Nebulosa

Un nebulosa (latina per "nebla" o "nube") es un nube interstelal de polvo, idrojen, elio, e otra gases ionida. Orijinal, nebulosa ia es un nom per cualce ojeto rarida en astronomia, incluinte galasias estra la Via Letin. La Galasia Andromeda, per esemplo, ia es refereda como la Nebulosa Andromeda, e galasias spiral ia es nomida nebulosas spiral, ante la natur vera de galasias ia es confirmada en a sentenio 20 temprana par Vesto Slipher, Edwin Hubble, e otras.

La Colonas de Crea, en la Nebulosa Agila (NGC 6611)

La Nebulosa Orion (NGC 1976)

La Nebulosa Oio de la Gato (NGC 6543)

La plu de nebulosas es multe grande, e algas es sentos de anios de lus en diametre. Un nebulosa cual es apena vidable a la oio umana de Tera, ta apare plu grande, ma no plu briliante, videda de prosima. La Nebulosa Orion, la nebulosa la plu briliante en la sielo cual ocupa un rejion du veses la diametre de la Luna plen, pote es videda par la oio, ma no ia es notada par astronomistes de edas pasada. An si nebulosas es plu densa ca la spasio cual ensirca los, la plu es multe min densa ca cualce vacua creada sur Tera. Un nebulosa la grandia de Tera ta ave un masa intera de sola alga cilogrames. Multe nebulosas es vidable resultante de fluorese causada par stelas calda incluida en la nebulosa. Otras es tan rarida ce los pote sola es detetada par usa cameras con esposas longa e filtros spesial. Alga nebulosa es variante luminada par stelas variante "T Tauri". Nebulosas es comun rejiones en cual stelas es formida, como la Colonas de Crea en la Nebulosa Agila. En esta rejiones, la formas de gas, polvo, e otra materias fusa con lunlotra per formi rejiones plu densa, cual atrae an plu materia, e ultima va deveni sufisinte densa per formi stelas. La resta de la materia es alora usada per formi planetas e otra ojetos de un sistem de stela.