Pandemica de gripe de 1918
La pandemica de gripe de 1918 (a veses nomida "la gripe espaniol"), cual dura de janero 1918 a desembre 1920, ia es un pandemica estrema matante, la prima de du pandemicas causada par la virus H1N1. Lo ia infeta sirca 500 milion persones tra la mundo, incluinte popla a isolas distante de la Mar Pasifica e popla en la Artica. Lo resulta con la mori de 50 a 100 milion persones o 3% a 4% de la cuantia de umanas en la mundo, e donce un de la desastres natural la plu matante en la istoria de umania.
Maladias infetosa ia limita ja la longia de vive en la sentenio 20 temprana. Ma en la anio prima de la pandemica, la longia de vive en la SUA ia cade par sirca 12 anios. La plu de la erutas de gripe mata nonproportial enfantes, persones vea, o pasientes ja debilida. Par contrasta, la pandemica de 1918 ia mata adultes joven presedente sana.
Siensistes ofre alga esplicas posible per la frecuentia alta de mori en la pandemica de gripe de 1918. Alga rexercas sujeste ce la varia spesifada de la virus ia ave un natur noncomun atacosa. Un grupo de rexercores ia recovre la virus de la corpos de vitimes jelada, e ia trova ce la transfeta en animales causada un fali de respira rapida progresante e un mata par un "tempesto" sitocinal (un sindrom de la relasa de sitocina sever, un reata estrema de la sistem de imunia). Lo ia es sujesteda ca la reatas forte de imunia de adultes joven ta ruina la corpo, en cuando la sistemes plu debil de enfantes e adultes plu vea ia resulta en min moris en esta grupos.
Investigas plu resente, fundida sur reportas medical orijinal de la periodo, ia trova ce la infeta virusal mesma no ia es plu atacosa ca cualce gripe presedente, ma ce la situa spesial de la epidemica (malnuri, hospitales e campos medical tro folida, e mal ijenia) ia promove la suprainfeta baterial cual mata la plu de la vitimes, tipal pos un tempo alga longida morinte en la leto.
Datos istorial e epidemiolojial no es sufisinte per identifia la orijina de la pandemica. Lo ia es implicada en la eruta de ensefalite letarjiosa en la desenio de 1920.
Per manteni autofida, sensurores geral ia minima la reportas temprana de maladia e mortalia en Deutxland, la Reni Unida, Frans, e la SUA. Jornales dial ia es libre per reporta la efetos de la epidemica en Espania (incluinte la maladia grave de Re Alfonso 13), cual ia es neutral en la gera. Esta ia crea un impresa falsa de Espania como afetada plu sever ca otra nasiones, cual resulta en la nometa per la pandemica de "gripe espaniol".