Pax Romana

Pax Romana (latina per "pas roman") es un periodo de sirca 200 anios en la istoria roman cual es identifiada con pas e stablia creseda e sustada, an si no sin alga geras, estendes, e revoluis. Lo es tradisional datida como comensante de la asede de Cesar Augusto, fundor de la Prinsia Roman, en 27 aec, e concluinte en 180 ec con la mori de Marco Aurelio, la "bon imperor" final. Car lo ia es comensada par Augusto con la fini de la gera final de la Republica Roman, lo es a veses nomida la Pax Augusta.

En esta periodo, la Impero Roman ia ateni sua estende de teritorio la plu grande, e la cuantia de sua abitores ia ateni un masima de 70 milion persones, un tri de la popla de la mundo. Seguente Cassio Dio, la rena tiranal de Imperor Commodo, seguente par la anio de sinco imperores e la crise de la sentenio tre, marcada la desende "de un rena de oro a un de fero e osidi".

La nota prima de la terma Pax Romana ia apare en un scrive par Seneca joven en 55 ec. La conseta ia es multe influente, e la sujeto de teorias e atentas per copia lo en edas seguente. Arnaldo Momigliano ia nota ce "Pax Romana es un formula simple pe propaganda, ma un sujeto difisil per rexerca." Vera, la Pax Romana ia es rompeda par la geras con la iudis, la geras partian, la geras dacian, la batalias variosa con la tribus germanica incluinte lo de la Foresta Teutoburg, e la gera de Boudica en Britan en 60 o 61.

La Pax Romana ia comensa cuando Octavian (pd Augusto) ia vinse Marco Antonio e Cleopatra en la Batalia de Actio a 2 setembre 31 aec e ia deveni imperor. Car un presedente bon de un rena par un om no ia esiste, Augusto ia crea un junta de la maniates militar la plu grande e pone se como la sitadan prima. Par lia esta maniates en un alia, el ia elimina la vista de un gera interna.

An si la geras interna ia fini, combate continua en Hispania e en la Alpes. Augusto ia clui la Portones de Jano (un rituo cual ia indica ce Roma ia es a pas) tre veses, en 29, 25, e posible 13 aec, cuando pas ia es proclamada cuando Augusto e Agrippa ia reveni de pasi la provinses. La comanda per construi la Ara Pacis (un altar de pas augustan) ia es sin duta un parte de esta proclama.

Augusta ia fasa un problem de institui pas como un modo de vive per la romanes, ci ia es en geras con un potia o un otra continuante per 200 anios. Romanes ia vide pas, no como la asentia de gera, ma la situa rara cual esiste cuando tota oposores ia es bateda e ia perde la capasia per resiste. Augusto ia debe convinse la romanes ce la ricia los pote ateni en la asentia de gera ia es plu bon per la impero ca la rica e onor posible atenida par geras riscosa. El ia susede par propaganda capas. Imperores seguente ia segue sua gida, a veses produinte rituos estravagante lodante la beneficas de la Pax Romana.

Pos la mori de Augusto en 14 ec, la plu de sua susedentes como imperores roman ia continua sua politicas. La sinco imperores de la Pax Romana ia es videda como la "sinco imperores bon".

Comersia roman en la Mediteraneo ia crese en la Pax Romana. La romanes ia naviga este per oteni sedas, joalas, onix, e spises. La popla ia benefica de la profitas e revenus grande cual resulta de la comersia. La Pax Romana ia es contempora con la Pax Sinica de la mundo este par Xina de la dinastia Han. Viaja e intercambia de distantes longa ia es sinifiante stimulada en esta edas.

La conseta de la Pax Romana ia condui istoristes per crea varias de la terma per descrive otra sistemes de pas relativa cual ia es instituida, atentada, o finjeda. Alga varias inclui:

Pax Americana

Pax Britannica

Pax Europaea

Pax Hispanica

Pax Mongolica

Pax Ottomana

Pax Sinica

Pax Khazarica

Pax Syriana

Pax Islamica

Pax Sovietica

Pax Mafiosa

Plu jeneral, la conseta ia es refereda como la pax imperia, pd pas de imperos o plu esata, pas ejemonia. A veses, istorial, pas pote es atenida par ejemonia (domina estendeda par un stato). Un esemplo, la Impero Deutx ia ateni pas de 1871, cual evolui lente a la stato Deutx plu tarda. Como un contra-esemplo, la pas de la impero de Alexandro la Grande ia disolve car la site-statos elinica ia manteni sua identia political e, plu importante, la embrios de sua propre forsas militar.