Tigre tasmanian
La tigre tasmanian (Thylacinus cynocephalus), aora estinguida, es un la la marsupiales carnivor la plu grande, evoluinte sirca 4 milion anios ante aora. La vivente final ia es caturada en 1933 en Tasmania. Lo es orijinal nativa a Tasmania, Australia, e Gine Nova.
La tigre tasmanian ia es relativa timida e noturna, con la apare jeneral de un can grande o de grandia media, estra sua coda rijida e pox adominal simil a los de un cangaru, e la bandas oscur cual ia radia de a alta de sua dorso, simil a los de un tigre. Lo ia es un predor forte. Como un resulta de evolui converjente, lo ia ave un forma e adatas simil a la tigre e la lupo de la emisfera norde, an si los no ia es relatada. Sua relativa la plu prosima es o la diablo tasmanian o la numbata (un marsupial simil ma plu peti). La tigre tasmanian es un de sola du marsupiales cual ave un pox en ambos sesos (la otra es la oposum acual). La pox de la mas ia servi como un gaina protejente covrente la organos esterna de reprodui de la mas.
La tigre tasmanian ia es un xasor cual prefere la note o la duilus, e spende la lus de dia en cavas peti o troncos cavetin de arbores, en un nido de rametas, cortex, o filises. Lo ia tende retira a la colinas e forestas per refuja en la dia e ia xasa en la stepe abrida a la note. On suposa ce sua preda ia inclui cangarus, ualabis, e uombatas, avias e animales peti como potorus e oposumes. Un otra preda ia es posible la emu tasmanian, cual ia es comun en la pasada.
La tigre tasmanian ia deveni estinguidas en Australia estra Tasmania ante la coloni de la continente par la brites, ma lo ia survive sur la isola de Tasmania con alga otra spesies nativa, incluinte la diablo tasmanian. Xasa intensa, corajida par recompensa, ia redui e ultima estingui la tigre, ma otra fatores pote es maladias, la introdui de canes, e la entra a sua abitada par umanas