Jeometria
Jeometria (de elinica antica γεωμετρία (geōmetría) 'mesura de tera'; de γῆ (gê) 'tera' e μέτρον (métron) 'un mesura') es un ramo de matematica consernante cualias de spasio como la distantia, forma, grandia, e loca relativa de figures. Jeometria es, en junta con aritmetica, un de la ramos la plu vea de matematica. Un matematiciste ci labora en la campo de jeometria es nomida un jeometriste. Asta la sentenio 19, jeometria ia es cuasi sola dedicada a jeometria euclidal, cual inclui la consetas de punto, linia, plana, distantia, angulo, surfas e curva, como consetas fundal.
Orijinal developada per modeli la mundo fisical, jeometria ave aplicas en cuasi tota siensas, e ance en arte, arciteta, e otra ativias cual es relatada a grafica. Jeometria ave ance aplicas en campos de matematica cual es parente nonrelatada. Per esemplo, metodos de jeometria aljebral es fundal en la demostra de Wiles de la Teorem Ultima de Fermat, un problem cual ia es formulada en termas de aritmetica elemental, e ia resta nonsolveda per alga sentenios.
En la sentenio 19, alga descovres ia grandi dramosa la estende de jeometria. Un de la descovres la plu vea de esta es la Theorema Egregium ("teorem notable") de Carl Friedrich Gauss cual declara aprosima ce la curvia de Gauss de un surfas es nondependente de cualce caxi spesifada en un spasio euclidal. Esta implica ce on pote studia surfases como spasios autonom, e ia es estendeda a la teoria de varias e jeometria de Riemann. Plu tarda en la sentenio 19, lo ia pare ce on pote developa jeometrias sin la axiom de paraleles (jeometrias noneuclidal) sin introdui cualce contradise. La jeometria cual es la funda de relativia jeneral es un aplica famosa de jeometria noneuclidal.
De la fini de la sentenio 19, la estende de jeometria ia es multe grandida, e la campo ia es divideda a multe sucampos cual depende de la metodos fundal - jeometria diferensial, jeometria aljebral, jeometria computal, topolojia aljebral, jeometria combinante, etc. - o de la cualias de spasios euclidal cual es iniorada - jeometria projetante cual considera sola la alinia de puntos ma no distantia e paralelisme, jeometria afina cual omete la conseta de angulo e distantia, jeometria finita cual omete la continua, e otras. Esta grandi de la estende de jeometria ia cambia la sinifia de la parola "spasio", cual ia refere orijinal a la spasio tridimensional de la mundo fisical e sua model furnida par jeometria euclidal; aora un spasio jeometrial, o simple un spasio, es un strutur matematical sur cual alga jeometria es definida.