Nauatl

Nahuatl Nahuatl
Parlada en:
Area:
Tota parlores:	1,5 milion
Familia:	Linguas uto-asteca
State ofisial
Lingua ofisial de:	Mexico
Regulada par:
Sifras
ISO 639-1:	[1]
ISO 639-2:	nah
ISO 639-3:	[2]
SIL:	[3]
Mapa
La areas do es parlada
Vide ance: Lingua – Lista de linguas

Nauatl es un lingua en la ramo nauan de la familia de linguas uto-asteca. Lo es parlada par sirca 1.5 milion popla naua, la plu de ci abita Mexico sentral. Nauatl ia es parlada en Mexico sentral de a min la sentenio sete. Lo ia es la lingua de la popla asteca, ci ia domina Mexico sentral en la eda posclasica de istoria mesoamerican. Pos la concista par la espanioles, nauatl ia deveni un lingua de leteratur, con multe jornales istorial, poesias, gramaticas, testos de governa, etc, en la sentenios 16 e 17. Lo es entre la linguas american orijinal la plu studiada.

Oji, varias de nauatl es parlada un comunias sperdeda, per la plu parte en la areas campanial tra Mexico sentral e longo la costa. Los ave multe diferes e alga es noncomprendable par otras. Tota ia es influeda en parte par espaniol. Par la Leje jeneral de diretos de la poplas nativa (Ley General de Derechos Lingüísticos de los Pueblos Indígenas) de 2003, nauatl e la otra 63 linguas nativa de Mexico ia es reconoseda como linguas nasional en la areas en cual los es parlada.

Nauatl es un lingua con un morfolojia complicada, con la cualias de polisintese e aglutina. Multe parolas ia es adotada par espaniol e alora par otra linguas como engles. La plu de esta parolas refere a cosas a cual la espanioles ia es introduida par la nauatl. Per esemplo, en lfn, nos ave avocado, coiote, xili, xocolada, e tomate.

An si la orijina de la nauatles no es serta, la plu de linguistes acorda ce la familia de linguas uto-asteca ia veni de la sude-ueste de la SUA. La popla ia migra en alga ondas a la sude. Sirca la anio 500, la parlores de proto-nauatles ia entra Mexico sentral. Asi, la linguas de la familias maian, oto-manguean, e mixe-zoquean ia coesiste per milenios, e nauatl ia adota alga de la cualias de esta linguas, como nomes de relata, prestas traduida, etc.

Comensante en la sentenio sete, la nauas ia ateni potia en Mexico sentral. La popla de la cultur de Toltecs de sentenio des ia es posible nauatles. Los ia es dominante en la Vale de Mexico en la sentenio 11. Un grupo ia entra la isola en lago Texcoco e ia comensa domina la tribus ensircante. Esta grupo, nomida la Mexica, ia fundi la impero Tenochtitlan. Se potia ia estende tra America sentral, e nauatl ia deveni la lingua franca de la mercatos e aristocratas ala.

Fonolojia

La fonolojia de la linguas naua ia cambia tra la edas de la nauatl clasica. Per esemplo, la fonem /t͡ɬ/ ia cambia en multe desendentes a /l/ o /t/; alga desendentes no distingui entre vocales corta e longa; otras ia developa un asentua de tono; e multe ia adota fonemes de espaniol, como /b, d, g, f/.

Consonantes	Labial	Alveolal sentral	Alveolal ladal	Palatal	Velal simple	Velal labial	Glotal
Nasal	m	n
Esplodante	p	t			k	kʷ	ʔ
Africante		ts	tɬ	tʃ
Continuante		s	l	ʃ			(h)
Semivocal				j		w

Vocales	Anterior	Sentral	Posterior
Alta	i, i:
Media	e, e:		o, o:
Basa		a, a:

La fonem glotal (nomida la saltillo) aveni sola pos vocales. En multe dialetos moderna, lo es realida como /h/, ma otras reteni la /ʔ/ de nauatl clasica. La plu de dialetos ave la asentua sur la silaba ante la final. Ance, en multe dialetos, consonantes diseda es nondiseda cuando final o en grupos con otra consonantes. Per esemplo, /j/ deveni /ʃ/, /w/ deveni /h/ o /ʍ/, e /l/ deveni /ɬ/. En alga dialetos, cuasi tota consonantes prima de un grupo de consonantes deveni /h/. A alga veses, consonantes nonvosida deveni vosida entre vocales.

La fonotatica de nauatl es simple, con un masima de un consonante comensante e un final. Cuando un morfem cual fini con un consonante es segueda par un morfem cual comensa con un consonante, un de la du consonantes comun es asorbeda par la otra:

• ch + y = chch
  • pe oquich-(tli) "om" + -yō-(tl) "-ia" = oquichchōtl "coraje"
• l + tl = ll
  • pe cal- "casa" + -tli (absoluta) = calli "casa"
• l + y → ll
  • pe cual-(li) "bon" + -yō-(tl) "-ia" = cuallōtl "bonia"
• x + y → xx
  • pe mix-(tli) "nube" + -yoh "-osa" = mixxoh "nubosa"
• z + y → zz
  • pe māhuiz-(tli) "teme" + -yō-(tl) "-ia" = māhuizzōtl "respeta"

Multa varias de nauatl ave dupli produosa. Par dupli la silaba prima de un radis, un parola nova es creada. En nomes, esta es comun usada per forma plurales, pe tlaːkatl "om" > tlaːtlaːkah "omes", ma lo es ance usada per crea diminuintes, onorantes, o derivas. En verbos, dupli es comun usada per crea un forma repetente, pe kitta "el vide lo", kihitta "el regarda lo repetosa". Gramatica

La linguas nauatl es aglutinante e polisintesal e usa multe composada, corpora, e deriva, cual es per dise, los pote ajunta prefisas e sufisas a un radis per crea parolas longa, e un sola parola pote es un frase completa. Per esemplo, esta verbo mostra como un verbo es marcada per se sujeto, pasiente, ojeto, e ojeto nondireta:

ni-mits-teː-tla-makiː-ltiː-s

me-tu-algun-algacosa-dona-CAUSAL-FUTUR

"me va fa ce algun dona alga cosa a tu"

Nomes

La nom nauatl ave un strutur alga complicada. La sola infletas obligada es per cuantia (singular e plural) e per posese (par prefisas per "mea", "tua", etc). nauatl no usa casos o sesos, ma nauatl clasica e alga dialetos moderna distingui entre animada e nonanimada nomes. En nauatl clasica, sola nomes animada ave un forma plural, e nomes nonanimada es noncontable (como parolas en lfn como "acua" e "pan"). Aora, per multe dialetos, tota nomes pote ave sua formas plural.

En la plu de dialetos, nomes singular e nonposeseda ave la sufisa "asoluta", plu comun, -tl pos vocales, -li pos l, e -tli pos otra consonantes. Nomes cual pote es pluralida usa un de la sufisas per asoluta plural, -tin o -meh. Alga formas plural es noncoerente o usa la dupli de silabas.

Nom singular:

kojo-tl

coiote-ASOLUTA

"coiote" (nauatl clasica)

Nom animada plural:

kojo-meh

coiote-PLURAL

"coiotes" (nauatl clasica)

Nom anima plural con redupli:

ko:-kojo-h

DUPLI-coiote-PLURAL

"coiotes" (nauatl clasica)

Nauatl distingui entre formas poseseda e nonposeseda de nomes. La sufisa asoluta no es usada con nomes poseseda. En tota dialetos, nomes poseseda ave un prefisa cual acorda con la cuantia e person de la posesor. La formas plural fini con -wa:n.

• person 1 singular: no-, 'mea'
• person 2 singular: mo-, 'tua'
• person 3 singular: ī-, 'sua'
• person 1 plural: to-, 'nosa'
• person 2 plural: anmo-, 'vosa'
• person 3 plural: īn-, 'sua'
• posesor nonserta: tē-, 'sua' (de algun)

Nom asoluta:

kal-li

casa-ASOLUTA

"casa" (nauatl clasica)

Nom poseseda:

no-kal

mea-casa

"mea casa" (nauatl clasica)

Nom poseseda plural:

no-kal-wa:n

mea-casa-PLURAL

"mea casas" (nauatl clasica)

Plu esemplos:

• Absoluta singular
  • cihuātl - "fem"
  • oquichtli - "om"
  • totōlin - "pavo"
  • tlācatl - "person"
• Absoluta plural
  • cihuāh - "femes"
  • oquichtin - "omes"
  • totōlmeh - "pavos"
  • tlatlācah - "persones"
• Poseseda singular
  • nocihuāuh - "mea fem"
  • noquich - "mea om"
  • nototōl - "mea pavo"
  • notlācauh - "mea person"
• Poseseda plural
  • nocihuāhuān - "mea femes"
  • noquichhuān - "mea omes"
  • nototōlhuān - "mea pavos"
  • notlācahuān - "mea persones"

Nauatl no ave casos gramatical, ma usa nomes de relata per descrive relatas spasial (e otras). Esta morfemes no aveni sola ma debe sempre aveni pos un nom o un prefisa de posese. Los es ance nomida posposadas o sufisas de loca. En alga modos, esta construis sembla casos de loca. La plu de dialetos moderna ia adota preposadas de espaniol.

Usas de posposada -pan con un prefisa de posese:

no-pan

mea-en/sur

"en/sur me" (nauatl clasica)

iː-pan

sua-en/sur

"en/sur lo" (nauatl clasica)

iː-pan kal-li

sua-en casa-ABSOLUTA

"en la casa" (nauatl clasica)

Per usa con un nom presedente:

kal-pan

casa-en

"en la casa" (nauatl clasica)

Nomes composada es comun formida par combina du o plu radises nomin, o par combina un radis nomin con un radis ajetival o verbal.

Nauatl ave ance un sufisa, -tzin, per indica respeta:

• cihuā-tl "fem" + tzin + tli (absoluta) = cihuātzintli "fem (diseda con respeta)"

Alga nomes es no sola un posese, ma un posese nonalienable, cual es per dise, un parte de la posesor. Per esemplo, ambos nonac e nonacayo (formas de posese de nacatl) sinifia "mea carne", ma nonac refere a carne cual on ave per come en cuando nonacayo refere a la carne de mea corpo.

Nauatl ave ance sufisas derivada:

• -tia causa ce un nom deveni un verbo cual sinifia "furni con X" o "deveni X".
• -huia causa ce un nom deveni un verbo cual sinifia "usa X" o "furni con X".
• -yo:tl causa ce un nom deveni un nom con la sinifia astrata de -ia.
• -yoh causa ce un nom deveni un nom con la sinifia "plen de", "con multe de", -osa.

Pronomes

Nauatl distingui jeneral tre persones, cada en la singular e la plural. Un dialeto - la Isthmus-Mecayapan - ia developa un distingui entre "nos" incluinte e escluinte. Tota persones, estra "me" e "nos (escluinte)" ave formas onorante. "Nos" (incluinte) ave un forma onorante car los inclui en sua sinifia la idea de "tu" o "vos".

• nehwa:tl - me
• tehwa:tl - tu
• tehwa:tzin - tu, onorada
• yehwatl - el, lo
• yehwa:tzin - el, lo, onorada
• tehwa:ntin - nos
• tehwa:ntzihtzin - nos (incluinte)
• amehwa:ntin - vos
• amehwa:ntzitzin - vos, onorada
• yehwa:ntin - los
• yehwa:ntzihtzin - los, onorada

Verbos

La verbo en nauatl es complicada e infletada per multe categorias gramatical. La verbo es composada de un radis, prefisas, e sufisas. La prefisas indica la person de la sujeto e la person e cuantia de la ojeto e ojeto nondireta, e sufisas indica la tempo, aspeta, modo, e cuantia de la sujeto.

Asi es esemplos de usa de verbos:

• ticihuātl - "tu es un fem" (con un predica nomin cihua:tl, "fem")
• ticochi - "tu dormi" (con un verbo nontransitiva -cochi, "dormi")
• ticochih - "nos dormi" (con un verbo nontransitiva -cochi, "dormi")
• tiquimittah - "nos vide los" (con un verbo transitiva, -itta-, "vide")

La plu de dialetos distingui tre tempos - presente, pasada, e futur - e du aspetas - aspeta perfeta e nonperfeta. Alga dialetos ajunta aspetas progresante o abitual. Tota distingui a min la modo simple e la modo de comanda, e alga ave ance la modos de espera e de probita.

La plu de dialetos ave alga modos per cambia la dirije de un verbo. nauatl clasica ia ave un vose pasiva, ma la plu de varias moderna no ave lo. Ma multe varias moderna ave voses de causa e de aplica. Ance, multe dialetos permete la forma de composadas verbal.

Nauatl clasica e alga dialetos moderna pote infleta la verbo per mostra la dirije de la ata a o de la parlor. Alga ave ance infletas per mostra intende e ideas como "vade per" o "veni per", "vade, fa, e reveni", "fa en cuando vade", "fa en cuando veni", "fa cuando ariva", o "fa repeteda en cuando vade asi e ala".

Afisas per sujeto e ojeto (Ø sinifia no prefisa):

• person 1 singular: ni-, 'me' (sujeto); -nēch-, 'me' (ojeto)
• person 2 singular: ti-, 'tu'; -mitz-, 'tu'
• person 3 singular: Ø, 'el, lo'; -qui-, 'el, lo'
• person 1 plural: ti- (-verbo-) -h, 'nos'; -tēch-, 'nos'
• person 2 plural: an- (-verbo-) -h, 'vos'; -amēch-, 'vos'
• person 3 plural: Ø (verbo-) -h, 'los'; -quim-, 'los'
• person nonserta: -tē-, 'algun, alga cosa'; -tla-, 'algun, alga cosa'

Sufisas de tempo e aspeta:

• Presente: no sufisa
• Pasada abitual: - -:ni
  • niquittāni - "me ia vide el/lo a veses"
  • nipēhuāni - "me ia comensa a veses"
• Pasada: (o:-) -c/h/?/Ø
  • (ō)niquittac - "me ia vide el/lo"
  • ōnipēuh - "me ia comensa"
• Futur: -z
  • niquittaz - "me va vide el/lo"
  • nipēhuaz - "me va comensa"
• Pasada nonperfeta: -ya
  • niquittāya - "me ia es vidente el/lo"
  • nipēhuāya - "me ia es comensante"
• Nonreal: -zquiya
  • niquittāzquiya - "me ia ta vide el/lo"
  • nipēhuazquiya - "me ia ta comensa"
• Pasada perfeta: -ca
  • niquittaca - "me ia vide ja el/lo"
  • nipēuca - "me ia comensa ja"
• Esperante: -cān
  • niquittacān - "ta ce me vide el/lo"
  • nipēucān - "ta ce me comensa"
• contra-permetente: -(h)tin
  • niquittatin - "no permete ce me vide el/lo"
  • nipēucatin - "no permete ce me comensa"

Du verbos pote es combinada con la morfem de lia -ti-.

Per ajunta un otra person o ojeto a la verbo, on pote usa la sufisa -lia:

• niquittilia (me vide lo per el)

On pote ance ajunta un person o verbo a la verbo per indica la ajente de causa, con -tia :

• niquittatia (me fa ce el vide lo, me mostra lo a el)

Un construi pasiva sutrae la sujeto de la verbo e promove la ojeto a la sujeto, usante -lo o -hua :

• quitta (el vide lo) + -lo = quittalo (lo es videda par algun)
• miqui (el mori) + -hua = micohua ("on ave moria", "persones mori)

On pote indica dirijes de un ata con la prefisas -on- e -hua:l :

• on + tlahtoa (parla) = ontlahtoa (el parla a ala)
• hua:l + tlahtoa (parla) = hua:llahtoa (el parla a asi)

Nauatl ave ance du sufisas per indica "move a/de la parlor per fa x":

• qui + itta (vide) + qui = quittaqui (el va veni asi per vide lo)
• qui + itta + co = quittaco (el ia veni asi per vide lo)
• qui + itta + ti:uh = quittati:uh (el va vade ala per vide lo)
• qui + itta + to = quittato (el ia vade ala per vide lo)

Alga sufisas crea nomes de verbos:

• tla- (alga cosa) + ixca (rosta) + -lli (l+tli) = tlaxcalli (alga cosa rostada, un tortilia)
• tla- + ihcuiloa (scrive, desinia) + -lli = tlahcuilolli (un scrive, un desinia)

• miqui (mori) + -liztli = miquiliztli (moria)
• tlahcuiloa (scrive alga cosa) + -liztli = tlahcuiloliztli (la conseta de scrive o de es un scrivor)

• ichtequi (fura) + -qui = ichtecqui (un furor)
• tlahua:na (ebri) + -qui = tlahua:naqui (un ebra)

• miqui (mori) + ni = miqui:ni (un mortal)
• cuacua (morde) + ni = cuacua:ni (algun ci on sabe pote morde abitual)

Sintatica

Alga linguistes sujesta ce nauatl es un lingua nonordinal, cual es per dise ce la ordina de parolas es, per la plu parte, libre. Lo es ance un lingua "pro-cade" e permete la omete de cualce nomes o pronomes, e pronomes es usada sola per asentua. Otra linguistes prefere ce nauatl clasica es verbo-prima, con libria grande per cambia la ordina per indica foca o tema.

Alga nom o verbo en la lingua pote es un frase completa. Per esemplo, la verbo tzahtzi sinifia "el cria" e no sola "cria", e titzahtzi sinifia "tu cria". En la mesma modo, cone:tl sinifia "lo es un enfante" e no sola "enfante", e ticone:tl sinifia "tu es un enfante. On pote dise ce tzahtzi in cone:ti sinifia no simple "la enfante cria" ma "el cria, el ci es un enfante".

Numeros

Nauatl clasica ia ave un base-20 sistem. En la scrive pre-columbian, 20, 400 (20²), e 8000 (20³) ia es representada par un bandera, un pluma, e un saco, en acel ordina.

• 1: cē (deveni cem- cuando prefisada)
• 2: ōme (deveni ōm- cuando prefisada)
• 3: ēyi/yēi/ēi/yēyi (deveni (y)ē- or (y)ēx-cuando prefisada)
• 4: nāhui (deveni nāhu-/nāuh- cuando prefisada)
• 5: mācuīlli (derivada de māitl "mano")
• 6: chicuacē (chicua- "5" + cē "1")
• 7: chicōme (chic- "5" + ōme "2")
• 8: chicuēyi (chicu- "5" + ēi "3")
• 9: chiucnāhui (chiuc- "5" + nāhui "4")
• 10: mahtlāctli (de māitl "mano" + tlāctli "tronco")
• 15: caxtōlli
• 20: cēmpōhualli (de cēm- "1" + pōhualli "un conta", de pōhua "conta")
• 400: cēntzontli (de cēn- "1" + tzontli "capelo")
• 8000: cēnxiquipilli (de cēn- "1" + xiquipilli "saco")

Multiples de 20, 400 o 8,000 es formida par sustitui un otra numero per cēm- or cēn- , pe, ōmpōhualli "40" (2×20), mahtlāctzontli "4,000" (10×400), nāuhxiquipilli "32,000" (4×8,000).

La numeros entre los a supra -11 a 14, 16 a 19, 21 a 39, etc - es formida par ajunta la numero plu peti a la numero plu grande. La numero plu peti es prefisada con om- or on-, o, en la caso de clases plu grande, con īpan "sur lo" o īhuān "con lo". Pe mahtlāctli oncē "11" (10+1), caxtōlonēyi "18" (15+3), cēmpōhualmahtlāctli omōme "32" (20+10+2); cēntzontli caxtōlpōhualpan nāuhpōhualomōme "782" (1×400+15×20+4×20+2).

Nauatl ia usa ance parolas de clasi, como Xines e Japanes. Esemplos:

• -tetl per ojetos peti e rondo (leteral "roca")
• -pāntli per conta linias
• -tlamantli per cosas cual on pote plia
• -ōlōtl per cosas ronda e estendeda (leteral "basto de mais")

Numeros ordinal es formida par presede la numero con ic- o inic-.