Homero
Homero es un poesiste lejendal de Elas antica. La tradision dise ce el es la autor de la Iliada e la Odisea, du poesias epica.
La elinicas antica ia crede jeneral ce Homero es un individua istorial, ma scolores moderna duta. On reseta no informa biografial fidable de la anticia clasica, e la poesias mesma representa clar la culmina de multe sentenios de nara parlada e un sistem bon developada de composa poesial par formulas.
On disputa la via par cual la poesias ia ateni sua forma scriveda final, e la rol de un o plu poesistes en esta prosede. Alga scolores opina ce ambos poesias ia es creada par un jenio individua ci ia trova multe de sua materia en naras costumal variosa. Otras dise ce la epicas ia evolui lenta tra un periodo de sentenios, par multe jeneras de poesistes.
On regarda Homero como padron de tota leteratur seguente. El mostra se como un jenio de istoriografia, drama e filosofia par la partes comica e trajedial de sua epicas.
Vive
editaLa data de vive de Homero ia es controversa en la tempo antica, como ance oji. Herodoto dise ce Homero ia vive a 400 anios ante sua propre tempo, situante el a sirca 850 AEC; ma otra fontes antica dona datas multe plu prosima a la tempo suposada de la Gera de Troia.
Per la scolores moderna, "la data de Homero" refere tan a la data de consepi de la poesias como a la vive de un individua. On acorda jeneral ce los veni de la fini de la sentenio 9 AEC o de la sentenio 8, ce la Iliada presede la Odisea, e ce la Iliada es la obra la plu vea de leteratur ueste.
Lejendas
editaLa anticas ia inventa naras rica sur la loca de nase de Homero. Per esemplo, la scrivor Lusiano ia imajina ce el es un babilonian su nom de Tigranes, ci ia adota la nom de Homero cuando la elinicas ia prende el como ostaje.
La varia la plu frecuente dise ce Homero ia nase en la site de Smirna en Ionia (oji Izmir) en Turcia), o sur la isola de Cios, e ce el ia mori sur la isola Ios. Un lejenda dise ce sua nom orijinal es Melesigenes, cual sinifia "naseda par Meles" — Meles es un rio asta Smirna. La testo de la poesias mesma conteni detalias cual sujesta un familialia con la jeografia de acel area.
La asosia con Cios veni a la min de un informa par Semonides, un poesiste de la sentenio 7 AEC, ce un linia en la Iliada es scriveda par "la om de Cios". Lo pare ce un spesie de corpora de bardes ia esiste sur Cios, su nom de "fios de Homero".
La nom de Homero es omofon con la parola elinica per "ostaje". La anticas ia clari esta par dise ce, simil a un ostaje, Homero ia es obligada segue un otra person, car el ia es sieca. Un pasaje en la Odisea descrive Demodoco, un barde sieca en la corte de la re de la feasianes.
Lingua
editaLa lingua usada de Homero es un varia antica de elinica ionian, con cualias introduida de otra dialetos como eolian. Lo ia deveni la funda de la lingua de la epicas elinica seguente.
La poesias de Homero es composada en exametres datilal.
La alfabeta elinica ia es adotada de un silabario fenesian sirca 800 aec, e lo pare ce on ia scrive la poesias de Homero pronto pos esta data: un enscrive de sirca 740 aec trovada sur la isola de Iscia pare refere a un testo de la Iliada.
Nos sabe poca la state temprana de la poesias, ma editores en la sentenio 2 aec ia stabli sia testo, e cada varia moderna desende de esta.