Abri la menu xef
Un depinta de Saraswati, par Raja Ravi Varma

Saraswati (sanscrito: सरस्वती) es la diva indu de sabe, musica, arte, sajia, e aprende. El es un parte de la trinia (tridevi) de Saraswati, Lakshmi, e Parvati. La tre divas aida sua sposos, la trinia de Brahma, Vishnu, e Shiva, per crea, manteni, e resicli la universo.

El es descriveda como tan blanca como la luna, vestida en un roba blanca, ornada en joalas blanca, radiante belia, portante un libro e pen en sua manos, cual representa sabe. Un hamsa ("sinie") reposa su sua pedes, cual es un simbol de perfetia spirital.

Saraswati es sanscrito per saras ("acua lageti", ma a veses traduida como "parla") e vati ("el ci posese"). Orijinal, el ia es asosiada con la rio (o rios) ance nomida Saraswati. La nota de la diva es en la Rigveda, cual descrive el como la plu bon de madres, rios, e divas. Alga indus selebra la festa de Vasant Panchami (la dia sinco de primavera, ance nomida Saraswati Puja o Saraswati Jayanti) per onora el, e marca la dia par aida enfantes joven per aprende como scrive la leteras de la alfabeta. La diva es ance adorada par membros de la relijion jain de India sentral e ueste, en ajunta a alga setos budiste.