesesa aida per vide a distante) ia aveni sola en la sentenio de 1500 (sur la nas de pape Leo), e bifocales no ia es inventada asta Ben Franklin en la desenio de 1780.)

Alora, on ave la astronomistes grande. Nicolaus Copernicus de Polsca (1473-1543) ia introdui la sistem solal eliosentral. La eglesa ia demanda, natural, perce Dio no pote nos - sua crea spesial - en la sentro? Como on pote reconsilia esta con la biblia? E esce esta no desacorda con esperia direta? [Johannes Kepler]] (1571-1630) ia ajunta la leges de la move de planetas, pd, ce los ave vias elise, no sirculo. Esta ia sujesta ce la Dio an plu nonperfeta ca la sujesta de Copernicus!

Si astronomistes ia ave un tempo difisil con la eglesa, on debe prea ce tu no ta developa la ideas de Copernicus o Kepler! Giordano Bruno (1548-1600) de Nola, prosima a Napoli, ia crede en un universo infinita e sin un sentro, con teras noncontable viajante sirca noncontable soles, cada con plantas e animales e persones. Plu, el ia es un panteiste. Panteisme es la crede ce Dio es trovada tra tota natur, ce el es, vera, identica con la universo. Cuando persones dise oji "Dio es en tota cosas e tota persones", los es en fato disente alga cosa ce un panteiste ta dise, e cual pote resulta en arde a la palo o pende de un arbor asta multe resente. Ma esta ideas ia ave un efeto potiosa sur Spinoza, ci va es discuteda en un otra article.

Pos un tempo corta como un monce dominican, Bruno ia viaja tra la sites de Europa asta cuando un aristocrata de Venezia ia invita el per reveni. Esta mesma aristocrata ia transfere el a la incuisisio en 1592. Bruno ia es prisonida per oto anios, ma ia refusa retira sua ideas. Final, a 17 febrero 1600, el ia es ardeda a la palo en la Plaza de Flores en Roma, nuda e con un clo tra sua lingua. En 1889, un sculta de el ia es erijeda en la mesma plaza, e sua mori es onorada par pensores libre tra la mundo cada anio.

Francis Bacon

Francis Bacon, 1731

Francis Bacon (1561-1626) ia nase 22 janero 1561. Sua padre ia es "la Senior de manteni la sela real" su Elizabeth 1 (simil a la secretor de la tesoreria su la presidente de la SUA oji). Cuando sua padre mori temprana, el ia resta sin propria, e donce ia comensa studia la lege.

A la eda de 23 anios, el ia es elejeda a parlamento, do el ia es un promovor forte de tolera de relijios, e sua fortunas ia comensa boni. En 1607, re James 1 ia eleje el per la rol de solisitor jeneral; en 1613, la avocato jeneral, e en 1617, senior de manteni la sela real, como sua padre. La anio seguente, la re ia declara ce el es un baron e la senior canselor, pd la ministro prima.

Sua ama vera, an si, ia es siensa e filosofia. El ia scrive Novum Organum de 1620, cual ia refina la arte de pensa lojical, e ia proposa un "metodo nova" per siensa. Bacon ia sujesta ce nos usa indui - laborante de fatos a teoria (en loca de la teoria - o la biblia - a la "fatos"). El ia es cauta de ipoteses - cual el senti ia es probable superstisio o pensa esperante ca cualce otra cosa - ma ia sujesta vera ce lo cual nos nomi aora la proba de ipoteses en la forma de un prosede de elimina esplicas alternativa.

En 1621, pronto pos la re ia leva el a visconte, la parlamento ia acusa el de aseta sobornas. El ia prende serta multe sobornas, ma tota persones en sua situa aseta los ance, e la acusa ia es vera un colpa political a la re.

Ma, car el no ia ave alora un rol political, el ia pote continua seria la siensa e filosofia ce el ia ama. El ia comensa un projeta, con la aida de la re, nomida "la renovi grande", cual ia es un revista de tota la siensas. Fundal, la renovi grande ia envolve la purga de se mesma, spesial nosa inteletos, de prejudis cual el nomi "idoles". El ia discute cuatro:

Idoles de la tribu. La tribu es nos, la tribu umana. La idoles de la tribu es, donce, nosa tendes natural a prejudi, como leje nosa propre desiras en cual nos es suposada vide, xercante per motifes o un intende en tota, etc.

Idoles de la cava. La cava es la caxa peti en cual nos abita como individuas. Donce, la idoles de la cava es la contorses e prejudis nos ave como individuas, como los fundida sur nosa elevas e educas, e la eroes de inteleto ci nos imita.

Idoles de la mercato. La mercato es sosia, e la menasa major a pensa clar cual veni de sosia es sua usa de lingua. La usas comun de parolas no conveni sempre la usas en siensa e filosofia, e la "sensa comun" o lojica cual nos suposa ce nos usa cuando nos parla no es tan lojical. E parolas pote esiste cual ave referedas cual no esiste - un radis grande de confusa.

Idoles de la teatro. La teatro referes a la esiberias de ideas e teorias siensal - jornales e libros, nomes e teorias famosa, metodos o desinias siensal cual ia gania reconose - la apares de veria! Bacon ia dise ce nos debe es cauta ce nos no crea idoles o dogmas de cualce teorias es asetada comun, an si los ia es promoveda par "autorias" en sua campo o pare es asetada "universal".

En 1624, el ia publica La Atlantis nova, un nara utopian sur un isola en la Pasifica sude renada par siensistes. Los abita un loca simil a un universia nomida la Casa de Salomon (nomida per sua fundor), e ia es elejeda per sua roles par esaminas de sua meritas, como la filosofistes-res en la La republica par Plato. Esta ia es posible la model per la Sosia Real (de siensistes) en England. En "La Atlantis nova", el ia previde multe inventas moderna, incluinte autos, aviones, radios, e anesteses.

Bacon ia mori en 1626, a la eda de 65 anios, pos developa la gripe en cuando esperimenta con conserva gal par jela. El es videda par multe como la padre de filosofia brites, e la inteletos de Frans ia dedica sua Encyclopédie monumental a el en 1751.

Galileo Galilei

Galileo Galilei, 1636

Galileo Galilei (1564-1642) ia nase en Pisa, Italia a 18 febrero 1564, la mesma anio en cual William Shakespeare ia nase, e la mesma dia en cual Michelangelo ia mori. Cuando el ia ave 18 anios, el ia descovre la prinsipe de la pendulo. A 22, el ia inventa la balansa idrostatical. Pos perfeti sua telescoprios, el ia descovre, en 1610, cuatro de la nove lunas de Jupiter (cual nos conose aora como la lunas galilean), e la anelos de Saturno, e la fases de Venus.

El es la plu famosa per sua lege de gravita, cual dise ce du cosas de la mesma grandia e forma, ma de pesas diferente, ta cade a la mesma rapidia tra la mesma media. Ce el ia mostra esta par cade cosas de la tore apoiante de Pisa es probable un mito - ma ci sabe?

En filosofia, el ia es la person prima ci distingui, cual ta deveni tan importante en filosofia engles, entre cualias prima e cualias du. La cualias prima es la cualias fisical de materia cual pote es mesurada, e donce pote es la sujeto de analise siensal. Cualias du, a la otra lado, es cosas cual nesesa la presente de un vivente consensa: sabores, colores, sonas... El ia crede ce sola si estas pote es cambiada a cualias prima pote esta deveni la sujetos de siensa.

Galileo ia suposa ce la teoria de Copernicus es un fato demostrada, e ia ensenia lo como tal. Ma la eglesa, spesial la jesuitas, ta aseta lo sola si presentada como un ipotese, en la mesma modo ce alga fundalistes oji ta tolera la ensenia de evolui sola si lo ia es presentada como no plu ca un teoria entre multe.

Galileo ia indica a sua criticores ce la biblia no debe es lejeda leteral. Si on leje lo en acel modo, on ta fini con un cuantia enorme de asurdias e contradises. Lo es intendeda como es lejeda como metafor. On pote vide ce Galileo ta ave problemes con la potias de la eglesa. A su es alga sitas de un letera cual el ia scrive a la duxesa grande Christina de Toscana en 1615: 1616

...No cosa fisical cual la esperia de la sensas pone ante nosa oios, o cual demostras nesesada ta mostra a nos, debe es dutada (e an plu condenada) par la atesta de linias de la biblia cual pote ave alga sinifia diferente su sua parolas. ...Me no senti obligada per crede ce la mesma Dio ci ia dona a nos nosa sensas, razona, e inteleto ia intende ce nos no usa esta donadas.
(De paje 607 de The Age of Reason Begins par Will Durant, orijinal de Discoveries and Opinions par Galileo e editada par Stillman Drake, pajes 177 and 183.)

En 1616, la incuisisio ia comanda ce Galileo debe sesa ensenia la teoria de Copernicus, e plu ia condena tota publicidas e libro, par cualce autor, cual fa lo. Galileo, probable recordante la fortuna de Bruno sola 16 anios plu temprana, ia cuieta sua lesones. Un esajo par un studiante ia causa ce cosas ta deveni turbante denova, donce Galileo ia parla a la pape mesma. La pape no sede.

El ia completa sua libro sur la teoria de Copernicus en cualce caso, ma ia presenta lo como no plu ca un ipotese, an presente lo en la forma de un dialogo entre suportores e desaprobores. Natural, la parlor ante-Copernicus ia es nomida "Stupida", cual no aida la caso de Galileo con la jesuitas. La jesuitas ia ataca la libro, an disente ce Galileo ia es un peril plu grande per la eglesa ca Luther e Calvin. (Plu prosima a nosa eda, esta ta es probable coreta.)

Cuando el ave 68 anios, tra cuatro interogas, el ia es menasada con tortura (ma nunca torturada), e es comandada per retira sua credes. El ia refusa, un poca min forte cada ves. Los ia declara ce el ia es culpable de eresia. Ultima, el ia es restrinjeda a sua propre casa, ma libre per ensenia e scrive. El ia es multe fortunosa.

Galileo ia mori 8 janero 1642. Siensa ia sufri un colpa grande en la paises catolica, con multe siensiste temosa de mostra sua ideas. Esta ia move la sentro de descovre siensal a la paises norde, no car protestantisme ia es plu tolerante de siensa, ma car la eglesas de esta paises ia ave min autoria legal. En 1835, la eglesa ia sutrae la libros de Galileo de sua lista de libros proibida. E la eglesa ia demanda pardona en 1999.

Rene Descartes

Rene Descartes (1596-1650) ia nase 31 marto 1596 en La Haye, Frans, la fio de un avocato rica. Triste, sua madre ia reseta tuberculose poca dias pos sua nase e ia mori. La enfante ia mori cuasi ance, e Rene ia resta como un enfante debil.

Pos un educa bon par la jesuitas, con 17 anios el ia comensa vaga tra Europa, incluinte un ves en la armada de Baiern. En 1628, el ia move a Nederland, do el ia resta per la plu de sua vive. Rene ia sposi nunca, ma el ia ave un concubina e un fia, ci ia mori con sola sinco anios.

Sua contribui xef, per cual el ta es eterna conoseda como la padre de filosofia moderna, es la metodo de duta. En sua libro Meditas, el ia deside comensa filosofia de la comensa par duta cada cosa posible - cosas, Dio, ego, la eglesa, Aristotele... - asta el ta trova alga cosa ce el no pote duta e de cual el ta pote construi un filosofia nova.

Sua conclui ia es, serta, ce on ave sola un cosa cual el no posible duta: La fato ce el ia es ala, dutante! Cogito ergo suum, me pensa, donce me es. De ala, el ia continua per conclui ce on ave alga otra cosas egal serta: Dio, tempo e spasio, la mundo, matematica. Esta cosas, el ia dise, ia es inata de la comensa de vive en la mente. On deriva los no de esperia ma de la natur de sua mente mesma.

Ma on ave plu en Descartes: El ia es un matematiciste ance, e el ia descovre un varia de cosas matematical, spesial analise jeometrial (la aplica de aljebra a jeometria, como la coordinas cartesian), cual el ia descovre, suposada, cuando en cual el nomi un stufa - posible un sauna. El ia es ance un siensiste, e ia fa alga inovas en mecanica e otica ance. E el ia es la prima siensiste ci ia nota la idea de la reflexe.

La idea ce alga de nosa atas es reflexes condui nonevitable a la posible ce tota atas es reflexes. Descartes ia teori ce animales (a min) no nesesa ave un spirito: Los es automatas. Car el ia es un bon catolica, el ia esclui umanas: Nos ave un spirito, an ce el ia aseta ce el no ia sabe como la spirito e la corpo interata.

En istoria, persones usa cual es la plu interesante sirca los per teori sur otra cosas, spesial se mesma. Oji, cadun parla de cosas psicolojial par usa analojas de computadores e modeles de la prosede de informa. En la eda de Descartes, lo ia es la mecanica de orolojias e sistemes idraulica cual ia es a la fronte de tecnolojia. Donce, el e otras ia sujesta fundal ce vive - incluinte a min la parte grande de vive umana - es mecanical, pd opera par la mesma leges natural como cosas fisical.

Descartes ia vade un paso plu: El ia fa la ipotese deiste. El ia sujesta ce (estra la spirito umana e la vole libre) tota de la crea opera mecanical, e ce Dio ia desinia lo e ia causa ce tota comensa - ma serta el no ta nesesa entre en la prosedes de la mundo, car el es perfeta e sabe tota. Natural, esta sujesta ce Dio no nesesa usa miracles, ce Cristo no ia es un interveni en la curso de istoria, e ce preas no fada vera cualce cosa. Esta ta es un problem.

La teolojistes calviniste de Nederland ia ataca el: En ajunta a sua idea nontradisional de deisme e un universo mecanical, Descartes, la bon catolica, ia ance crede en vole libre, cual no conveni bon con la idea calviniste de predestina (la idea ce Dio sabe esata ci va vade a enferno o sielo). Sua amis, fortunosa, ia interveni per Descartes.

En 1649, Descartes ia es invitada par rea Cristina de Sveria per instrui sua altia. Nonfortunosa, el ia desira ce el veni a la castel a sinco ora en la matina, tre dias per semana, tra pluve, neva, e jela. Descartes ia developa pneumonia e ia mori en 1650, con 54 anios.

Educa

Jan Komenski, par Karol Miloslav Lehotsky

On debe ajunta un nota sur educa en esta eda mareante. En la sentenio de 1600, an ce tota la siensiste e filosofistes grande, sirca 80% de la popla ia es nonalfabetiste - no la "nonalfabetiste funsional" moderna, cual sinifia ce on no es multe bon a leje e scrive, ma no capas intera per leje e scrive. Ma cambias ia es veninte. Per esemplo, en 1619, la dux de Saxe-Weimar (Deutxland) ia comanda per educa obligada per tota enfantes entre ses e des-du anios, con un mense de "vacanse" la tempo de recolie donce los pote labora a la cultiveria - simil a la sistem cual no ave oji. La parte "obligada" es car, en otra casos, la jenitores ta espeta ce la enfantes labora tra la anio intera.

Jan Komenski (o Comenius, 1592-1670), un bispo de la Frates Moravian, ia scrive la testo prima primida (con desinias!) cual ia es usada per 250 anios. En la Didactica Magna ("Arte grande de instrui"), el ia presenta prinsipes de educa cual ta pote es usada par cualce scola oji:

"No sola la enfantes de la rica o potiosa, ma tota enfantes, xicos e xicas, nobil e nonobil, rica e povre, en tota sites, vilas, e viletas, debe es enviada a scola."
"La educa coreta de enfantes no es composada de pleni sua testas con un masa de parolas, frases, e ideas traeda con lunlotra de autores variosa, ma en abri sua comprende a la mundo esterna, afin un rio vivente pote flue de sua propre mentes, como folias, flores, e fruta salta de la broto sur un arbor."
"Multe pote es aprendeda en jua cual va plu tarda es usosa cuando la situa nesesa lo."
"Nos es tota sitadanes de un mundo, nos es tota de un sangue. La odia de un om car el ia nase en un otra pais, car el parla un lingua diferente, o car el ave un vista diferente sur esta sujeto o acel, es un folia grande. Sesa, me suplica de tu, car nos es tota egal uman... Ta ce nos ave un gol, la bonstate de umania; e ta ce nos pone a via tota egosia en casos de lingua, nasionalia, o relijio."

Ma nota, per tota la reformi relijiosa e progresa siensal, plu ca un milion persones, la plu femes vea, ia es matada como sorsores, de la eda de la Proclama papal sur sorsores de 1484 tra la sentenio de 1700. On ave an un manual de xasa sorsores, prima publicida en 1486, nomida la Malleus Malificarum ("la martel de sorsores"): como on pote reconose los, como on debe tortura los per confesa, como on pote mata los efetosa... Femes continua es maltratada oji, serta, ma nos pare como deveni plu consensa en cuando la mundo entra la milenio du. A la otra lado, nos ave multe nasiones an oji en cual femes es ancora maltrata en modos egal asustante.

Tortura ia continua en la renase, e lo no ia desapare de la mundo de oji, en nasiones povre e rica. Serta, tiranos e estremistes relijiosa no ave un problem con la usa de tortura. La olocausto es un esemplo asustante e repulsante. Nos ia ave ance resente an un presidente de la SUA ci ia promove la usa de tortura!

Nota ance ce sclavia, cual ia es un caso minor en la eda media (car serfos ia es tan conveninte) ia releva sua testo fea con la concista par la espanioles e portugeses de areas vasta de Africa e la Americas. Multe persones en Espania ia crede a la tempo ce no cristian brava debe labora con sua manos! Nasiones protestante e sua colonias ia trova la usa de sclavos egal profitosa. An si sclavia esiste ancora en alga nasiones povre (e, en la forma de trafica umana, en nasiones rica), lo no es multe comun en la parte grande de la mundo, xef car la revolui industrial ia fa sclavia tro cara, no car nos es ofendeda par la pratica.