Robert Ingersoll

Robert Green "Bob" Ingersoll (11-8-1833 – 21-7-1899) ia es un scrivor e retoriciste american en la "eda de oro de pensa libre", ci ia campania en la defende de agnosticisme. Sua nometa ia es "la agnostica grande".

Ingersoll ia es naseda en Dresden, New York. Sua padre, John Ingersoll, ia es un sermonor calviniste ci ia suporta abolisme, e de ci sua opinas radical ia causa ce el e sua familia ta reloca frecuente. Sua ideas ia disturba alga de sua congrega, e la congrega ia judi ce el no es plu bonvenida como sermonor en sua seta en la "litiga de Madison". Esta litiga ia aveni cuando Robert ia ave nove anios, e la trata nonjusta e prejudosa cual sua padre ia reseta causa ce la joven ta deveni un enemi de calvinisme e, plu tarda, de cristianisme jeneral.

La familia ia reloca a Marion, Illinois, do Robert e sua frate Ebon ia es asetada como avocatos en 1854. Un istoriste de la contia ia scrive, 22 anios plu tarda, ce la abitores local videda la Ingersolles como "un familia multe inteletosa; ma, car los es abolistes, e la fios es divinistes, los ia deveni iritante a sua popla en acel caso."

Cuando Robert ia reloca a Shawneetown, Illinois, el continua como avocato. En ajunta a sua emplea como un secretor legal, el e sua frate ia comensa sua ofisia legal con la nom "E.C. & R.G. Ingersoll". La frates reloca denova a Peoria, Illinois, do los resta final en 1857. Ingersoll ia sposi, 13-2-1862 a Eva Amelia Parker (1841-1923). Los ia ave du fias, e la plu vea, Eva Ingersoll Brown, ia es un femiste e sufrajiste selebrada.

A la comensa de la Gera Interna American, el ia leva la rejimento 11 de Cavaloria Bonvolente de Illinois, e ia deveni la comandor. La rejimento ia partisipa en la Batalia de Shiloh. Pos la gera, el ia servi como la Avocato Jeneral de Illinois. El ia es un membro importante de la Partito Republican e, an si el ia ave nunca un ofisia elejeda, el ia es un partisipante ativa de politica.

Ingersoll ia es un de la retoricistes la plu popular de la periodo, cuando retorica ia es un diverti publica. El ia parla sur tota sujetos, de Shakespeare a la Reconstrui, ma sua sujetos la plu popular ia es agnosticisme e la importa de la familia. El ia memoria sua parlas, an ce los ia dura, a veses, plu ca tre oras. Multe de la parlas ia burla crede relijiosa. Per esta, la jornalistes ia ataca el frecuente. Ma no sua opinas e no la articles negativa pote para sua popularia cresente. En sua fama la plu grande, escutores ta paia un dolar o plu per oia el, cual ia es un custa notable en la periodo.

Ingersoll ia es un ami de la poesiste Walt Whitman, ci ia considera Ingersoll la parlor la plu grande de sua eda. Ingersoll ia amira egal Whitman, e a sua mori en 1892, Ingersoll ia presenta la loda per Whitman a la funeral.

Ingersoll ia mori de nonsufisi de cor a la eda de 65 anios. Pronto pos sua mori, sua frate par lege, Clinton P. Farrell, ia colie copias de la parlas par Ingersoll per publica. La 12 volumes primida par Editas Dresden ia conserva la parlas e la interesa en la ideas de Ingersoll. Sua senas es enterada a la Semetero Nasional a Arlington.

Esemplos de sua scrives, de "La Dios" (1876):

___

Razona, oserva, e esperia - la trinia santa de siensa - ia instrui nos ce felisia es la sola bon; ce la tempo per es felis es aora; e la modo per es felis es par aida otras per es felis. Esta sufisi per nos. En esta crede, nos es contente a vive e mori. Si, par cualce posible la esiste de un potia superior ca, e autonom de, natur ta es mostrada, on ta ave tempo sufisinte per ajena. Asta alora, ta ce nos sta erijeda.

___

En rejeta intera tota credes, e nega la veria de tota relijios, me no ave, no en mea cor e no sur me labios, un grima per la spiritos esperante, amante, e compatiosa ci crede ce, de tota esta desacorda ta resulta un armonia perfeta; ce tota malia ta, en alga modo misteriosa, deveni un bon, e ce supra tota on ave un esente ci, en alga modo, ta reclama e glori cadun de la enfantes de umania. Ma per los ci, sin cor, atenta demostra ce salvia es cuasi nonposible, ce puni eterna es cuasi serta, ce la via de la universo condui nos a enferno, ci pleni vives con teme e moria con teror, ci condena la cuna e burla la tomba, lo no es posible per esperia otra ca sentis de triste e despeta.

___

Bibliografia

Ingersoll, R. G. The Works of Robert G. Ingersoll, in Twelve Volumes. The Dresden Publishing Company (1902). Disponable a https://www.gutenberg.org/ebooks/38813