La lingua iberian ia es la lingua de un popla orijinal. Lo ia es identifiada par la scrivores elinica e roman. Esta popla ia abita la rejiones este e sude-este de la penisola iberian. Los pote es identifiada como un cultur local alga neblosa entre la sentenios 7 a 1 aec. La lingua, como tota la otra linguas paleoeuropean de Iberia estra euscara, deveni estinguida per la sentenios 1 e 2 ec, pos es gradal reponeda par latina pos la vinse par la romanes.

Un placa de fero
Un mapa de la popla de iberia, ante-roman
La alfabeta iberian tarda

Iberian es nonclasida. An si la alfabetas cual ia es usada per scrive lo ia es desifrida, la lingua mesma resta per la plu parte nonsabeda. Lias con otra linguas ia es sujestada, spesial la lingua euscara, fundida xef sur la similes entre la sistemes de numeros de la du.

Enscrives iberian ia es trovada longo la costa mediteraneo de la penisola iberian, ateni la rio Herault en Frans sude. Restas importante ia es trovada en Enserune, entre Narbonne e Beziers en Frans, en un vila fortida con elementos miscada iberian e celta. La limita a la sude es Porcuna, en Jaen, Espania, do scultas gloriosa de cavalores iberian ia es trovada. Plu interna la distribui esata de la enscrives iberian no es serta. Lo pare ce la cultur ia ateni la interna par la rio Ebro, tan distante como Salduie (Zaragoza), ma no plu.

La enscrives iberian la plu vea es de la sentenio 6 o 6 aec, e la plu tarda de la fini de la sentenio 1 aec (o posible la comensa de la sentenio 1 ec). Plu ca 2 mil enscrives iberian es aora conoseda. La plu es testos corta sur seramica con nomes personal, cual es plu comun interpreteda como marcas de posese. Multe monetas ia es fabricada par comunias iberian en la periodo de la Republica Roman, con scrives iberian. La testos la plu longa ia es enscriveda sur placas de plomo. La plu longa es de Yatova (Valensia) con plu ca 600 sinias.

Tre scrives diferente ia resta per la lingua iberian. Tota de los, estra la alfabeta elinica-iberian, ave un cualia distinguinte: los usa sinias silabal per la esplodentes (pd, un simbol per KA, un per KE, un per KI, etc), e sinias alfabetal per la resta de la consonantes e la vocales, un tipo nomida semisilabarios. Los pare liada xef a la alfabeta fenisian, ma con alga influes de la alfabeta elinica.

La scrive iberian norde-este (o simple la scrive iberian) es la plu comun, usada en sirca 95% de la testos esistente. Lo ave du varias: la varia 1, la sistem duple, ia es usada de la sentenios 4 e 3 aec, e distingui K e G, e T e D, xef par la usa de un linia vertical per la K e T. Plu tarda (sentenios 2 e 1 aec), los no continua indica la diferes entre la K e G, e T e D. En ambos sistemes, B ave sua propre simbol, car P no ia esiste en la lingua.

La scrive iberian sude-este es ance un semisilabario, ma es plu simil a la scrive de la tartesianes ca a la scrive iberian norde-este. La alfabeta elica-iberian es un adota direta de la varia ionica de la alfabeta elinica.