Tipo movable es la sistem e tecnolojia de primi e tipografia cual usa partes movable per reprodui la elementos de un documento, plu comun leteras, numeros, sinias de puntua, e otra marcas, e plu comun sur paper.

La libro corean Jikji, 1377
Un paje de la Biblia de Gutenberg
Tipo movable moderne en metal

La primador prima con tipo movable per primi libros de paper ia es fabricada de porselana en Xina sirca 1040 ec en la Dinastia Song Norde par la inventor Bi Sheng (990-1051). Seguente en 1377, la primador prima con tipo movable de metal ia produi la libro Jikji en Corea en la Dinastia Goryeo.

La estende de ambos sistemes de tipo movable ia es, a alga grado, limitada xef a Asia este, an si reportas variosa de la tecnolojia ia es traeda a Europa par misionores cristian, mercatores, e comersiores ci ia reveni a Europa pos labora en Xina per alga anios, e ia influe la developa de tecnolojia de primi en Europa. Alga de esta reportas european medieval es ancora conservada en la arcivos de la Vatican e la Universia de Oxford, entra otras.

Sirca 1450, Johannes Gutenberg ia introdui un primador de tipo movable de metal a Europa, con la inovas en moldi la tipo fundida sur un matris de tipo e moldi de mano. La cuantia peti de leteras nesesada per linguas european ia es un fator importante. Gutenberg ia es la prima per crea sua pesos de tipo de un alia de plombo, stanio, e antinomia, e esta materias resta la model per 550 anios.

Per scrives alfabetal, la prepara de un paje en tipo movable ia es plu rapida e fasil ca primi con blocos de lenio. La pesos ia es plu durante e uniforma, resultante en tipografia e tipos de leteras. La cualia alta e la preso relativa basa de la Biblia de Gutenberg (1455) ia fundi la superioria de tipo movable en Europa e la usa de la primadores ia sperde rapida. La primadores pote es videda como un de la fatores clavin cual coraji la Renasa, e sua efetosia ia resulta en sua sperde tra la mundo.

La inventa de prepara de tipo de metal calda e sua susedentes ia causa la desende de la tipo movable en la sentenio 20.