Purisme lingual en engles

Purisme lingual en engles es la prefere per usa parolas nativa en engles en loca de parolas stranjer. "Nativa" pote sinifia "anglosason" o lo pote vasti tota parolas germanica. Purisme lingual en engles consentra xef sur parolas de orijina latina e elinica, par causa de sua importa en la lingua engles. En la plu forma minor, lo mera sinifia usa parolas nativa esistente en loca de parolas de orijina stranjer (per esemplo usa begin en loca de commence, "comensa"). En un forma min minor, lo ance envolve crea nova parolas de radises germanica (per esemplo wordstock per vocabulary, "vocabulo"). En un forma plu estrema, lo ance envolve parolas nativa cual es aora no es usada vasta (per esemplo ettle per intend, "intende"). La lingua resultante es per la plu nomida Anglish (creada par la autor e umoriste Paul Jennings, de engles antica: Anglisċ, engles medieval: Anglisch), o ance Roots English ("engles de radises", refere a la idea ce lo es un "revade a la radises" de engles). La forma minor es promoveda frecuente como engles simple, ma la forma plu estrema ia es e es aora un move de franje, cual pote ance es videda como un forma de scrive constrinje.

Purimse lingual en engles es descuteda par David Crystal en la Ensiclopedia de Cambridge de la lingua engles. La idea orijina a la min a la controversa de terma inkhorn de la sentenios 16 e 17. En la sentenio 19, scrivores como Charles Dickens, Thomas Hardy e William Barnes ia suporta purisme lingual e ia atenta introdui parolas como birdlore per ornithology, "ornitolojia" e bendsome per flexible, "flexable". Un suportor notable en la sentenio 20 ia es George Orwell, ci ia ave un prefere per parolas simple de anglosason a supra de parolas compleso de latina o elinica, e la idea continua ave promovores oji.