Lenape

La lenapes es un grupo de alga tribus de americanes orijinal con cualias compartida de cultur e lingua. Sua propre nom per se sinifia "la popla". Los es ance nomida la lenni lenape ("popla vera") o la delaware (de la rio Delaware, nomida per la governor de la colonia de Jamestown). A la tempo de contata con la europeanes en la sentenios 16 e 17, la lenapes ia vive en un area nomida Lenapehoking, la area sirca e entre la rio Delaware e la sude de la rio Hudson. Esta area es aora New Jersey, Pennsylvania este, e New York sude-este. La lenapes ia parla du linguas relatada de la familia algoncian, unami e munsi. La linguas es estinguida, ma la popla ave ancora un identia. La plu de los abita en Oklahoma, con alga en Kansas, Wisconsin, Ontario, e an en sua locas orijinal.

La lingua lenape es un esemplo eselente de un lingua polisintesal. En esta linguas, on pote comun espresa un frase completa con sola un parola composada de multe prefisas e sufisas cuasi asorbeda en la radis (tipal la verbo). Multe linguas de la americanes orijinal segue esta model. Un otra esemplo es euscara en Europa.

Spele e pronunsia

La alfabeta per lenape:

a ch e h i k l m n o p s sh t u w x y

Vocales

La vocales — a, e, i, o, u — ave du pronunsias: "longa" e "corta", e la corta es indicada par un asentua (`). La e ave ance un pronunsia indicada par du puntos (ë).

a - como elefen "la", engles "bar"
à - como engles "but"
e - como engles "bay"
è - como engles "bet
ë - como engles a en "ago"
i - como elefen "lil", engles "beet"
ì - como engles "bit"
o - como engles "boat"
ò - como engles "bore"
u - como elefen "ru", engles "boot"
ù - como engles "book"

Consonantes

ch - como elefen tx
h - como elefen, engles h
k - como elefen c
l (a la comensa de un parola o entre vocales o ante h o x) - como elefen l
l (a la fini de un parola o ante un otra consonante estra h o x) - como un l, ma sin vocali
m - como elefen m
n - como elefen n
s - como elefen s
sh - como elefen x
s'h - como s segueda par h
t - como elefen t
w - como elefen u consonantal, engles w
x - como rusce x, deutx ch
y - como elefen i consonantal, engles y

Consonantes duple

Lenape ave alga consonantes duple — un nasal e un esplodente — cual ave pronunsias diferente en locas diferente. A la comensa de un parola, los es pronunsiada como vocalida ma no con la nasal (a). A la fini de un parola o en la media de un parola ante un vocale o ante h o x, los es pronunsiada como la nasal e la esplodente vocalida (b). E en la media de un parola o ante cualce consonante esetante h o x, los es pronunsiada como la nasal e la esplodente nonvocalida (c). Con pronunsias en elefen:

- (a) / (b) / (c)
mp - b- / mb / mp
nch - dj- / ndj / ntx
nk - g- / ng / nc
ns - z- / nz / ns
nsh - j- / nj / nx
nt - d- / nd / nt

Asentua

En lenape, la asentua es normal a la vocal en la silaba ante la silaba final. Si la vocal en acel silaba es ë, la asentua es comun a la silaba presedente.

Nomes

Lenape ave du clases gramatical de nomes: animada e nonanimada. La plu de viventes es clasida como animada. Per esemplo:

ahas - corvo
tipas - gal
ila - geror
mwekane - can

Cosas cual ia vive nunca, o cual ia vive nunca autonom, es plu comun nonanimada. Per esemplo:

ahsën - petra
ahpòn - pan
shëmu - corno
salàpòn - pan fritada

On ave alga esetas a esta regulas. Per esemplo:

èmhònës - culier (animada)
hus - balde (animada)
skiko - herba (plural - nonanimada)

Determinantes

Lenape no ave un article de nondefini como "un". Per esemplo:

neyo tipas - me vide un gal

Lenape no ave un article unica de defini, como "la", ma usa parolas plu spesifada:

wa - esta (animada)
na - acel (animada)
yu - esta (nonanimada)
në - acel (nonanimada)

Per esemplo:

wa chulëns - esta avia
na mwekane - acel can
yu lokèns - esta plato
në ahpòn - acel pan

La plurales:

yuki - esta (animada)
nèki - acel (animada)
yuli - esta (nonanimada)
nèl - acel (nonanimada)

Plu esemplos:

sëksu wa pushis - esta gato es negra
seksuwàk yuki pushisàk - esta gatos es negra
sëksu na pushis - acel gato es negra
sëksuwàk nèki pushisàk - acel gatos es negra

Nota como la verbo ("es negra") e la article cambia per coere con la sujeto ("gato").

sëke yu ahsën - esta petra es negra
sëkeyo yuli ahsëna - esta petras es negra
sëke në ahsën - acel petra es negra
sëkeyo nèl ahsëna - acel petras es negra

Plurales

La fini plural per nomes animanda es -àk. Per esemplo:

pushis > pushisàk - gatos
tipas > tipasàk - gales
ahas > ahasàk - corvos
èshkansh > èshkanshàk - agos

A veses, la fini cambia per acorda con regulas de fonotatica. Per parolas animada cual fini con -e, la plural es -yok. Per esemplo:

mwekane > mwekaneyok - canes
uche > ucheyok - moscas
amëwe > amëweyok - abeas

La plural regular per nomes nonanimada es -a. Per esemplo:

ahsën > ahsëna - petras
ahpòn > ahpòna - panes
lokèns > lokènsa - platos
salàpòn > salàpòna - panes fritada

Comun cuando la fini plural es ajuntada a un parola cual fini en -w, la -w e la -a combina per deveni -o. Per esemplo:

skikw > skiko - folias de erba

Verbos

Verbos en lenape es multe plu difisil ce los en elefen. Verbos es la parola la plu importante en un frase. A veses, los es la frase completa. Normal, un verbo ave un prefisa e asta des locas per sufisas. Lo es rara ce tota esta locas es plenida con un sufisa, ma ses sufisas es comun.

prefisa - RADIS - 1 - 2 - 3 - 4 - 5a - 5b - 6 - 7 - 8 - 9

Prefisas

La prefisa indica la categoria de person asosiada con la verbo. La plu comun, esta es la sujeto/ajente, ma a alga veses, esta es la ojeto/pasiente:

n-mitsi - me come
k-mitsi - tu come

Como elefen, lenape no distingui seso per sua pronomes de person tre. La indicante de person tre es tipal un sufisa, no un prefisa.

Sufisas

Loca 1. Asi es la sufisa cual indica esce la ata es (a) direta (movente de la prefisa a la sufisa) o (b) inversa (movente de la sufisa a la prefisa):

(a) neyo

n-new-a-w
me-vide-(direta)-el
me vide el

(b) neyùkw

n-new-ëk-w
me-vide-(inversa)-el
el vide me (me es videda par el)

Nota ce la pronunsia no es sempre la mesma como la strutur a su. La regulas varia de un parola a un otra.

Loca 2. Asi es la sufisas cual indica esce la sujeto es (a) peti (-ti) o (b) desplasente (-shi):

(a) kawitu

kawi-ti-w
dormi-(peti)-el
la peti dormi

(b) kawishu

kawi-shi-w
dormi-(desplasente)-el
la person desplasente dormi

Loca 3. Asi es la sufisa plurali -hëti, usada per verbos en proposas suordinada e como nomes:

pahtite

pa-hëti-t-e
veni-(plural)-el-(sujuntiva)
si los veni

Loca 4. La sufisa la plu comun en loca 4 es la sufisa de nega, cual es en sua forma pleni -uwi-, ma cual es frecuente cortida en modos diversa. Tipal, la sufisa es reduida a -i-. La verbo negativa es normal presededa par ku ("no"):

(a) noni

n-wani
me-oblida
me oblida

(b) ku nonii

ku n-wani-wi
no me-oblida-(nega)
me no oblida

Loca 5. Loca 5 es divideda en du partes. La prima (5a) ave la indicante de person cual, en atas direta, representa la ojeta/pasiente de la ata. La otra (5b) indica la plurali de la person de la prefisa, cual es la sujeto/ajente:

(a) npakama

n-pakam-a-w
me-colpa-(direta)-el
me colpa el

(b) npakamawëna

n-pakam-a-w-nan
me-colpa-(direta)-el-(plurali de prefisa)
nos colpa el

Donce, en esemplo a, la sufisa de 5a indica ce la ojeto/pasiente de la ata es la person tre, el. La mesma es vera en esemplo b do, en ajunta, la sufisa de 5b indica ce la person de la prefisa es plural ("nos"). Si nos pone la sufisa de inversa en loca 1, la flue de la ata es reversada, e la sufisa de 5a es la sujeto/ajente, e la prefisa es la ojeto/pasiente:

(a) npakamùkw

n-pakam-ëk-w
me-colpa-(inversa)-el
el colpa me

(b) npakamùkuna

n-pakam-ëk-w-nan
me-colpa-(inversa)-el-(plurali de prefisa)
el colpa nos

Loca 6. Asi es la indicante de la tempo pasada. Esta ia es comun usada en la sentenio 19, ma es usada sola en alga espresas fisada en la sentenio 20. En la plu de situas, la tempo no es espresada ma es comprendeda par la situa.

(a) mitsup

mitsi-w-p
come-el-(pasada)
el come

(b) mitsupane

mitsi-w-pan-e
come-el-(pasada)-(sujuntiva)
si el ia come

Esta sufisa es cortida cuando lo aveni en la loca final, ma reteni sua forma plen si lo es segueda par un otra sufisa.

Loca 7. La sufisas de loca 7 ave tre funsionas. (a) La plu comun es indica la plural de la person de loca 5a. (b) Cuasi egal comun es la indicante de un person periferial. Esta es usada per evade la confusa en frases como "Jo e Bil ia es jua a futbal cuando el colpa el". La person du (Bil) es indicada par esta sufisa. (c) Min comun, la sufisa indica un person ci es mor o psicolojial asente, como cuando el dormi.

(a) npakamawënanak

n-pakam-a-w-nan-ak
me-colpa-(direta)-el-(plurali de prefisa)-(plural animada)
nos colpa los

Nota como la prefisa n- ("me") con 5b -nan combina per crea "nos", e 51 -w ("el") con 7 -ak combina per crea "los".

(b) pwënao

w-pën-a-w-a
el-regarda-(direta)-el-(person periferial)
el (presedente notada) regarda el (un otra person)

(c) kawiyo

kawi-w-a
dormi-el-(asente)
el dormi

naka nkahesa

naka n-kahes-a
morida me-madre-(asente)
me madre morida

Loca 8. La sufisa la plu comun en loca 8 es -e, la indicante de la sujuntiva:

pahite

pa-hëti-t-e
veni-(plural)-el-(sujuntiva)
si los veni

enta pahtite

enta pa-hëti-t-e
cuando veni-(plural)-el-(sujuntiva)
cuando los veni

Loca 9. Asi es la indicante -ch de la tempo de futur:

nëmitsich

n-mitsi-ch
me-come-(futur)
me va come

Fonte

Lenape Talking Dictionary