Primador
Un primador es un aparata per aplica presa a un surfas con inca cual resta sur un media de primi (como paper o stofa), par esta modo transmetente la inca. Lo ia marca un boni dramatosa de la metodos plu temprana en cual la stofa o paper ia es brosida e frotada repetente per ateni la transmete de inca, e ia aselera la prosede. Tipal usada per testos, la inventa e sperde de la primador ia es un de le avenis la plu influosa en la milenia du.
Johann Gutenberg, un oror par profesa, ia developa, sirca 1439, un sistem de primi par adota tecnicas esistente per la usa par primi. Sua inova la plu importante ia es la developa de matrises de metal moldida par mano, en esta modo produinte un sistem de primi fundida sur tipo movable. Sur moldador de mano ia permete la crea rapida e esata de tipo en cuantias grande. Esta ia redui dramatosa la costa de primi libros e otra documentos, spesial en series corta de primi.
La primador ia sperde en alga decades a plu ca 200 sites en multe nasiones european. Par 1500, la primidores tra Europa ia produi ja plu ca 20 milion volumes. En la sentenio 16, con primadores sperdeda plu distante, la produi ia crese a sirca 150 a 200 copias. La opera de un primador ia deveni sinonimal con la emprende de primi.
En Europa de la Renasa, la ariva de la primador con tipo movable ia introdui un eda de comunica masa, cual ia cambia permane la strutur de sosia. La sirculi relativa nonrestrinjeda de informa e ideas (a veses revoluinte) ia transende bordas, e ia catura la masas en la Reformi e ia menasa la potia de autorias political e relijiosa. La crese acu en alfabetisme ia rompe la monopolia de la elite en educa e aprende e ia coraji la clase media emerjente. Tra Europa, la crese en autoconsensa cultural de sua poplas ia condui a la alti de proto-nasionalisme, e ia aselera la developa de la linguas demotica european, a la costa de la prestijia de latin como un lingua franca. En la sentenio 19, la recambia de la primadores operada par mano par la primadores jirante propulsada par vapor ia permete primi en un grandia industrial.