Abri la menu xef
Hania hazar 650-850

La hazares ia es un popla turcica seminomada con un federa de tribus de lingua turcica cual en la sentenio 6 tarda ia institui un impero comersial en la sude-este de lo ce oji es la Rusia european.

La hazares ia crea lo ce per sua dura ia es la organiza plu potiosa cual emerji de la separa de la Hania turcica ueste. Montante un arteria major de comersia entre Europa este e Asia sude-ueste, Hazaria ia deveni un de la mercatos xef de la eda medieval, governante la marxas ueste de la Via de Seda e avente un rol comersial xef como crus de vias entre Xina, Asia sude-ueste e la Rus de Ciiv. Per alga tre sentenios (s 650-965), la hazares ia domina la area estendente entre la stepes de Volga-Don a Crim este e la Caucaso norde.

Determina la orijina e natur de la hazares es relatada a teorias de sua linguas, ma lo es difisil car on no ave rejistras nativa en lingua hazar e la stato ia es multilingual e multietnical. On crede ce la relijio nativa de la hazares ia es la tengrisme, como la de la hunes de Caucaso norde e otra poplas turcica. Seguente Judah Halevi e Abraham ibn David, la elite de la hazares ia converti a iudisme en la sentenio 8 ma la estende de la converti a en la hania hazar resta nonserta.

On trova proposas de orijina hazar de la iudis buharan, la cazaces e la cozaces de la rejion de Don entre otras. En la sentenio 19 tarda, un teoria ia emerji disente ce la plu parte de la iudis axcenazi desende de la diaspora iudi hazar ci ia migra a ueste de la Rusia moderna e Ucraina a Frans e Deutxland.