Xiva

Xiva (sanscrito: शिव, "la fortunosa"), ance conoseda como Mahadeva ("la dio la plu grande"), es un de la dios xef de induisme. El es la esente suprema en xaivisme, un de la tradisiones major de induisme moderne.

Xiva como la dio de la dansa

Xiva es conoseda como la destruor en la trimurti, la trinia indu cual inclui ance Brama e Vixnu. En la tradision de xaivisme, el es la esente supreme ci crea, proteje, e muti la universo. En la tradision de xactisme, la diva es descriveda como suprema, ma la trimurti es ance adorada. Un diva es la enerjia e potia creosa (xacti) de cada, con Parvati la egal de Xiva.

Seguente la xaivistes, la forma la plu alta de Xiva es sin forma, sin limita, transendente e noncambiante, la Braman asoluta, e la Atman (spirito) de la universo. On ave multe depintas de Xiva, alga bonvolente e otras asustante. Como un bonvolente, el es mostrada como un iogi omnisiente ci ave un vive asetica sur Monte Kailash con sua sposa Parvati e sua enfantes Ganexa e Carticeia. Como un ferosa, el es comun mostrada matante demones. El es regardada como la dio padron de ioga, medita, e la artes.

En representas, el ave comun un serpente sirca sua colo, un luna cresente, la Rio Ganga fluente de sua capelas marianada, un oio tre a sua fronte, un tridente como sua arma, e un tambur damaru. El es tipal adorada en la modo de un linga (penis), cual sinifia la potia creosa mas, con sua sposa representada par un ioni (utero) con la sinifia de la potia creosa fema. Xiva es adorada vasta par indus, en India, Nepal, e Srilanca.