Rorcual

Rorcuales (acc Balenopteros, Balaenopteridae) es la grupo la plu grande de la balenas vera, un familia con 9 spesies esistente en du jenera. Los inclui la animal la plu grande de tota edas, la rorcual blu, cual pote ateni 180 tones (pd 180,000 kg). La rorcual comun ateni 120 tones, e an la rorcual la plu peti, la rorcual nano, ateni 9 tones.

La nom "rorcual" es de la franses, cual deriva de la norsce røyrkval ("rorcual-balena"). En alga interpretes, la rorcuales inclui la megatero e la balena gris, e la rorcual nano e rorcual antartica es separada de la resta de la rorcuales.

Tota membros de la familia ave un serie de plias lonjitudal de pel, de su la beco a la ombilico (estra la rorcual de norde e la rorcual nano, cual ave plias min longa). Los distingui la rorcuales de tota otra balenas. Esta plias permete ce la boca estende enorme cuando come per pleni la boca con comedas e acua en un engoli solitar.

Rorcuales es grasil e idrodinamical, comparada con sua relatas la balenas franca, e la plu de rorcuales ave aletas magra e longida. Los ave un pina dorsal locada sirca du tridas de la fronte. Rorcuales come par engoli acua e alora puxa lo a estra tra la barbas de balena con sua linguas. Los come crustaseos, como cril, ma ance pexes variosa, como arenges e sardinas.

Jesta en rorcuales dura 11 a 12 menses, e donce cortea e pari pote aveni simultan en la anio. La femas pare un enfante solitar, cual es destetida pos 6 a 12 menses, dependente de la spesies. De alga spesies, adultes vive en grupos peti de 2 a 5 individuas.

Eschrichtius
- Balena gris, Eschrichthius robustus
Balaenoptera
- Rorcual comun, Balaenoptera physalus
  - Rorcual comun norde, Balaenoptera physalus physalus
  - Rorcual comun sude, Balaenoptera physalus quoyi
- Rorcual de norde, Balaenoptera borealis
- Rorcual de Bryde, Balaenoptera brydei
- Rorcual de Eden, Balaenoptera edeni
- Rorcual de Rice, Balaenoptera ricei
- Rorcual de Omura, Balaenoptera omurai
- Rorcual blu, Balaenoptera musculus
  - Rorcual blu pigmeo, Balaenoptera musculus brevicauda
- Rorcual nano, Balaenoptera acutorostrata
- Rorcual antartica, Balaenoptera bonaerensis
Megaptera
- Megaptera novaeangliae