Jeneral, la lojica es la studia de la sistemes de razona, pd la sistemes de razona cual un esente intelijente pote usa per razona. La lojica servi per dise cual formas de dedui es asetable e cuales no. Tradisional, on studia lo como ramo de filosofia, ma on pote ance regarda lo como un ramo de matematica o informatica.

Etimolojia edita

Lojica veni de la parola elenica clasica λόγος (logos), cual sinifia parola; la diseda. Plu tarda, la sinifia ia estende per inclui pensa; razona.

Esplica edita

Lingua pote es usada en modos diversa: per demanda alga cosa, per avisa algun, per descrive alga cosa cual nos ia vide ja, o simple per espresa un sensa, como cuando nos cria si nos toca foco. La lojica es un usa spesial de la lingua cual es relatada con la sinifia e la esatia de lo cual nos dise. Concreta, lo es la disiplina cual studia la strutur, funda e usa de la espresas de la sabe umana.

Aristotele, ci on regarda como la abrivia en la studia de lojica e como la creor de sua forma clasica, ia descrive lojica como "la arte de razona coreta e vera". A sua libros cual trata temas de lojica, Aristotele ia dona la titulo "Organon", cual sinifia "strumento". Esta obras consentra se a la studia de la silogisme, un conjunta de tre suposas o judis cual ave entre se la seguente relata: la numero tre es derivada (deduida o concluida) de la du otras. La du otras es nomida "premisas" e la ultima es la "conclui". Un esemplo clasica de silogisme es: "Tota umanas es mortal; Socrate es un umana; donce, Socrate es mortal".

Seguente la defini clasica de lojica, nos pote dise ce lo trata la siensa – o la studia – cual trata la razonas coreta. Tra multe sentenios on ia developa un comprende importante de la razonas noncoreta o falsa, a multe veses con intende de confonde la razona o la debate con otra disputores. Vide Falasias per plu detalias.

Oji, con grasias a la laboras de multe matematicistes e filosofistes, entre ci nos nota George Boole (1815–64), Giuseppe Peano (1858–1932), Georg Cantor (1845–1918), Gottlob Frege (1848–1925) e Bertrand Russell (1872–1970), on ia developa lojica simbolal o lojica formal, cual es distinguida par la usa de un lingua formal (simbolal), como lo cual es usada en matematica, pe alga regulas esata de cambia entre proposas diferente. En lo nos pote distingui tre ramos xef: teoria sintatical, teoria semantical e teoria axiomatical.

En ajunta a lojica clasica (simbolal), otra lojicas diversa esiste, pe lojica difusada, lojica probablial, lojica modal e lojicas nonmonotonica.