Richard 1

Richard 1 de England (8 setembre 1157 – 6 april 1199) ia es la re de England de 1189 asta 1199. El es nomida a veses Richard the Lionheart ("la cor de leon") per sua coraje. El ia es la fio de Henry 2 de England e Eleanor de Aquitaine. Car el ia es la fio tre, on no ia espeta ce el va erita la trono.

En 1168, el ia deveni la duxe de Aquitaine. El ia es un de la xefes de la Crusada Tre contra Saladin, un atenta cual no ia susede. Ma, en sua viaja, Richard ia concista Sisilia e Cipros. Ante parti de Cipros, el ia sposi Berengaria de Navarra, la fia prima de Re Sancho 6 de Navarra. El ia luta en la Batalia de Acre e la Batalia de Arsuf. A la fini, car el no ia pote recatura Ieruxalim, el ia deside reveni a England.

En sua reveni de la crusada, Richard ia es caturada par la deutxes. Heinrich 6, la imperor de la Impero Santa Roman, ia esije un rescate grande de la popla engles. Pos cuando el ia es librida, Richard ia pasa la plu de la resta de sua vive en batalias en Frans.

El ia mori de un flexa de balesta en un aseja de un castel. Sua corpo ia es enterada a la Abadia de Fontevraud, prosima a Saumur, Frans, con sua padre e madre. Sua organos interna ia es enterada a Chalus, prosima a Limoges, Frans. Sua cor ia es enterada en la Catedral de Nos Seniora (Notre Dame) a Rouen, Frans.

Richard ia es segueda par sua frate plu joven, John.