Abri la menu xef


Etica es la studia filosofial de bonia e malia. Lo es comun usada intercambiable con la parola moralia. Lo difere de otra aspetas de filosofia en sua interesa en cual ta debe es en loca de en cual es. Esta resulta en ce lo deveni multe plu lisca ca metafisica o epistemolojia.

Teorias teolojialEdita

On ave tre categorias jeneral de filosofias de etica. La prima es la moralia teolojial. Como la nom indica, estas es filosofias de etica cual comensa con la idea ce lo cual es bon o mal es derivada de Dio (o alga otra potia plu alta).

La teoria teolojial la plu simple es la teoria de comanda divin. Esta teoria dise ce Dio la revela sua vole en la forma de comandas cual es furnida a nos tra tradision, scrives santa, la leges de la eglesa. Nos nesesa no plu per fa bon ca seguente acel comandas. La plu de la padres de la eglesa ia teni tal un crede, e la plu de persones relijiosa oji crede lo ance. Sua vantaje major es sua simplia e solidia.

Un teoria plu complicada es nomida lege natural. Esta deriva de san Tomas Aquinas, e es un parte de la filosofia catolica tradisional. San Tomas ia crede ce Dio no ta dona a nos un colie de regulas tra scrivedas santa e la eglesa, sola per causa ce los ta es contradiseda par nosa esperias e razona. Natur, como la crea de Dio, es en acorda tota con sua comandas moral. Persones ci crede en lege natural ta indica ce on ave persones de otra cultures, no esposada a nosa tradisiones de moralia, ci razona an tal sua via a la mesma concluis regardante cual es bon e mal.

La problem con lege natural ia deveni clar: Siensa produi, a veses, teorias cual contradise multe con scrivedas santa, e la eglesa produi a veses avenis (geras de relijio e la arde de ereses veni a mente) cual contradise multe con nosa tipo de moralia de sensa comun.

Cual causa ce la moralia de comanda divin e lo de lege natural es tan difisil es ce, en cuando sosia deveni plu pluraliste, nos ariva a plu e plu contata con un varia plu e plu grande de tradisiones relijiosa, cada con sua propre scrives e rituos santa, e no tota de los acordante a tota veses. La majoria de persones relijiosa ave bon cores e esita crede ce Dio ta condena nasiones intera per no ia ave la fortuna de oia la mesaje coreta! Esta senti es spesial tristinte cuando persones gania esperias con la popla multe bon con relijios diferente o an tota no relijio. Tra cuando nos resta jenerosa e umil, on ave no un problem, vera.

Ma alga persones trova se retirante a cual alga considera un posto defendente nomida asolutisme. Asolutisme es la teoria de comanda divin, ma sin la spirito jenerosa e umil. En otra parolas, on debe segue mea via o on ta sufri la seguente. Nos ia ave multe esemplos de asolutisme en istoria, e nos ave multe esemplos ancora oji.

Relativisme moralEdita

tota oposada a la teorias teolojial es la formas variosa de relativisme moral. Relativisme moral dise ce prinsipes moral universal no esiste. Moralia es un caso de costumes, opinas, abituas, o emosias. On ave un estende de opinas asi: relativisme es a veses videda como un tipo de seticisme moral, cual ta dise ce nos no pote sabe vera cual es bon o mal. Otras vide lo como un nihilisme moral, cual dise ce no tal cosa como bonia e malia esiste, e ce esta parolas es no plu ca eticetas malgidante per otra cosas plu simple.

Un tipo de relativisme es nomida costumalisme. Esta dise ce lo cual nos nomi moralia es vera no plu ca un caso de nosa normas cultural o sosial. Cual nosa tradision dise es bon o mal (per cualce razona) es bon e mal. Comun, con esta veni la idea ce cultures e sosias debe no interfere con lunlotra (como en la espresa "cuando en Roma, condui se como la romanes"), ma lo no es nesesada.

Un otra tipo es nomida prescrivisme, cual vide moralia plu como potia en un sosia. Cual nos nomi bon e mal es esensal prescrives per cual nos vole ce otras fa, cual nos enforsa con la potias su nosa comanda. Donce, nos dise ce fura es "mal" afin nos ave un justi per pone la persones ci fura nosa cosas en la prison!

Lo es nonevitable ce nos ta descovre otra sosias ci crede ce lo cual los desira es sua "direto", sin regarda a cual nos desira. O nos descovre situas do on ave du sucultures o grupos sosial de ci sua credes moral no acorda. Un de la difisilias de costumalisme es defininte cual composa un sosia o cultur e cual regulas de interata entre lunlotra los posese.

Un "solve" es per redui la cultur o sosia a un cultur o sosia de un - pd, la individua. Esta es nomida sujetalisme. Asi, cada person ave sua propre moralia. Lo pote es un caso de credes individua o un caso de abitua, ma cada person crea sua propre elejes. Esta ta solve la problem de natur de un sosia o cultur, ma lo mali la problem de regulas de interata an plu!

Un otra tipo de relativisme vade an plu: emosialisme dise ce cual nos nomi bon o mal es no plu ca eticetas per alga respondes emosial ce nos senti regardante alga atas. Si tua idea de come canetas causa ce tu vomita, tu ta nomi lo mal. Si la idea causa ce tu saliva, tu ta nomi lo bon. Si seso con adolesentes fa ce tu deveni felis, tu ta nomi lo bon. Si seso con adolesentes fa ce tu deveni coler, tu ta nomi lo mal.

Entre studiantes, on pote trova jovenes ci trae sua credes relijiosa familial con se a la universia. Los tende gusta la teoria de comanda divin, con alga asolutistes como spise. Ma cuando los maturi, la plu ia deveni relativistes. La familia colpa comun la profesores per esta cambia en sua fies, ma lo es vera plu un caso de esposa a la minisosia pluraliste de la universia.

La studiantes joven vide ce on ave multe persones ci no acorda con un detalia o un otra de sua prinsipes moral de enfantia, ma pare como persones amin, o a min los no ia es matada par lampos de sielo. Alora, car esta studiantes es persones de bonvole, los comensa asentua tolera per la varia de moralias los vide, e relativisme pare como la forma la plu bon per esta tolera. Per esemplo, si tu ia es elevada per crede ce omosesalia es mal, ma tu trova multe persones ci crede ce lo es bon (e alga ci crede ce lo es la forma de sesalia la plu bon), tu pote developa un tende de "vive e lasa vive", "per cada sua propre", e "dansas diferente per persones diferente".

Ma no tota casos es tan nonosiva como preferes sesal. On ave ance persones de ci sua prinsipe moral dise ce los debe sacrifia gales a la dios, o ce los debe converti a noncredores, o ce los debe arde uicanes a la posto, e ce los debe destrui la noncredores... Cual nos debe fa alora con nosa tolera jentil? Permete ce continua car "per cada sua propre"? Cual ta aveni si nos ia es tan tolerante cuando Adolph Hitler ia comanda la mata de miliones? O si la visinas de Jeffrey Daumer ia conclui ce, si el vole mata e come sua amadas, en cual modo es esta nosa conserna?

Un relativiste sofisticada ta responde, an tal, par indica ce esta idea de tolera no ave un rol en un teoria de moralia relativiste - ce tolera mesma es un valua moral a cual on adere o no adere. Donce, si la moralia de Hitler es un caso de estingui persones inosente, lo es nosa moralia per preveni el de continua! No problemes de lojica asi.

Como on pote vide, relativisme prende un risca. Relativisme pote deveni nihilisme en la mesma modo ce comanda divin pote deveni asolutisme. Ma relativisme es la teoria de moralia segueda par la majoria de siensistes, incluinte la plu de psicolojistes.

Moralia realisteEdita

La categoria tre de teoria moral es moralia realiste. Moralia realiste dise ce bonia e malia esiste en alga modo en esta mundo (o en nosa mentes), autonom de cosas como costumes sosial, credes, o opinas. A la otra lado, realisme moral no proposa alga cosa tan simple como un lista de comandas direta presentada par Dio. Moralia realiste es la media entre la teorias teolojial e relativisme moral, e es la plu comun modo de la filosofistes.

Ma, como es tipal con la media du cualce problem, lo no es un rol fasil adotada. La demanda grande a cual realistes moral debe responde es "como nos pote sabe bon e mal? como nos pote reconose lo cual es bon o mal?" Car esta demanda es tan difisil, on ave alga formas diferente de realisme moral.

Moralia razonalisteEdita

La grupo prima de teorias per esamina es la teorias de moralia razonaliste'. Como la nom indica, esta teorias vide moralia como veni de nosa capasia per pensa. Como epistemolojia razonaliste, la forma la plu fundal de un veria moral razonaliste es lo cual es autoevidente. Esta es la teoria de intuisme, cual es mostrada la plu bon par la filosofiste brites moderna, G. E. Moore.

E, como en epistemolojia razonaliste, con pote dedui de intuis con lojica formal. En otra parolas, nos pote pensa nosa via a prinsipes moral. Kant ia promove tal modo en cual es conoseda como formalisme. El ia usa razona sur sua intuis e ariva a un etica cual dise "nunca trata persones como modos per ateni goles; sempre trata los como goles se mesma".

Un forma popular de moralia razonaliste es nomida contratisme. Lo es asosiada con alga filosofiste influente, como John Locke e Jean-Jacque Rousseau. Rousseu ia crea la titulo e la idea fundal: el ia sujesta ce, a un ves, umania ia es en un state de anarcia savaje. Cada person ia senti libre per fa cualce cosa los ia senti nesesada per ateni lo cual los desira. Ma, la fato ce tota otras ia senti la mesma ta sinifia ce nun es vera libre en cualce modo. La tempo los no ia spende ateni lo cual los desira, ta es spendeda protejente se mesma de lunlotra!

Donce, Rousseau ia dise, nosa asedente ia asembla, senta, e pensa - a min metafora. Plu leteral, alga modos de trata esta anarcia ta evolui tra miles de anios. Ma la prinsipe es la mesma: cada de nos acorda per sede alga de nosa libria per prende cualce nos desira, afin nos pote tota reseta cual nos nesesa. Lo es nomida "la contrata sosial".

Esta idea ia es multe influente en sua eda, spesial sur la revolui american. La "padres" de nosa nasion ia descrive la prosedes de nosa governa e la diretos e obligas de la sitadanes en un contrata conoseda como la constitui. Nos nomi esta sistem democratia, natural, ma la constitui limita nosa libria democrata - la libria de la majoria - per proteje la minoria. E car on sabe nunca cuando sua turna ta ariva per es la minoria, esta ia opera bon (o no mal - nos ia continua nosa atenta per boni la sistem, pe par permete persones otra ca omes blanca vea per partisipa en la democratia. la obra continua!).

Moralia naturalisteEdita

La grupo de teorias seguente, como tu pote espeta, es fundida sur ideas de un natur plu empirical. Asi, moralia es alga cosa cual tu esperia en alga modo. Esta teorias es nomida naturalisme moral. La plu simple sujesta ce nos persepi bon e mal direta, con un "sensa ses", un sensa moral. Esta es la idea introduida par la dux de Shaftesbury. Nos dise comun a lunlotra "esta no pare bon" e "esce tu no pote vide ce esta es mal?"

Egoisme dise ce bonia e malia pote es persepida como la esiste de sentis spesial nomida felisia. La terma egoisme es nonfortunosa asi, car nos tende pensa de lo como un caso de la egoisme de avaria e hedonisme, cual es plu coreta poneda su la formas sujetal o emosialiste de relativisme. La epicuristes es bon esemplos de egoisme moral: Cosas como amia, onora, e an altruisme dona a nos alga emosias positiva par cual nos pote reconose ce los es bon. Otra cosas causa ce nos senti culpable o vergoniante - los es mal.

Analoja a contratalisme en la vista razonante, on ave utilitarisme en la vista natural. Inventada par Jeremy Bentham e developada par John Mill e sua fio John Stuart Mill, utilitarisme es la plu bon conoseda per la frase "la felisia la plu grande per la cuantia la plu grande". Como egoisme, felisia es videda como la modo en cual nos persepi bon e mal. A esta ves, la gol no es sola nosa propre felisia, ma la felisia de otras ance.

Par intui, lo pare multe acordable. Ma lo es vera difisil. Como on pote sabe si otras es felis? Nos no es sempre serta si nos mesma es felis! Cual causa otras per senti felis pote no es la mesma como cual causa nos per senti felis. Como pote nos soma la tipos variosa de felisia? Es caa person egal en la formula, o es la felisia de alga persones plu importante ca la de otras? E la minoria: esce lo es oce ce los no es felis, tra cuando la majoria es felis? Bentham ia pensa ce nos pote developa un "calculo edoniste" per solve esta cosas. Otras nonacorda forte.

(Un nareta par Ursula le Guin nomida "Los ci vade a via de Omelas", en cual la felisia de tota sitadanes de Omelas es garantiada si los prisoni sola un enfante per sua vive intera. Libri la enfante, e tota pote deveni min ca felis o an triste; permete ce la sistem continua, e la enfante va continua sufri. Alga persones en la nareta eleje per vade a via, sacrifia sua felisia per no es un parte de esta sistem. Cual es la modo de responde a la situa la plu moral?)

De nova, nosa "padres de la nasion" ia es influeda par utilitarisme en ajunta a la contrata sosial, e la Declara de Autonomia de SUA es plenida con consetas utilitariste (e consetas contrataliste). Thomas Jefferson, spesial, ia es multe interesada par esta casos. Ma nos continua demanda, como el ia pote reteni sua sclavos?

Un de la cosas tu ia pote nota cuando tu ia leje la paragrafes presedente es ce esta teorias razonaliste e naturaliste no es multe escluinte: En fato, on pote combina tota de los sin estende los tro multe de sua formas orijinal. Como la SUA ave la Declara de Autonomia e sua constitui, e como siensa es un misca de razonalisme e empiricalisme, nos pote sua tota de esta teorias su la idea de realisme moral a un ves!

Etica de virtuaEdita

Nos ave un plu ramos de realisme moral per discute. Esta es nomida la moralia de virtua. En loca de vide a bonia e malia como alga cosa nonpersonal cual nos nesesa reconose par razona o un senti moral, la teoria de virtua vide bonia e malia como cualias de la person mesma. Un person virtuosa es on ci crea atas bon, e no atas bon cual soma a un person virtuosa. Esta es ance comun nomida perfetisme.

Lo es trovada en alga locas interesante: Aristotele ia proposa un etica de virtua en sua Etica Nicomacean famosa; Buda ia contorni un etica de virtua en sua sutras; Plato ia ave un etica de virtua, e ance la stoicas; e Frederic Nietzsche ia promove un etica de virtua en Tal parla Zoroastra, la libro cual ia introdui la idea de "Ubermensch" (la person superior*) a la mundo. La idea es simple: Segue alga praticas e tu ta deveni un person virtuosa; alora, fa cual tu vole, e la resultas ta es bon.

La etica de virtua es multe atraente, ma lo ave un peril en lo. Ci deside cual composa un person virtuosa? La nazis ia leje Nietzsche e ia deside ce los mesma es la rasa mestral e no pote fa mal. Nietzsche no intende esta e el no ta pote reconose sua Ubermensch en la camisas negra e sua piafa de botas, e plu, Nietzsche ia es mor ante los. An la Budistes jentil ia debe fasa la problem: Si un mestre ci ia es sertida como luminada ta deside ce lo ta es un bon idea per ave seso con sua studiantes, o prende tota sua mone, esce sua "lumina" fa ce estas es bon? Per responde ce, en esta caso nos ia era sur sua lumina es tro fasil un via estra la dilema.

Un otra varia de la etica de virtua, nomida etica situal, ia es developada plu resente par un teolojiste, Joseph Fletcher. No comfortosa con la teolojia de "segue esta regulas o arde en enferno per eternia" de alga cristianes, el ia dise ce Jesus ia ave un idea multe diferente de moralia (un idea multe simil a lo de Buda). Si tu cultiva un disposa de amia, tu va comensa natural per fa plu bon e min mal. En fato, cualce cosa fada con ama es par defini, en sua sistem, un ata bon.

Tu pote indica ce alga persones fa alga cosas mal en la nom de ama, ma nos pote vide estas como era. Ma on pote debate esta par nomi lo la crede falsa de "no un om scotes vera": Si alga cosa bon deriva de ama, lo es bon; si alga cosa mal deriva de ama, lo no ia es ama.

Un otra aspeta de esta teoria es ce moralia es sempre situal. El intende ce moralia es sempre un caso de un person real en un situa rea, e nos no pote judi la atas de la person de estra la situa. Situas moral ipotesal, el dise, es nunca real. On ave sempre plu detalias per considera! (Un esemplo eselente de esta idea pote es videda en la filma Sophie's choice pd "la eleje de Sophie", en cual un madre debe eleje cual de sua du enfantes pote es matada par la soldato nazi.) Esta ia sona multe tro multe como relativisme moral a cristianes conservaliste, e alora oji, multe persones malcomprende Fletcher e suposa ce el ia es alga forma de nihiliste repulsante. Los era.

* La usa de "superman" como la forma engles per "Ubermensch" ia resulta ance en un malcomprende de la intendes de Nietzsche.