Kobenhavn
Kobenhavn (dansce: København) es la site capital e la plu grande de Danmarc. Lo es situada sur la costa este de la isola de Sjælland, partal sur la isola de Amager, e sur alga isoletas entre la du. A la este, lo fasa Oresund, la streta de acua cual separa Danmarc de Sveria e cual lia la Mar Norde con la Mar Baltica.
|
Kobenhavn | |||
|---|---|---|---|
| |||
 | |||
| Pais | Danmarc | ||
| Rejion | |||
| Area | 77,2 km² | ||
| Popla | 569 557 ab. | ||
| Densia | 7400 abitores/km² | ||
 | |||
Prima documentida en la sentenio 11, Kobenhavn ia deveni la capital de Danmarc a la comensa de la sentenio 15. Oji, sua bon situa e infrastrutur eselente ia fa ce lo deveni un sentro importante e un loca popular per xeferias e conferes. La airoporto la plu grande en Scandinavia es atenable par tren en 14 minutos de la sentro de la site.
On reconose Kobenhavn como un de la sites con la cualia de vive la plu bon en la mundo. Lo es ance un de la sites la plu ecolojial sana. La acua en la porto interna es limpa e secur per nada. 36% de tota la sitadanes vade a sua labora par bisicle. En cada dia, sua bisicles viaja 1,2 miliones de cilometres. Ma, cuando on regarda la costa de vive, lo ia es la site des de la plu caras de mundo en 2010.
Istoria
editaTradisional, on dati la fundi de Kobenhavn a la construi par Bispo Absalon en 1167 de un castel sur la isola peti de Slotsholmen, do la Palasio de Christiansborg sta oji. Ma trovadas arceolojial resente indica ce Kobenhavn ia es ja un vila peti en la sentenio 11.
La porto eselente ia stimula la crese de la site asta cuando lo ia deveni un sentro importante de comersia. Esta es refletada en la nom, de cual sua forma orijinal ia es Køpmannæhafn (porto de mercator). Kobenhavn ia dona ance sua nom latina (Hafnia) a la elemento hafnio.
En cuando la vila ia deveni plu importante, lo ia es atacada a multe veses par la Alia Hanseatica. En 1254, lo ia es constituida como un site par Bispo Jakob Erlandsen. En 1658 e 1659, lo ia resiste un aseja par la svensces e ia repulsa susedosa un ataca major. En 1711, la pesta ia redui la popla de Kobenhavn (sirca 65 000 persones) par un tri.
En april 1801, un marina brites ia vinse un marina dansce-norsce ancorida prosima a Kobenhavn. Visamiral Horatio Nelson ia gida la ataca xef, desobedinte un comanda de retira donada par sua amiral Sir Hyde Parker (pos pone un telescopio a sua oio sieca). El ia destrui multe de la barcones dansce-norsce ante la acorda de un sesaspara.
La fortes brites ia ataca denova en agosto e setembre 1807, en la Batalia Du de Kobenhavn (ance nomida la Bombarda de Kobenhavn). Los ia ataca direta la abitores nonmilitar de la site per pote saisi la marina dansce-norsce. Los ia lansa acaso rocetos ensendente cual ia conteni fosfor (nonestinguable par acua). Los ia atera 30 000 soldatos ci ia mata 2 000 nonmilitares e ia destrui la plu de la site en sola tre dias. Per defende se, Kobenhavn ia depende de sua murones vea, cual no ia sufisi per contrataca la barcones brites con sua artileria plu potiosa.
On ia abri final la murones en la desenio 1850 per permete la construi de casas nova sirca la lagos cual borda los a la ueste. A acel tempo, la sentro de Kobenhavn ia es abitada par sirca 125 000 persones (e par 140 000 en la conta de 1870). Oji, la cuantia de popla es sirca 25 000. En 1901, Kobenhavn ia crese plu, corporante comunias con 40 000 persones, e Frederiksberg ia deveni un enclave en la site.
En la Gera Mundal Du, Kobenhavn (como la resta de Danmarc) ia es ocupada par soldatos deutx de 9 april 1940 asta 4 maio 1945. Esta ocupa no ia es un parte de la crese nazi, e en la anios prima, la autorias deutx ia xerca an un spesie de acorda con la governa dansce. Ma esta colabora ia colasa en agosto 1943, e la Marina Dansce Real ia afonda alga de sua barcones en la porto per preveni ce la deutxes usa los. Pos la invade de Normandia, la deutxes ia teme ce la polisia dansce va causa problemes, e los ia atenta aresta tota la polisia en setembre 1944. Ma la plu de la polisiores ia susede asconde o fuji a Sveria.
La resistores dansce ia xerca la aida de la armada de aira brites per ataca la xeferia nazi en Kobenhavn. La avionores ia debe ataca la construida de la Gestapo en un modo estrema esata. Prisonidas political ia es locada en la suteto de esta construida per impedi un ataca de aira, donce la briteses ia debe bombi sola la niveles basa de lo. Esta ia aveni a 22 marto 1945, en tre ondas corta.
En la onda prima, tota ses aviones (cada con un bomba) ia colpa sua ojeto, ma triste un de los ia cade prosima a la scola de xicas en Frederiksberg. Como resulta, cuatro de la aviones en la du ondas seguente ia malsuposa ce la scola es la ojeto, e ia mata 15 studiantes e alga enseniores. An tal, 18 de la 20 prisonidas political ia susede fuji, la arcivos de la Gestapo ia es completa destruida, e Hitler ia es tan consernada par la situa ce el ia retira sola un dui de sua 200 000 soldatos en Danmarc per reforti la fortes deutx a la Rio Rhein.
De pos la estate de 2000, Kobenhavn es liada a la site svensce de Malmo par la ponte-tunel Oresund. Como resulta, Kobenhavn ia deveni la sentro de un area urban plu grande cual estende en ambos nasiones.
Clima
editaKobenhavn es en la zona de clima maral, prosima a un clima continental umida. Lo esperia un clima nonstable e cambiante en tota cuatro saisones, e la temperatur es plu alta par sirca 5 grados ca la promedia mundal per sua latitude (55°N). La razona xef per esta caldia es la Corente de Golfo, cual move acua calda de la Golfo de Mexico en dirije a Europa, e sistemes de presa basa cual segue lo.
Presipita es moderada tra tota la anio, con un culmina peti entre junio e agosto. Neva cade xef entre la fini de desembre e la comensa de marto, ma la neva dura rara sur la tera. Pluve en janero e febrero es tan comun como neva, e la temperatures promedia per esta du menses es prosima a la punto de jela.
La primavera es como en Europa continental, ma retardada par sirca un semana par causa de la acua fria ambiente. A la fini de autono, la reversa de esta fenomeno fa ce Kobenhavn resta min fria per un tempo. En novembre e desembre, la acua de mar ambiente es jeneral plu calda ca la aira. De otobre a febrero, un cuantia peti de tempestas (o an siclones) aveni. Tempestas es rara en estate.
Estate es un misca de sistemes ventosa e pluvosa de presa basa de la sude-ueste, e periodos stable de presa alta cual produi un clima solosa e calda (cual dura usual tra no plu ca des dias, an tal).
Arciteta
edita
La parte la plu vea de la site interna de Kobenhavn es comun nomida Middelalderbyen ("la site medieval"). An tal, la area la plu distinguida es Frederiksstaden, cual ia developa en la rena de Frederick 5. Lo ave la Palasio de Amalienborg a sua sentro, e es dominada par la cupola de la Eglesa de Marmo e alga casones refinada de la sentenio 18.
La sentro istorial inclui la isola peti de Slotsholmen con la Palasio de Christiansborg e Christianshavn. Sirca la sentro, estra la murones vea, ave un banda de areas abital atraosa (Vesterbro, Inner Nørrebro, Inner Østerbro), xef de la parte final de la sentenio 19.
Nomida "la site de pinaculos" a veses, on conose Kobenhavn per sua orizon vera orizonal, cual es rompeda sola par la pinaculos de eglesas e casteles. La plu tipal es la pinaculo baroca de Vor Frelsers Kirke (la Eglesa de Nos Salvor) cual ave un scalera elica a sua esterna cual visitores pote asende.
Parces
editaKobenhavn es un site verde con multe parces grande e peti.
La Jardin de Re es la jardin de la Castel de Rosenborg e la parce la plu vea e visitada en la site. Sua desinia ia es comensada par Christian 4 en 1606. En cada anio lo aseta plu ca 2,5 miliones de visitores, e en la menses de estate lo es plen de persones ci bani su sol, picnica e fa juas de bal. Lo conteni un esibi permanente de scultas (con alga otras ajuntada en la estate).
Ance en la sentro de la site on trova la Jardines Botanical, cual es spesial notada per sua grupo grande de invernerias donada par J C Jacobsen, la fundor de Carlsberg.
Multe semeteros servi ance como parces cuieta en cual on pote bani su sol o leje. Con sua 54 ectares, Vestre Kirkegaard es la semetero la plu grande en Danmarc. Lo presenta un labirinto de bosces densa, jardines de erba, ruetas serpente, sepes vivente, tombas descurada, monumentos, vias con bordas de arbores, lagos e otra cualias simil.
En Kobenhavn, la politica ofisial es ce, de pos la anio 2015, tota sitadanes va pote ateni un parce o plaia en min ce 15 minutos par pede. Como resulta, on construi aora alga parces nova en areas do spasios verde manca.