Uombata

Uomatas es marsupiales cuatropede musculosa nativa a Australia. Los ave gamas corta, es sirca un metre longa con codas peti, e pesa entre 20 e 35 kg. La pelo de uombatas pote varia de un color arenin a brun, o de gris a negra. Uombatas es tolerante e pote ajusta fasil a cambias de abitada, e los es trovada en areas montanial e forestida en Australia sude e este, incluinte Tasmania. On ave tre spesies esistente, tota en la familia Vombatidae:

Uombata comun (Vombatus ursinus)
Uombata norde con nas capelosa (Lasiorhinus krefftii)
Uombata sude con nas capelosa (Lasiorhinus latifrons)

*Phascolonus* ia es un jenero de marsupiales australian preistorial; los pote pesa tan multe como 200 kg

Uombatas escava sistemes de tuneles estendeda con sua dentes simil a los de rodentes, e sua garas potiosa. Un adata par uombatas es sua pox a retro; la vantaje de esta es ce, cuando escava, la uombata no colie solo supra sua enfantes en la pox.

Uombatas prefere ativia a note o duilus, ma pote vade a estra per nuri se en dias min calda o nubosa. Los no es comun videda, ma resta multe indicas de sua pasa, vadente su o tra sercas e lasa sua feces cubo. Uombatas ia ordina esta feces per marca sua teritorio e per atrae sposes. On suposa ce la forma cubo permete pila los, e fa ce los no rola a via, cual dona un vantaje biolojial.

Uombatas es erbivores. Sua dietas es composada per la plu parte de gramas, erbas, siperos, cortex, e radises. Sua dentes siselinte sembla los de rodentes, adatada per rode tra plantas dur.

Uombatas fema pare un enfante solitar pos un periodo de jesta de sirca 20 a 30 dias. Tota spesies ave poxes bon developada, cual la enfantes parti pos sirca 6 a 7 menses. Uombatas es desteti pos 15 menses, e es matur sesal a 18 menses.

Uombatas vive tipal a 15 anios en sua abitada natural, ma pote vive plu ca 20 o an 30 anios nonlibre. La uombata nonlibre la plu vea ia ateni 34 anios.

Dingos (canes australian) e diablos tasmanian predi sur uombatas. Predores estinguida ia inclui posible la tigre tasmanian e la leon marsupial. La defende xef de uombatas es sua pel dur de sua anterior, con la plu de lo composada de cartilaje. Esta, con sua manca de un coda sinifiante, causa ce cualce predor cual segue un uombata en sua tunel deveni probable multe frustrada. Cuando atacada, uombatas tufa en un tunel prosima e usa sua posterior per bloco sua atacor. Un uombata pote permete ce la atacor forsa sua testa supra sua dorso e usa sua gamas potiosa per crase la cranio de la predor contra la teto de la tunel, o forsa lo a via con colpas de du gamas, como un asino.