La poplas dravidian es definida xef par sua linguas dravidian. On ave sirca 245 milion parlores nativa de la linguas dravidian, e los formi la majoria de la abitantes de India sude, e es ance trovada en otra partes de India, e en Pacistan, Afganistan, Bangladex, Maldivas, e Srilanca. La etnicas la plu grande es la telugus de Andhra Pradesh e Telangana, la tamiles de Tamil Nadu, Srilanca, Malaisia, e Singapor, la canadas de Carnataca, la malaialis de Kerala, e la tulus de Carnataca.

La distribui de la poplas dravidian

La linguas dravidian con la cuantia de parlores la plu grande es telugu (తెలుగు), tamil (தமிழ்), canada (ಕನ್ನಡ), malaialam (മലയാളം), brahui (براہوئی), tulu (ತುಳು), gondi e corg. On ave tre sugrupos en la familia de linguas dravidian: norde, sentral, e sude, nomida per sua rejiones en la sucontinente.

Enscrives en telugu a la templo Dharalingeshwara

Protodravidian ia es posible parlada en la Sivilia de la Vale de Indo, cual sujesta ce protodravidian ia estende a min a la milenio 3 temprana, pos cual lo ia fende entre la linguas dravidian variosa. Dravidian sude 1 (incluinte pretamil) e dravidian sude 2 (incluinte pretelugu) ia fende sirca la sentenio 11 aec, con la otra ramos diverjente a sirca la mesma tempo.

La orijinas de la dravidianes es la sujeto de multe rexerca e debate. Los ia es posible nativa a la sucontinente, ma orijinas en, o a min influe de, Asia ueste ia es ance proposada. La Sivilia de la Vale de Indo ia cade en la milenio 2 aec temprana, prosima a la tempo en cual la indoarianes ia entra India norde. La interata de la dravidianes e indoarianes ia comensa no multe pos esta, e la cultur indu aveni no plu tarda ca 500 aec.

En la sentenio 3 aec, renas grande ia developa en India sude. En la eda medieval de India, sindicatos e otra organizas de comersia ia deveni sinifiante en intercambia en Asia sude-este, e en la transmete de sua cultures tra la rejion.

Nataraja, un esemplo de sculta en bronze de la Impero Txola

La artes vidal es dominada par la arciteta stilida de templos en sentros major la imajes sur petra e scultas de bronze. Un sculta datinte de la periodo Txola ia deveni notable como un simbol de induisme.

Cuatro de la linguas dravidian - tamil, canada, telugu, e malaialam - ave tradisiones antica de leteratur. Leteratur en tulu e codava es plu resente. La enscrive dravidian la plu vea es la 76 enscrives en tamil antica sur la mures de cavas en Tamil Nadu, cual dati de la sentenio 2 aec. Estas es scriveda en un varia de la alfabeta brami. La testo longa la plu vea en tamil antica es la Tolkappiyam, un obra sur gramatica e poesia, posible de la sentenio prima aec.

Un dansor dravidian

Leteratur en canada es prima indicada par la enscrive Halmidi, de 450 ce. La enscrive la plu vea en telugu es datida de 575 ec. La prima obra de leteratur es un tradui de parte de la Mahabharata de la sentenio 11. La testo la plu vea en malaialam es un plata de cupre de la sentenio 9, e sua obra de leteratur la plu vea es la Ramacaritam de la sentenio 12.

Musica carnataca, cual orijina en Carnatac, es un sistem de musica asosiada con India sude. Lo es un de la du sujeneras major de musica clasica de India cual ia evolui de tradisiones antica de induisme, con la otra, musica industani, cual inclui influes de Persia e Islam. Musica carnataca es tipal presentada par un grupo peti de musicistes, con la asentua clar sur la cantor.

Tradisiones de teatre-dansa ave un istoria longa e variada, e pote es trasada asta sirca du milenios, con formas notada ja en poesias antica. Alga formas es fundida sur dansas de templos, presentada par cortesanes e un clase de femes de la templos nomida la devadasis.