Tundra

La tundra es un tipo de bioma do la crese de arbores es lentida par temperatures basa e saisones de crese corta. La parola deriva de rusce тундра, cual deriva plu de sami тӯндар, sinifiante "tera alta" o "montania sin arbores". La plantas de la tundra es composada de arboretas nana, siperos, erbas, moses, e licenes. En alga rejiones de tundra, arbores sperdeda pote crese. La borda entre la tundra e la foresta (comun taiga) es nomida la "linia de arbores".

On ave tre rejiones o tipos de tundra: tundra artica, tundra antartica, e tundra montanian:

La tundra artica aveni en la emisfera norde, norde de la taiga. La parola "tundra" tipal refere sola a areas do la susolo es permajelada (an si lo pote ance refere a planos sin arbors, donce Sapmi norde pote es incluida). Tundra permajelada inclui areas vasta de Rusia e Canada norde. Esta area es abitada par alga poplas ci es pastores de renos, como la nganasan, nenets, e sami.

La tundra antartica aveni a Antartica e a alga isolas antartica o suantartica, incluinte Georgia Sude e la Isolas Sandwich Sude, e la isolas Kerguelen. La parte la plu grande de Antartica es tro fria e seca per suporta plantas, e es covreda par campos de jela. Ma alga partes de la continente, spesial la Penisola Antartica, ave areas de solo rocosa cual suporta viventes.

La tundra montanian no conteni arbores car la clima e solos a altias alta preveni la crese de arbores. La clima es causada par temperatur basa e es simil a la clima polal. Tipal, esta tipo de tundra no ave permajelada, e la solo es plu bon drenida ca solos artica.

• 
  Sydkap en Scoresby Sund, Gronland este; un cranio de un bove muscosa a la fronte de la imaje
• 
  Tundra en Sibir
• 
  Monte Werth (908 m), Arcipelago Kerguelen
• 
  La popla nenets es pastores nomada de renos