Johann Wolfgang von Goethe
Johann Wolfgang von Goethe (28 agosto 1749 - 22 marto 1832) ia es un scrivor deutx multe importante. Sua obra la plu importante es la drama Faust.
.jpg)
Biografia
editaNos no debe visita un dementeria per trova mentes desordinada; nosa planeta es la dementeria de la universo. - Goethe (1749-1832)
Goethe ia nase en 1749 en Frankfurt-am-Main en Deutxland, la plu vea de ses enfantes, ma sola el e un sore ia survive a adultia. Sua padre, Johann Kaspar Goethe, ia es un avocato confortosa e un erudita amator, ma el no ia susede en politica e ia ave un tempera nonplasente. Sua madre, Katharina Elisabeth Textor, ia es multe plu plasente e ia es la fia de la burgermeister (maior) de Frankfurt.
Goethe joven ia es bela e talentosa. El ia aprende fasil la linguas e ia ave intereses en musica e arte. El ia entra la Universia de Leipzig per studia lege, ma un delude en ama ia resulta en maladia e depresa, e el departi de scola. Ma en 1777, el ia reseta sua diploma en lege de la Universia de Strasbourg.
Sua leje de la Disionario de Bayle ia condui el per renunsia sua cristiania cuando el ia es un adolese, e el ia deveni un ateiste. El ia suavi alga plu tarde, e ia adota un panteisme modelida de lo de Baruch Spinoza.
En 1774, el ia scrive "Die Leiden des jungen Werthers" (la tristias de Werther joven), un nara de ama trajica cual, an si no gustada par la criticores, ia es multe susedosa, spesial entre inteletos romanica joven. La libro conclui con un suiside cual ia es imitada, nonfortunosa, par un cuanti de lejores ci ia es se mesma sufrinte de un cor rompeda. Como multe de sua obras, la nara asentua la tensas entre la natur de la individua e la restrinjes de la sosia.
La anio seguente, el ia es invitada per junta con la dux de Sasonia-Weimar a corte. A prima, el ia es no plu ca un "orna" ala, ma plu tarde el ia ave cargas varios real political, incluinte inspetas de minas e la institui de oserverias de clima.
En 1782, el ia induida en la nobilia, cual ia permete ce el ajunta la "von" a sua nom. La resulta de sua fama e prestije en Weimar, el ia encontra e deveni amis con alga poesistes joven, incluinte Schiller e Herder.
De sua adolese, Goethe ia tende cade en ama, ma no capas de dedica se a un fem o a sposia. Sua relata la plu longa e intensa ia comensa sirca 1775 con Charlotte von Schardt, un fem sposida ci ia ave sete enfantes (an si sola cuatro ia survive). El ta scrive leteras longa e romanica a Charlotte per la plu de sua vive.
El ia comensa sua propre casa con un fem joven de la clase de laborores nomida Christiane Vulpius. El ia pare un enfante a Natal en 1789.
En 1801, Goethe ia deveni malade, e sua sani ia prende multe anios. A la fini de sua malade, Napoleon ia defeta la Pruses a Jena e ia marxa en Weimar. Sua soldatos ia atenta prende la casa de Goethe, e Christiane ia proteje el fisical. El ia sposi el pronto pos esta.
Goethe ia es un amiror de Napoleon, e ia visita el en 1808 a la invita de la imperor. Goethe ia visita ance con Beethoven en 1812.
Faust, la obra la plu grande de Goethe ia es sua presenta teatral en du partes. El ia comensa scrive lo en 1773, ma no ia fini lo asta 1831. La parte prima pote es comprendeda solitar, e lo ia es completeda en 1808. La tema ia es libria umana e la potia de pasion, cual Faust descovre pos cuando el aposa sua spirito en un negosia con la diablo Mephistopheles.
(En un aveni ladal, Faust ia crea un om artifisial en sua laboreria. Esta ia influe un fem nomida Mary Shelley, autor de Frankenstein - posible la novel prima de naras siensal. El ia pone sua nara en un castel de la sentenio 13 cual el ia videda cual ia parteni a un familia deutx vea e colorosa Frankenstein, un castel con cual Goethe ia es ance familiar.)
En ajunta a sua poesia, noveles, e presentas teatral, Goethe ia spende multe tempo sur siensa. El ia studia medica, anatomia, fisica, cimica, botanica, e meteorolojia.
En 1792, el ia completa sua "Beitrage zur Optik" (contribuis a optica) en du partes, e en 1810 la "Zur Farbenlehre" (sur la teoria de colores). El ia crede vera ce esta ia es esta obras cual ta es sua contribuis la plu grande. Ma poca siensistes ia aproba de los, e los ta ave poca efeto seria sur la campo. Sua obras ta fa un impresa plu grande sur artistes variosa, incluinte Turner, Klee, e Kandinsky. Sua metodos ia es vera plu fenomenolojial ca esperimental, e sua obras ia refleta plu sur la esperias sujetal de color e lus ca sur sua fisica.
El ia scrive ance un libro nomida "La mute de plantas", cual ia sujeste ce tota plantas es sola varias sur un planta primativa el ia nomida Urpflanze. El ia introdui la terma "morfolojia" e moveda la relata de umanas e animales con sua descovre de la oso intermasila (supra tua dentes superior), en la mesma loca como en animales.
Sua sposa Christiane ia mori en 1816. Sua amada Charlotte ia mori en 1827. La dux ia mori la anio seguente. E la sola enfante restante de Goethe ia mori en 1830. Sufrinte de maladia e depresa, Goethe mesma ia mori, 22 marte 1832, un anio pos completa la dui du de sua obra mestral Faust
El no ia es sola un scrivor e poesiste, ma ance un politiciste e siensiste.
Datos sinifiante
edita- 1765 asta 1768: studia de lege en Leipzig
- 1768 asta 1775: sta en Frankfurt, Strasburg, Darmstadt e Wetzlar
- 1775 asta 1832: ministro en Weimar
- 1786 asta 1788: viaja tra Italia
- de 1788: relatas prosima con Herder, Wieland e Schiller
- 1791 asta 1817: xef de la teatro en Weimar
- 1808: encontra con Napoleon Bonaparte
Scrives importante
edita- Die Leiden des jungen Werthers ("La tristias de la Werther joven," novela en notas, 1774 e 1787)
- Iphigenie auf Tauris (Drama, 1779 e 1787)
- Torquato Tasso (Drama, 1790)
- Wilhelm Meisters Lehrjahre (La anios de instrui de Wilhelm Meister, novela, 1795/96)
- Faust. Der Tragödie erster Teil (Faust, parte un, 1797)
- Wilhelm Meisters Wanderjahre (La anios de viaja de Wilhelm Meister, novela, 1807 e 1829)
- Die Wahlverwandtschaften, (La retates elejeda, novela, 1809)
- Aus meinem Leben. Dichtung und Wahrheit ("De me vive. Poesia e veria," poesia autobiografial, 1811–33)
- West-östlicher Divan (Divan (senton longe) ueste-este, poesias, 1819)
- Faust. Der Tragödie zweiter Teil, (Faust, parte du, 1832)