Rio Brahmaputra
La Rio Brahmaputra es un de la rios major de Asia. Lo flue tra Xina, India, e Bangladex (e donce ave nomes variante en cada rejion). Lo es la rio nove en volum de descarga, e la rio 15 en longia.
Lo orijina en la rejion de la Lago Manasarovar, a la lado norde de la Himalaias en Contia Burang de Tibet (do lo es nomida la Rio Yarlung Tsangpo), e flue tra Tibet sude asta lo rompe tra la Himalaias en caniones grande (inclui la Canion Grande de Yarlung Tsangpo) e a Arunchal Pradesh (India). Lo continua sude-ueste tra la Vale Asam como la Brahmaputra e sude tra Bangladex como la Jamuna. En la Estuario Ganga vasta, lo fusa con la Rio Padma, la nom popular de la Rio Ganga en Bangladex, e final como la Rio Meghna ante vacui en la Golfo Bengala.
Sirca 2,899.9 km de longia, la rio es multe importante per iriga e transporta. La profondia promedia de la rio es 38 m, e la masima es 120 m, e lo es navigable per cuasi tota sua estende. La rio tende deluvia desastrosa en cada primavera cuando la neva de la Himalaias fonde. Lo es ance un esemplo clasica de un rio trensada e es propensada seria a migra de canales (abandona de canales vea e crea de novas).
La rio basa es santa per indus. La plu de rios en la sucontinente indian ave nomes fema, ma esta ave un nom mas, con la sinifia "fio de Brahma". La vives de miliones de abitantes de India e Bangladex depende de la Rio Brahmaputra. Sua estuario es la abitada de 130 milion persones, e 600,000 persones abita sur la isolas de la rio. Esta popla depende de la deluvia "normal" per trae acua e deponedas nova a la solos de la plano deluvial, e donce per la nesesadas per cultiva. Du de la tre varias de ris (aus e aman) no pote survive sin la acua deluvial. Plu, la pexes prendeda de la plano en la saison de deluvias e de la multe lagetas pos la saison es la fonte xef de protena per multe poplas campanial.