San Lusia

Saint Lucia

Imno: Sons and Daughters of Saint Lucia

San Lusia es un isola e pais en la Mar Caribe este, a la borda con la Mar Atlantica. Un parte de la Antiles Minor, lo es situada a norde/norde-este de la isola San Vinsent, a norde-ueste de Barbados e a sude de Martinic. Lo covre 617 cilometres cuadrida de tera, e ia reporta un popla de 165 595 en la conta de 2010. Sua capital es Castries.

La franseses ia es la colonistes european prima de la isola. Los ia suscrive un trata con la caribes nativa en 1660. England ia controla la isola entre 1663 e 1667. En la anios seguente, lo ia gera contra Frans a 14 veses, e la controla de la isola ia cambia frecuente: lo ia es controlada a sete veses par cada de Frans e Britan). En 1814, la briteses ia prende controla defininte de la isola. Car lo ia pasa tan ofte entre controla brites e franses, San Lusia ia es ance conoseda como "la Helena de la Indias Ueste".

Governa represental ia ariva en 1840; la direto universal de vota ia comensa en 1953. De 1958 a 1962, la isola ia es un membro de la Federa de la Indias Ueste. A 22 febrero 1979, San Lusia ia deveni un stato autonom de la Comunia de Nasiones, asosiada con la Rena Unida. San Lusia ave un sistem legal miscada, fundida partal sur la lege sivil e partal sur la lege comun engles: la Codigo Sivil de San Lusia de 1867 ia es fundida sur la Codigo Sivil de Quebec de 1866, aumentada par leges en la stilo comun engles.

La lingua major es engles, ma la popla parla un franses creol. San Lusia es un membro de la Organiza Internasional de Francofonia.