Teorias de Metafisica
Metafisica es la ramo de filosofia cual esamina la composa de la universo e demanda "de cual es la mundo - incluinte nos - composada?" e "cual es la sustantia ultima?"
Lo es posible ce on ta suposa ce esta es plu interesante per un fisiciste ca un psicolojiste. Fisica, vera, deriva sua nom de la parola elinica physis, cual sinifia "sustantia ultima". Ma per psicolojia, un de la problemes durante es la relata entre la mente e la corpo. Esce la mente, per esemplo, es sola un ativia de la serebro, como multe suposa? O esce lo es plu ca acel? Esta es un de la problemes ce psicolojia ia erita de relijio en ajunta de filosofia: On pote simil demanda de la esiste separada de la spirito e sua relata a mente e corpo. Psyche es, natural, la parola elinica per spirito!
Per un varia de razonas, filosofistes ta gusta jeneral si materia e spirito, o corpo e mente, ia es esata un sustantia ultima - un idea nomida monisme. Lo es un caso de sua ama de simplia. Ma la problem es cualce? On ave du competentes major per la titulo:
Materialisme dise ce la universo es completa composada de materia. Materia, per filosofistes, inclui enerjia e cualce cosa en la sinifia fisical. Alga filosofiste de Elas antica, per esemplo, ia crede ce tota la mundo (incluinte nosa) ia es composada de acua. Otras ia crede ce lo ia es foco. Otras ia crede ce la universo ia es composada de particulas nonvidable cual no ia es creada e no pote es destruida nomida atomes. Oji, fisicistes (e cimicistes, e biolojistes, e la plu de psicolojistes) ia acorda con lunlotra sur esplicas plu complicada, ma ance es esensal la realia fisical.
(Un nota: per favore recorda ce "materialisme" no refere asi a la ama de cosas material como ricas!)
Idealisme es la otra competente per la titulo. Idealisme dise ce la universo es composada de la spirital o mental, a cual los refere como idea o ideal. Elinicas antica ance ia ave un varia de ideas regardante cualce forma spesifada de idea ta composa la universo. Algas ia dise ce la mundo intera es no plu ca la sonia de Dio (como alga filosofistes induiste ta dise ance). Otras ia vide lo como un tipo de "forsa de vive". Otras plu ia vide lo como la perfetia su la mundo nonperfeta cual nos persepi. Idealiste moderna parla de un universo de spiritos personal, o un mundo de cualias.
(Denova, un nota: "idealisme" no refere asi a condui se par prinsipes alta!)
An ce lo pote apare a on ce materialisme es la responde clar la plu bon, acel es plu la resulta de cultur, e no de filosofia. La majoria de filosofistes ia es idealistes, car idealisme es alga plu razonada ca materialisme! Si on toca alga cosa, on senti resiste, caldia o fria. On pote bateta lo e oia sonas, ole lo o leca lo (si tu desira vera), etc. On ta esperia multe avenis mental, ma nunca, tota par sua solitaria, materia! Ma ideas - on debe sola ave un pensa, e on ta esperia lo como autoevidente.
(Nos va reveni pronto a alga plu tipos de monisme.)
La alternativa tipal per monisme es nomida dualisme. Lo es no plu ca un modo de dise ce on ave, en fato, du sustantias diferente en esta universo: la material e la ideal. Per psicolojia, esta ta es la idea ce la mente (o spirito) e la corpo es ambos egal real, e ce no un o la otra pote es reduida a la otra.
Aora, esta pare como la solve evidente de la dilema. Ma on ave un problem filosofial multe seria: Si on ave du sustantes diferente en la universo, como los pote posible interata? Como la spirito (o mente), cual es suposada sin masa o estende, causa la corpo per ata? E como la avenis la corpo sufri en alga modo cambia de avenis fisical a alga cosa mental?
Pensa sur lo per un momento. Lo es fasil diseda ce, cuando nos vide un poma roja, la ondas de lus causa reatas cimical en la retina, cual causa la neurones ensende, cual causa neurotransmetentes veli ultra la sinapses, cual envia la siniales neuronal plu e plu profonda en la serebro, la ativia de cual es la cosa nos nomi "vidente la poma roja". Ma lo no importa como multe detalias on furni, a no punto es tota esta ativia fisical convertida a la esperia de un poma roja!
Simil, si me ave un pensa cual dise "me va lansa la poma a tua testa", tu ave, sin duta, ativia neuronal cual es traduida a ativia musculal, traduida a la vola de la poma. Ma cuando, do, e como, esce la pensa deveni un ativia neuronal? Algas refere a esta problem como la problem de mente-corpo. Otras nomi lo la fantasma en la macina.
Descartes, en ajunta a sua rol como la padre de filosofia moderna, ance usa sua tempo libre per promove la idea de la reflexe. En sua eda, macinas idraulica ia es la cosa popular - spesial fontes con carateres movente. Descartes ia sujesta simple ce viventes es macina simil (no diferente ca nos cuando nos sujesta ce la serebro es no plu ca un computador moiada).
Ma Descartes ia es ance un catolica bon, ci ia crede ce nos ia ave un spirito nonmortal. Como acel spirito pote influe la corpo, o la corpo influe la spirito, resta un misterio. Descartes ia suposa ce, posible, la glande pineal (alga sentimetres pos tua oios) ta es la lia cual permete la "spiritos animal" cual viaja tra la nervos e causa la move de nosa musculos. Un mal suposa.
La tipo de dualisme cual Descartes proposa es nomida interatisme: On ave du sustantias, los interata, me no sabe como. E ance, natural, es min ca sasiante. Donce otra filosofiste ia dona sua opinas. Un prete franses nomida Nicholas Malebranche ia sujesta de lo es Dio cual interveni e causa ce nos esperia pensas cuando cosas aveni a nosa corpos, e causa ce nosa corpos ata cuando nos vole lo. Car esta interatas aveni en tota de nos, miliones de veses cada dia, Dio debe es multe ocupada. Ma Dio es Dio, donce lo es un posible clar. Esta tipo de dualisme es nomida oportunisme.
Un otra esplica ia es furnida par la jenio deutx, Leibniz. El ia sujesta ce, en loca de Dio interveni biliones de veses cada dia, el ia pote inisia la universo intera per vade du vias coordinada, un material e un spirital. Lo es simil a cuando on inisia du orolojias - un orolojia antica con un pendulo e la otra un orolojia eletrica dijital - per manteni la mesma tempo, an si los ave du aparatos diferente e ave no contata con lunlotra. Dio pote fa la mesma con la corpo e la spirito. Esta es nomida paralelisme. An ce nos pote trova esta esplica alga strana, lo no es un esplica mal.
Ma filosofistes (e psicolojistes) desira sabe plu serta ca fida. Donce, la xerca per un solve ia continua. Posible la atentas a solve esta problem en la Lumina veni de la fabricor de lentes, Benedict Spinoza. Sua teoria es nomida du-aspetisme. Lo es un monisme cual pare como un dualisme: La mente e la corpo, el ia dise, es du lados de un "sentime", cual es la sustantia vera ultima de la universo.
Donce, si un roca colpa tu sur la fronte, la avenis fisical cual aveni en tua testo ave un otra lado a los, cual es la dole cual tu esperia. E la pensa tu ia ave per leva tua mano per toca la contusa ave ance un otra lado, cual es la ata fisical de lo. La problem solveda!
Ma posible no. Si tu dise ce la universo intera ave du lados a lo, tu debe inclui no sola la mente e la corpo. Spinoza ia crede ce Dio es cual nos nomi la lado mental de la universo, e natur es cual nos nomi la lado fisical. Dio es la mente de natur, e natur es la corpo de Dio! Esta es nomida 'panteisme. En la eda en cual Spinoza ia vive, esta ia es nomida ateisme, e ia es la funda clar, en la plu de paises, per un foco de festa, con tu como la invitada spesial.
An si tu gusta la idea de panteisme, on debe recorda ce lo implica ance panpsicisme - tota ave du lados: Animales e plantas e rocas ave pensas e spiritos; ma on no pote ave un spirito en sielo cual no es liada firma a un corpo. Rocas pensante e no spiritos en sielo es idea difisil per la plu de persones.
Multe plu tarda, William James, "la padre de psicolojia american" e nosa filosofiste la plu bon es sua tempo estra, ia inventa cual es nomida monisme neutra. El ia sujesta ce Spinoza ia es cuasi coreta, ma no tota. La fisical es la un sustantia ultima como videda de un perspetiva, e la mental o spirital es la mesma sustantia videda de un otra perspetiva. La sustantia ultima es alga cosa diferente, alga cosa neutra. Esta permete ce nos dise ce alga cosas pote es videda sola como fisical, e otras sola como mental, e otras como ambos.
La problem cual resta es la demanda con cual nos ia comensa: Cual alora es la sustantia ultima? Un sujesta resente es informa. Esta no vade tro distante de materialisme, es popular con la promove de intelijentia artifis e con psicolojia cognisial. Un otra sujesta es plu como idealisme, e es nomida realisme de cualia.
James ia ave ance un otra idea nomida pluralisme. Vera, dualisme es un pluralisme. Ma el ia sujesta ce on ave multe plu ca du "sustantias ultima". On ave materia e mente, serta, ma on ave ance matematica e lojica (esce los fisical o mental?), e spasio e tempo (los es cual?). An materia pote es divideda entra materia mesma, enerjia, gravita, etc. E la mental inclui pensas, persepis, imajina, emosias, vole, eleje, etc. Alga de estas pote interata (materia e enerjia, per esemplo, como en e = mc2). Otra pote no interata con cualce otra cosa. La problem? Aora nos ave sentos o an miles de sustantias ultima cual nos debe reconsilia, en loca de du.
Posible la metafisica la plu popular entre rexercores en psicolojia (en contrasta con terapistes) es nomida epifenomenalisme. Esta sujesta ce materialisme es clar la modo plu produosa en la siensas, lo es ance no dutable ce nosa vive interna es ance real. Donce, dise la epifenomenalistes, ta ce nos aseta ce on ave alga cosa nomida mente cual nos no ia comprende intera, ma ta ce nos dise ance ce la mente es no plu ca un produi coaveninte de la serebro, simil como caldia es un produi coaveninte la opera de un motor: si nos ia ave la capasia per desinia un motor perfeta, tota enerjia ta tradui a move en loca de caldia. Donce, si nos pote sabe completa la serebro, nos ta nesesa no plu la conseta de mente. Lo es serta un forma de materialisme, ma en un forma plu umil.
Alora, la problem resta. "Como esta ismes relata a psicolojia comun?" tu pote demanda. Oce: pensa sur cualce cosa incluida en psicolojia - ama, coleria, persepi, dementia, psicofarmacolojia... Cual es depresa? Esce lo es un problem de persepi o emosia? O esce lo es un problem de la despone de seratonina? Esce nos debe usa drogas per cambia persones ci ave esca problemes? O esce maladias mental alga cosa cual nesesa aidante los per cambia sua perspetivas sur sua vives? Si lo es un combina de la du, como nos pote sabe como multe de la problem es un o la otra? Esce lo es la mesma per cadun? La problem de mente-corpo resta vera, a la cor de psicolojia.