Mofo

Un mofo es un fungo cual developa en la forma de filetas multiselulal nomida hifas. En contrasta, fungos cual pote adota un abitua de crese monoselulal es nomida fermentos.

Un mandarina mofosa

Mofos composa un cuantia de spesies fungal multe grande e tasonomial diversa en cual la crese de hifas resulta en descolori e un pare neblosa, spesial sur comedas. La rede de esta hifas tubo e raminte, nomida un miselio, es videda como un organisme singular. La hifas es jeneral transparente, e la miselio pare como filetas blanca, neblosa, e multe delicata sperdeda sur un surfas. Mures dividente (septa) pote limita compartes juntada longo la hifas, cada conteninte un o multe nucleos jenetical identical. La texe polvosa de multe mofos es cuasada par la produi suprapasante de sporas nonsesal (conidios) formida par difere a la finis de la hifas. La modo de formi e la forma de esta sporas es tradisional usada per clasi mofos. Multe de esta sporas es colorida, cual resulta en la mofos plu vidable a esta paso en sua sicle de vive.

Mofos es videda como microbios e no formi un grupo tasonomial o filojenetical, ma pote es trovada en la divides Glomeromycota e Ascomycota.

Mofos causa biodegrada de materias natural, cual pote es nondesirada cuando lo deveni mali de comedas o dana a poseses. Los ance ave roles importante en biotecnolojia e la siensa de comedas en la produi de comedas variosa, bevida, antimicrobials, farmacolojia, e enzimas. Alga maladias de animales e umanas pote es causada par alga mofos; maladias pote resulta de sensosia a sporas de mofo, de la developa de mofos patojenal en la corpo, o de la efetos de composadas nosiva comeda o enspirada (micotosinas), produida par mofos.

Jeneras comun de mofos:

• Acremonium
• Alternaria
• Aspergillus
• Cladosporium
• Fusarium
• Mucor
• Penicillium
• Rhizopus
• Stachybotrys
• Trichoderma
• Trichophyton