La Impero Rusce (rusce: Российская Империя, Россійская Имперія en ortografia ante 1918) ia es la nom de Rusia entre 1721 e 1917. Lo ia inclui areas de Europa, Asia e America Norde. Sua sistem political ia es la monarcia, governada par la tsar (imperor, de la latina Cesar). Lo ia fini cuando la republica ia es declarada par la governa tempora cual prende potia pos la Revolui de Febrero 1917.

La Impero Rusce en 1867
Piotr la grande

La Impero Rusce ia es la impero tre en grandia en istoria, suprapasada en grandia sola par la Impero Brites e la Impero Mongol. La crese de la Impero Rusce ia aveni a la mesma tempo como sua potias visina ia descrese: la Impero Svensce, la Comunia de Polsca e Lietuva, Persia, e la Impero Osmanan. Lo ia ave un rol major en 1812-1814 par defeta la atentas de Napoleon per controla Europa.

La Dinastia Romanov ia rena la Impero Rusce de 1721 asta 1762, e sua ramo matrilinial de desende patrilinial deutx, la Dinastia de Holstein-Gottorp-Romanov ia rena de 1762. A la comensa de la sentenio 19, la impero ia estende de la Mar Artica a la norde a la Mar Negra a la sude, de la Mar Baltica a la ueste a la Mar Pasifica e en Alaska e California norde en la este. Con 125.6 milion sitadanes rejistrada par la conta de popla de 1897, lo ia ave la cuantia de popla tre en grandia en la mundo a acel tempo, pos Dinastia Qing de Xina e India. Como tota imperos, lo a ave un diversia grande de economias, etnicos, linguas, e relijios. On ave multe grupos oposante a la rena par la impero, ci ia comensa multe rebelas e atentas a asasina; los ia es cauta vijilada par la polisia secreta, e multe miles ia es escluida a Sibir.

Per sua economia, la impero ia es xef fundida sur cultiveria, con produosia basa a feudos grande suportada par la labor de serfos (campaniores rusce) asta los ia es librida en 1861. La economia ia industri lente con la aida de investores stranjer en ferovias e fabricas. La pais ia es renada par la nobiles -boiares- de la sentenio 10 tra la sentenio 17, e ultima par un imperor. Tsar Ivan 3 (1462–1505) ia institui la funda per la impero cual ta emerji plu tarde. El ia crese la teritorio de sua stato par tre, ia fini la domina de la Manada Oro, ia renovi la Cremlin de Moscva, e inisia la organiza de la stato rusce. Tsar Piotr la grande (1682–1725) ia gania un cuantia de geras e ia estende un impero ja enorme a un potia major european. El ia move la capital de Moscva a la site nova de San Petersburg, e ia gida un revolui cultural cual ia repone alga de la tradisiones sosial e political de la eda medieval con un cultur moderna, siensal, razonaliste, e orientada a Europa.

La tsarina Caterina la grande (renada 1762–1796) ia rena tra un eda de oro: el estende la stato par concista, coloni, e diplomatia, continuante la politica de Piotr de moderni en la modo european. Tsar Alexandro 2 (1855–1881) ia promove multe reformis, con la plu dramosa la libri de tota 23 milion serfos en 1861. Sua politica en Europa este ia inclui la proteje de la Cristianes Ortodox su la rena de la Impero Osmanan. Acel ia resulta a la entra par Rusia en la Gera Mundal 1 a la lado de Frans, Britan, e Serbia, contra la Impero Deutx, la Impero Osteraices, e la Impero Osmanan.

La Impero Rusce ia funsiona como un monarcia asoluta sur la prinsipes de ortodoxia, autocratia, e nasionalia asta la revolui de 1905, e alora deveni un monarcia constitual par lege. La impero ia colasa en la Revolui Febrero de 1917, per la plu parte como la resulta de sua falis grande en sua partisipa en la Gera Mundal 1.