Fundalisme relijiosa

Fundalisme relijiosa sinifia un teni sin duta a un colie de credes nonreduable. Plu resente, la parola "fundalisme" ia es aplicada a cualce tende entre alga grupos, no sempre en relijios, cual ave un leteralisme sever a sua scrives, dogmas, o ideolojias spesifada, e un asentua sua la importa de manteni distinguis entre sua grupo e otras, cual resulta en un idea de puria e un desira per reveni a un ideal pasada. La rejeta de diversia de opina es un comun cualia de fundalistes, spesial en relijios.

Dependente sur la contesto, la eticeta "fundalisme" pote es un videda como neutra o despetante, simil en la modos de nomi perspetivas politica como "sinistra" o "destra" pote ave conotas negativa. Cuasi tota relijios (e otra ideolojias) ave sua varias fundaliste. Per esta article, nos restrinje la discute a la du relijios la plu bon notada per sua varias fundaliste: cristianisme e islam.

Fundalisme cristian

Fundalisme cristian ia es definada par George Marsden como la insiste per un adere a alga credes teolojial, comun como un reata a teolojia plu moderniste. La terma "fundaliste" ia es creada par sua suportores per descrive cual los ia aserta ia es sinco credes teolojial de cristianisme, e esta ia deveni un promove fundaliste cristian en la comunia de protestantes en la SUA en la parte prima de la sentenio 20. Lo ia comensa entre teolojistes conservaliste presbiterian a la Seminario Teolojial de Princeton en la sentenio 19 tarde. Lo ia sperde pronto a conservalistes entre batistes e otra setos sirca 1910 a 1920. La intende de la promove ia es per reafirma credes teolojial "clavin" e per defende los contra la defias de teolojia libral e critica alta.

La formula prima de credes fundaliste american ia aveni en la Confere Niagra de la Biblia (1878–1897) e, en 1910, a la Asembla Jeneral de la Eglesa Presbiterian, cual ia redui los a la fundales sinco:

1. La biblia es inspirada par Dio, e donce no es falable.
2. La nase de Jesus de un madre virjin.
3. La crede ce la mori de Cristo ia es un espia de peca.
4. La revive corpal de Jesus.
5. La realia istorial de la miraculos de Jesus.

La conservalistes teolojial ci ia suporta esta sinco credes ia deveni conoseda como "fundalistes", e los ia rejeta cualce sujeste de comunalia con tradisiones relatada, como iudisme e islam. Contrastante, grupos evanjeliste, an si los tipal acorda con la teolojia de la fundalistes, es comun abrida a interata con otra grupos, cristian o otras.

Fundalisme muslim

Estremisme en islam ia comensa en la sentenio 7 e la tempo de la kharijis. De sua ideolojia esensal politica, los ia developa dotrinas estrema cual ia difere los de muslimes suni e xia. La kharijis ia es notada spesial per sua usa radical de takfir, par cual los declara de otra muslimes es noncredores e alora merita mori.

La nonacordas entre la sunis e la xias de la sentenio 7 ia crea plu tarde un rol per ideolojias como lo promoveda par Ali Shariati (1933–77) per combina revolui sosial con fundalisme muslim, como en la Revolui Iranian en 1979. Fundalisme ia es apareda en multe nasiones; la varia wahhabi es promoveda tra la mundo, e es finansiada per Arabia Saudi, Catar, e Pacistan.

Jornalistes american, en sua atenta per esplica la ideolojia de la ayatollah de Iran en la crise de ostajes en 1979, ia descrive lo como un "varia fundaliste de islam", par analojia a la fundalisme cristian en la SUA. En esta modo, la sinifia moderne de fundalisme ia deveni popular en anios seguente.