Linguas cariban

La linguas cariban es un familia de linguas de America Sude. Los es sperdeda tra la partes norde de la continente, de la boca de la Rio Amazona a la Andes de Colombia, ma ance an Brasil sentral. Linguas cariban es multe prosima a lunlotra. On ave sirca 24 a 36 linguas, dependente de cual es videda como un dialeto. La plu es ancora parlada ma comun par sola alga sentos de parlores. La sola con plu ca alga miles es Macuxi, cual ave 30,000. La familia cariban es bon conoseda en la mundo linguistica, partal car la ordina de parolas de Hixcariana es ojeto-verbo-sujeto, cual ia es crededa en la pasada como nonesistente en linguas umana.

mapa de la linguas caribe

Alga anios ante la ariva de la esplorores espaniol prima, la caribes ia invade e ocupa la Antiles minor e matada, desloca, o asimilada la arauaces ci ia abita la isolas. La lingua resultante ia es nomida caribe ma ia es xef arauac en natur. Esta ia es car la omes caribe ci invade ia mata la omes arauac e ia prende la femes arauac como sposas, ci alora ia pasa sua lingua a sua enfantes. Per un periodo, arauac ia es parlada par la femes e enfantes, e caribe par la omes adulte, ma la situa ia es nonstable. Cuando cada jenera de xicos caribe-arauac ia ateni adultia, los ia aprende min caribe asta sola vocabula basal e alga elementos gramatical ia resta. Acel "caribe isolal" ia deveni estinguida en la Antiles minor en la 1920 ma survive en la forma de garifuna (o caribe negra), en America sentral. La distingui de seso ia redui a sola un poca parolas. Dominica es la sola isola en la Caribe cual reteni alga de sua popla precolumbian, la indianes caribe, sirca 3000 de ci vive sur la costa este de la isola.